ខេត្តព្រៃវែង ៖ បុរសម្នាក់បានស្លា.ប់បាត់បង់ជីវិត ដោយសារតែបើករថយន្តធ្លាក់ចូលប្រឡាយទឹក ហើយគ្មានអ្នកដឹង អ្នកជួយ ។
ករណីនេះ បានកើតឡើងកាលពីយប់ថ្ងៃទី០៥ ខែឧសភា ឆ្នាំ២០២៤ ហើយបានបង្កឲ្យមានការភ្ញាក់ផ្អើលឡើងនៅព្រឹកថ្ងៃទី០៧ ឧសភានេះ បន្ទាប់ពីក្រុមគ្រួសារ ចុះទៅរកឃើញសាកស.ពនៅក្នុងទឹកប្រឡាយ ដែលស្ថិតនៅចំណុច ផ្លូវខ្នងប្រឡាយស្ពានតាបិត ស្ថិតក្នុងភូមិព្រៃទួលថ្មី ឃុំក្របៅ ស្រុកកំចាយមារខេត្តព្រៃវែង ។
ជនរងគ្រោះមានឈ្មោះ ធល ចាន់ទូ ភេទប្រុស អាយុ២៩ឆ្នាំ មានទីលំនៅក្នុងភូមិចំការចេកទីមួយ ឃុំក្រញូង ស្រុកកំចាយមារ មានប្រពន្ធឈ្មោះ ផាន់ សុផានិត អាយុ២៧ឆ្នាំ ។
យោងតាមការរៀបរាប់របស់ស្ត្រីជាប្រពន្ធ បានឲ្យដឹងថា នៅថ្ងៃទី៥ ឧសភា ខ្លួនបានទៅជួយធ្វើស្រែនៅផ្ទះម្ដាយ ក្នុងភូមិកណ្ដាល រហូតដល់ល្ងាច ស្រាប់តែប្ដីដែលជាជនរងគ្រោះ បានបើករថយន្តទៅដល់ដែរ រួចបានផឹកស៊ីជាមួយបងប្អូននៅផ្ទះម្ដាយ រហូតដល់យប់ ដោយបារម្ភកូនចៅនៅផ្ទះ គ្មានអ្នកមើល ស្ត្រីជាប្រពន្ធ ក៏បានជិះម៉ូតូត្រឡប់មកផ្ទះមុន ចំណែកប្ដីនៅផឹកបន្ត លុះដល់កណ្ដាលអធ្រាត្រមិនឃើញប្ដីមកដល់ផ្ទះវិញ ក៏ទូរសព្ទទៅសួរម្ដាយ ហើយម្ដាយបានប្រាប់ថា ជនរងគ្រោះបានត្រឡប់មកផ្ទះវិញយូរហើយ ។
ស្ត្រីជាប្រពន្ធ បានបន្តថា ដោយបាត់មិនឃើញប្ដីពេញមួយយប់ ព្រឹកឡើង ប្រពន្ធក៏នាំកូនចៅបងប្អូនដើរស្វែងរករហូតដល់យប់រកប្ដីមិនឃើញសោះ លុះព្រឹកឡើងថ្ងៃទី៧ ឧសភា ក៏មានអ្នកស្រុក ឃើញបំណែកកញ្ចក់រថយន្តនៅមាត់ប្រឡាយ ក៏ប្រាប់ដំណឹងមកដល់ប្រពន្ធ នាំគ្នាចុះទៅរាវរកក្នុងប្រឡាយទឹក ក៏ប្រទះឃើញសាកស.ពអណ្ដែតឡើងមក ទើបផ្អើលឆោឡោឡើង និងរាយការណ៍ជូនសមត្ថកិច្ចចុះអន្តរាគមន៍ភ្លាមៗតែម្ដង ។
ក្រោយពីទទួលបានដំណឹងសមត្ថកិច្ចបានចុះទៅអន្តរាគមន៍ដល់កន្លែងកើតហេតុ និងបានហៅអ្នកស្រុកជួយស្រង់យករថយន្តឡើងមកលើគោក ពិនិត្យស្ថានភាព រកឃើញថា ជនរងគ្រោះបានជិះរថយន្តធ្លាក់ចូលប្រឡាយលង់ទឹកស្លាប់ដោយខ្លួនឯង ទើបប្រគល់សាកសពទៅឲ្យក្រុមគ្រួសារ យកទៅធ្វើបុណ្យតាមប្រពៃណីតែម្ដង ៕
ចែករំលែកព័តមាននេះ