ទីក្រុងយេរូសាឡឹម៖ នៅទីបំផុត ក្រុមហាម៉ាស់យល់ព្រមទទួលយកបទឈប់បាញ់ដែលស្នើឡើងដោយប្រទេសអេហ្ស៊ីប និងកាតាក្នុងនាមជាអ្នកសម្រុះសម្រួលជម្លោះ។ ទោះជាយ៉ាងណាក្ដី អ៊ីស្រាអែលមិនទាន់ទទួលសំណើដែលមិនឆ្លើយតបតាមការចង់បានរបស់ខ្លួនទេ ហើយអ៊ីស្រាអែលប្រកាសវាយលុកទ័ពជើងគោកចូលទីក្រុងរ៉ាហ្វា។ អ៊ីស្រាអែលថ្លែងថាខ្លួនមិនមែនបិទផ្លូវចរចាគ្នា ហើយចង់តែធ្វើសង្គ្រាមទេ។ ប៉ុន្តែខ្លួនកំពុងជាប់ដៃវាយក្រុមហាម៉ាស់សិនដើម្បីបោសសម្អាតពួកគេឱ្យអស់។
ថ្វីដ្បិតកិច្ចខិតខំផ្នែកការទូតលើកនេះមិនទាន់ទទួលបានជោគជ័យជាដុំកំភួន និងមិនទាន់សម្រេចបានផ្លែផ្កាគួរជាទីមោទនយ៉ាងណាក្ដី ប៉ុន្តែវាជាក្ដីសង្ឃឹមថាដំណោះស្រាយនៅតែមាន។ ឥឡូវនេះ ក្រុមហាម៉ាស់បានបោះដៃទៅរកកិច្ចព្រមព្រៀងនៃបទឈប់បាញ់ហើយនៅឡើយតែអ៊ីស្រាអែលបែរជាធ្វើព្រងើយៗទៅវិញ។ កាលពីល្ងាចមិញ អ៊ីស្រាអែលប្រកាសវាយលុកចូលទីក្រុងរ៉ាហ្វាខាងកើត។ រថក្រោះអ៊ីស្រាអែលក៏បើកចូលទីក្រុងនេះ។ ពេលខ្លះវាយលុកចូលជ្រៅជិតដល់ព្រំដែនអេហ្ស៊ីប។ អ៊ីស្រាអែលអំពាវនាវឲ្យជនស៊ីវិលប៉ាឡេស្ទីនចាកចេញពីតំបន់គ្រោះថ្នាក់ដើម្បីទៅតាំងទីលំនៅនៅក្នុងកន្លែងសុវត្ថិភាព។
បន្ទាប់ពីក្រុមហាម៉ាស់យល់ព្រមឈប់បាញ់ជាឯកតោភាគីមិនយូរប៉ុន្មាន អ៊ីស្រាអែលក៏វាយចូលទីក្រុងរ៉ាហ្វាតែម្ដង។ ថ្វីដ្បិតសំណើនេះមិនដូចការចង់បានរបស់ខ្លួន ប៉ុន្តែអ៊ីស្រាអែលមិនបោះបង់ចោលការចរចាគ្នាទេ។ មានន័យថាវាយប្រហារគ្នាផង និងចរចាគ្នាផង។ អ៊ីស្រាអែលនឹងបញ្ជូនគណៈប្រតិភូទៅអេហ្ស៊ីប។ ប្រទេសកាតាក៏បញ្ជូនគណៈប្រតិភូទៅអេហ្ស៊ីបផងដែរ។
លោកបៃដិនបាននិយាយទូរស័ព្ទជាមួយលោកណឺតាន់យ៉ាហ៊ូ និងបញ្ជាក់ឡើងវិញថាលោកនៅតែបារម្ភចំពោះយុទ្ធនាការវាយប្រហារទៅលើទីក្រុងរ៉ាហ្វា។ ក្រសួងការបរទេសអាមេរិកប្រាប់ថាខ្លួនកំពុងពិនិត្យមើលគោលជំហររបស់ក្រុមហាម៉ាស់ និងត្រៀមពិគ្រោះជាមួយប្រទេសជាដៃគូ។ គេដឹងថារដ្ឋមន្ត្រីការបរទេសអាមេរិកបានជំរុញឱ្យក្រុមហាម៉ាស់ទទួលយកកិច្ចព្រមព្រៀងមួយដែលគេមិនទាន់ដឹងថាតើជាកិច្ចព្រមព្រៀងដែលហាម៉ាស់ប្រកាសទទួលយកនេះ ឬក៏កិច្ចព្រមព្រៀងផ្សេង?
