ទីក្រុងបាងកក៖ ករណីលោកថាក់ស៊ីនជួបសំណេះសំណាលជាមួយក្រុមអ្នកតស៊ូភូមាដែលប្រឆាំងនឹងរបបសឹករបស់លោកមីនអុងឡាំងកាលពីពេលថ្មីៗនេះធ្វើឡើងនៅក្នុងក្របខណ្ឌរាប់អានគ្នាជាឯកជនតែប៉ុណ្ណោះ។ មានន័យថាមិនមែនជាការទាក់ទងគ្នានៅក្នុងក្របខណ្ឌរដ្ឋាភិបាលថៃទេ និងមិនមែនជាគោលនយោបាយរបស់រដ្ឋាភិបាលថៃចំពោះប្រទេសភូមានោះដែរ។ ខាងលើនេះជាការបញ្ជាក់របស់រដ្ឋមន្ត្រីការបរទេសថ្មីរបស់ថៃលោកម៉ារីស សាំងងៀមពង្សា(Maris Sangiampongsa)។
លោកមិនប្រកែកទេករណីដែលលោកថាក់ស៊ីនពិតជាបានជួបអ្នកតំណាងចលនាតស៊ូភូមា។ ប៉ុន្តែជាគោលជំហររបស់រដ្ឋាភិបាលថៃ ថៃយល់ថាជម្លោះប្រដាប់អាវុធនេះជារឿងផ្ទៃក្នុងរបស់ភូមា។ ដូច្នេះ ថៃមិនត្រូវការចូលខ្លួនទៅពាក់ព័ន្ធទេ។ លោករដ្ឋមន្ត្រីរូបនេះថ្លែងបន្តទៀតថាមនុស្សគ្រប់គ្នាទទួលស្គាល់ថាលោកថាក់ស៊ីនជាបុគ្គលល្បី និងមានអ្នកស្គាល់គាត់ច្រើន។ អ្នកនៅប្រទេសភូមារហូតដល់ទៅសង្ឃឹមថាលោកថាក់ស៊ីនអាចនឹងចូលរួមចំណែកដោះស្រាយបញ្ហារបស់ភូមាថែមទៀតផង។
ប៉ុន្តែលោករដ្ឋមន្ត្រីសូមបញ្ជាក់ថាពួកតស៊ូនិយាយគ្នាជាមួយលោកថាក់ស៊ីនជារឿងផ្សេង។ ចំណែកគោលជំហររបស់រដ្ឋាភិបាលថៃជារឿងផ្សេង។ រដ្ឋាភិបាលថៃមិនពាក់ព័ន្ធនឹងរឿងនេះទេ។ សូមរំលឹកថាវិទ្យុវីអូអេ (VOA) ផ្សាយជាភាសាភូមាបានដកស្រង់ពាក្យសម្ដីរបស់អ្នកមានទំនាក់ទំនងជិតស្និទ្ធជាមួយលោកថាក់ស៊ីនមកផ្សាយកាលពីថ្ងៃចន្ទថាលោកថាក់ស៊ីនទើបតែជួបអ្នកតំណាងក្រុមសម្ព័ន្ធជាតិកាឈីន (Kachin) និងរដ្ឋាភិបាលបង្រួបបង្រួមជាតិ (ដែលគាំទ្រលោកស្រីអង់សានស៊ូជី)។
បើតាមការផ្សាយរបស់វីអូអេ, កិច្ចជំនួបនោះមិនមែនជួបគ្នានិយាយរឿងឯកជនធម្មតាទេ ប៉ុន្តែនិយាយពាក់ព័ន្ធនឹងការស្វែងរកដំណោះស្រាយដើម្បីបញ្ចប់ជម្លោះប្រដាប់អាវុធនៅប្រទេសភូមា។ ក្រោយកិច្ចជំនួបនោះមិនយូរប៉ុន្មាន ក៏មានកិច្ចជំនួបរវាងលោកថាក់ស៊ីន និងក្រុមចលនាតស៊ូនៅរដ្ឋសាន និងអ្នកតំណាងកងទ័ពសាន។ កិច្ចជំនួបក្រៅផ្លូវការនោះធ្វើឡើងបន្ទាប់ពីក្រុមប្រឆាំងវាយដណ្ដើមកាន់កាប់បានមួយរយៈពេលខ្លីនូវទីក្រុងមីយ៉ាវ៉ាឌីនៅជាប់នឹងព្រំដែនប្រទេសថៃតែម្ដង។ នេះជាទីក្រុងពាណិជ្ជកម្មដ៏សំខាន់ជាយុទ្ធសាស្ត្រដែលអាចរកប្រាក់ចំណូលឱ្យប្រទេសថៃនៅក្នុង១ថ្ងៃៗមិនតិចលានដុល្លារនោះទេ។
ដូច្នេះ ដើម្បីគូសបញ្ជាក់គោលជំហររបស់ខ្លួនឡើងវិញ រដ្ឋមន្ត្រីការបរទេសថៃសូមបញ្ជាក់ថាគោលនយោបាយការបរទេសរបស់ថៃនៅរក្សាទុកដដែល។ មានន័យថាអព្យាក្រឹត្យ- ឥតលម្អៀង ហើយចង់ឃើញប្រទេសភូមាមានសន្តិភាព ស្ថិរភាព និងការបង្រួបបង្រួមជាតិតាមរយៈការចរចាទ្វេភាគីរវាងប្រទេសភូមា និងប្រទេសសមាជិកអាស៊ានដទៃទៀត។ រដ្ឋមន្ត្រីរូបនេះយល់ថាបើសង្គ្រាមភូមានៅតែបន្តអូសបន្លាយរ៉ាំរ៉ៃដូច្នេះទៀត ប្រទេសថៃនឹងរងផលប៉ះពាល់ដោយផ្ទាល់ពីសង្គ្រាមនេះ។
លោកបង្ហើបឱ្យដឹងថាសព្វថ្ងៃនេះគេកំពុងតែខិតខំបញ្ចប់ជម្លោះនេះ។ គ្រាន់តែលោកមិនចង់ធ្វើអត្ថាធិប្បាយលម្អិតពេកទេ។ លោកម៉ារីសបានឡើងកាន់តំណែងជារដ្ឋមន្ត្រីការបរទេសជំនួសលោកផានព្រីដែលសម្រេចចិត្តលាលែងពីតំណែងដោយសារលោកអាក់អន់ចិត្តមិនបានទទួលតំណែងជាឧបនាយករដ្ឋមន្ត្រីនៅក្នុងការរុះរើគណៈរដ្ឋមន្ត្រីថ្មី។ រដ្ឋមន្ត្រីការបរទេសថៃថ្មីរូបនេះជាមនុស្សដែលធ្លាប់មានទំនាក់ទំនងយូរអង្វែងជាមួយលោកថាក់ស៊ីន ហើយក៏ជាអ្នកការទូតជើងចាស់ផងដែរ៕
ចែករំលែកព័តមាននេះ