យោងតាមការបង្ហើបឱ្យដឹងពីប្រទេសអេហ្ស៊ីប, សំណើនោះអំពាវនាវឱ្យមានបទឈប់បាញ់ជាបណ្ដោះអាសន្នជាច្រើនដង។ នៅក្នុងសម័យអន្តរកាលនោះនឹងមានការដោះលែងចំណាប់ខ្មាំងបន្តិចម្ដងៗជាលក្ខណៈរំលស់។ ជាថ្នូរត្រឡប់មកវិញ អ៊ីស្រាអែលត្រូវយល់ព្រមដកទ័ពពីហ្កាហ្សា។ បន្ទាប់មក ភាគីទាំងពីរនឹងចរចាគ្នាបន្ថែមទៀតដើម្បីរក្សាភាពស្ងប់ស្ងាត់រយៈពេលយូរ។ ក្រុមហាម៉ាស់នឹងដោះលែងចំណាប់ខ្មាំងទាំងអស់។ អ៊ីស្រាអែលនឹងដកទ័ពថយកាន់តែឆ្ងាយពីតំបន់ហ្កាហ្សា។
ក្រុមហាម៉ាស់ទាមទារឱ្យអ៊ីស្រាអែលបញ្ឈប់ការវាយប្រហារ និងដកកងទ័ពទាំងអស់បើចង់ឃើញចំណាប់ខ្មាំងមានជីវិតត្រឡប់ទៅវិញ។ ប៉ុន្តែអ៊ីស្រាអែលមិនចង់បានបែបហ្នឹងទេ។ អ៊ីស្រាអែលចង់បានចំណាប់ខ្មាំងមកវិញ ហើយចង់បោសសម្អាតក្រុមហាម៉ាស់។ នៅក្នុងក្រសែភ្នែករបស់អ៊ីស្រាអែល ចំណាប់ខ្មាំង១៣០នាក់មិនអាចយកមកតថ្លៃជាមួយខ្លួនបានឡើយ។ អ៊ីស្រាអែលមិនទទួលយកការបបួលគ្នាចរចា និងដោះដូររបៀបនេះទេ, អ៊ីស្រាអែលចង់កម្ចាត់ក្រុមហាម៉ាស់ឱ្យដល់ឫសគល់។
លោកណឺតាន់យ៉ាហ៊ូកំពុងតែពិបាកសម្រេចចិត្ត។ នៅជ្រុងម្ខាង លោកកំពុងទទួលគំនាបពីក្រុមជ្រុលនិយមនៅក្នុងរដ្ឋាភិបាលចម្រុះជាមួយគ្នាដែលទាមទារឱ្យលោកវាយប្រហារទីក្រុងរ៉ាហ្វា។ បើលោកទទួលយកបទឈប់បាញ់ ពួកគេនឹងដើរចេញពីរដ្ឋាភិបាលចម្រុះ ទុកឱ្យរដ្ឋាភិបាលរលាយ ហើយលោកណឺតាន់យ៉ាហ៊ូអស់តំណែងនាយករដ្ឋមន្ត្រី។ ប៉ុន្តែនៅជ្រុងម្ខាងទៀត លោកក៏ទទួលរងសម្ពាធពីក្រុមគ្រួសារចំណាប់ខ្មាំងដែលចង់ឱ្យលោកទទួលយកកិច្ចព្រមព្រៀងជាមួយក្រុមហាម៉ាស់។
ពួកគេនៅតែសង្ឃឹមថាថ្ងៃណា១ចំណាប់ខ្មាំងនឹងវិលមកវិញ។ គ្រាន់តែថាអ៊ីស្រាអែលវាយចូលទីក្រុងរ៉ាហ្វាធ្វើឱ្យពួកគេបារម្ភឆាកជីវិតរបស់ចំណាប់ខ្មាំងកាន់តែខិតទៅរកមាត់ជ្រោះមរណៈ ឬអាចនិយាយបានថាស្ថិតនៅក្នុងភាពផុយស្រួយ។ ស្រួលមិនស្រួល ក្រុមហាម៉ាស់សំឡេះពួកគេចោល។ ឬមិនដូច្នេះទេ ពួកគេអាចនឹងស្លាប់នៅពេលប្រយុទ្ធគ្នា។ ឥឡូវនេះមិនដឹងធ្វើម៉េចទេ។ មានតែតាមយថាកម្មតែប៉ុណ្ណោះព្រោះលោកណឺតាន់យ៉ាហ៊ូនិយាយរួចហើយថាទាល់តែវាយចូលទីក្រុងរ៉ាហ្វាទើបអាចបោសសម្អាតក្រុមហាម៉ាស់។ អ៊ីស្រាអែលថាសម្បុកចុងក្រោយរបស់ហាម៉ាស់ និងក្រុមដទៃទៀតគឺនៅរ៉ាហ្វាហ្នឹងហើយ៕
ចែករំលែកព័តមាននេះ