សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានប្រកាសជាចំហរថា រាជរដ្ឋាភិបាលបានផ្តល់ទឹកប្រាក់រហូតដល់ទៅ៣០០លានដុល្លារ ដើម្បីដំណើរការគម្រោងនានាពាក់ព័ន្ធនឹងគម្រោងការបង្ការ និងការពារទឹកជំនន់កុំអោយលិចរាជធានីភ្នំពេញ ដែលជាមជ្ឈមណ្ឌលសេដ្ឋកិច្ចនយោបាយ ពាណិជ្ជកម្ម និងជាបេះដូងនៃប្រទេសកម្ពុជា ។
សម្តេចធិបតីបានបញ្ជាក់យ៉ាងច្បាស់តាមរយៈការថ្លែងសុន្ទកថា ដោយបើកចំហរពាក់ព័ន្ធនឹង ទឹក ប្រាក់ដ៏ច្រើននេះ នៅក្នុងអំឡុងពេលចូលរួមបិទសន្និបាតរបស់ក្រសួងធនធានទឹក និងឧតុនិយមកាលពីពេលថ្មីៗកន្លងទៅ ។
ពាក់ព័ន្ធនឹងគម្រោងទាំងនេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានឲ្យដឹងនៅពេលលោកដឹកនាំអ្នកជំនាញចុះពិនិត្យវឌ្ឍនភាពគម្រោងទាំងនេះពីរថ្ងៃជាប់ៗគ្នា ពោលគឺថ្ងៃទី៤ និងថ្ងៃទី៥ ខែឧសភា ថា គម្រោងនេះ កំពុងតែដំណើរការ ។
បើតាមការបង្ហើបរបស់លោករដ្ឋមន្ត្រីគម្រោងទាំងនេះ គឺមានពាក់ព័ន្ធនឹងគម្រោងមួយចំនួន នៅខេត្តដែលមានភូមិសាស្ត្រនៅជុំវិញរាជធានីភ្នំពេញ ដែលរួមមាន គឺខេត្តកំពង់ស្ពឺ និងខេត្តកណ្តាល និង តាកែវ ហើយគម្រោងសំខាន់ៗនៅខេត្តទាំងពីរនេះ បានសម្រេចបានប្រមាណជាលើសពី៦០ ភាគរយ ។
ពាក់ព័ន្ធនឹងគម្រោងនៅខេត្តកំពង់ស្ពឺ លោករដ្ឋមន្ត្រីបានឲ្យដឹងថា ជារៀងរាល់ឆ្នាំ នៅរដូវវស្សាបរិ មាណទឹកភ្លៀងដ៏ច្រើន បានហូរធ្លាក់ពីតំបន់ភ្នំឱរ៉ាល់ក្នុងខេត្តកំពង់ស្ពឺ និងពីតំបន់ភ្នំក្រវាញ តាមព្រែកនានាហូរចូលមកស្ទឹងព្រែកត្នោតធ្វើឱ្យបរិមាណទឹកស្ទឹងព្រែកត្នោតកើនឡើងពី១.៣០០ទៅ១.៧០០ម៉ែត្រគូបក្នុងមួយវិនាទី ខណៈសំណង់ដោះទឹកនៅកំពង់ទួលទឹកថ្លានៅផ្នែកខាងក្រោមអាចដោះទឹកបានប្រមាណ៨៥០ម៉ែត្រគូបក្នុងមួយវិនាទី រួមផ្សំកម្ពស់ទឹកនៅតាមអាងទន្លេមេគង្គ ទន្លេសាប និងទន្លេបាសាក់ហក់ឡើងខ្ពស់ និងបរិមាណទឹកដ៏ច្រើនពីតំបន់ផ្ទៃរងទឹកភ្លៀងនៅជុំវិញផង ជាហេតុធ្វើឱ្យមានការជន់លិចតំបន់ជុំវិញរាជធានីភ្នំពេញ និងតំបន់រណប និងផ្នែកខ្លះនៃខេត្តកណ្តាល។
លោករដ្ឋមន្ត្រីបានបញ្ជាក់បន្ថែមថា តបតាមការចង្អុលបង្ហាញប្រកបដោយយុទ្ធសាស្ត្រជាក់លាក់របស់សម្តេចធិបតី ដើម្បីដោះស្រាយបញ្ហាជន់លិចក្នុងអាងស្ទឹងនិងទន្លេ តាមរយៈការកំណត់តំបន់លិចទឹកជាប្រចាំ តំបន់លិចទឹកហើយ និងស្រកទៅវិញ និងតំបន់លិចទឹកដោយសារការអភិវឌ្ឍផ្សេងៗ ក្រសួងបានរៀបចំនូវផែនការគ្រប់គ្រងទឹកប្រើប្រាស់ទឹក និងបញ្ជាទឹក ព្រមទាំងអភិវឌ្ឍធ្វើទំនើបកម្មលើហេដ្ឋារចនាសម្ព័ន្ធដោះទឹកជំនន់ទឹកភ្លៀង និងបង្វែរទឹកចេញពីរាជធានីភ្នំពេញ ដើម្បីធានាបាននូវសន្តិសុខ និងសុវត្ថិភាពទឹកប្រកបដោយស័ក្តិសិទ្ធិភាពដល់រាជធានីភ្នំពេញ។
លោកបានបន្តថា គម្រោងពង្វាងទឹកនេះ មានការស្តារប្រឡាយចំនួន១០ខ្សែ ប្រវែងប្រមាណ២៦០គីឡូម៉ែត្រ និងមានការសាងសង់ស្ថានីយបូមទឹក ដើម្បីជាយុទ្ធសាស្ត្រក្នុងការដោះទឹកឱ្យបានឆាប់ធ្លាក់ចូលទៅក្នុងអាងទន្លេមេគង្គ ទន្លេសាប និងទន្លេបាសាក់ ហើយរហូតមកដល់ពេលនេះវឌ្ឍនភាពការងារសម្រេចបានប្រមាណ៦០%។
ដោយឡែក សម្រាប់គម្រោងនៅខេត្តកណ្តាល លោកបានចុះពិនិត្យវឌ្ឍនភាពការងារជីកស្តារប្រឡាយមេ៩៦ និងព្រែកគង់នៃគម្រោងដោះទឹក និងពង្វាងទឹកចេញពីរាជធានីភ្នំពេញ ក្នុងភូមិសាស្ត្រសង្កាត់កំពង់សំណាញ់ សង្កាត់រកាខ្ពស់ សង្កាត់ព្រែកហូរ ក្រុងតាខ្មៅខេត្តកណ្តាល។
លោករដ្ឋមន្ត្រីបានឲ្យដឹងថា ការងារជីកស្តារប្រឡាយមេ៩៦ និងព្រែកគង់ប្រវែង៣៤គីឡូម៉ែត្រ និងមានមុខកាត់ទទឹងពី៨០ទៅ១០០ម៉ែត្រនេះ ជាផ្នែកមួយនៃគម្រោងប្រព័ន្ធរំដោះទឹក និងពង្វាងទឹក ជំនន់ទឹកភ្លៀងសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ ក្រុងតាខ្មៅ និងតំបន់រណប ដើម្បីជួយរំដោះទឹកផ្នែកខាងលើព្រលានយន្តហោះថ្មី ដោយនាំទឹកចេញពីស្ទឹងព្រែកត្នោតត្រង់ម្តុំព្រែកហូរ និងតំបន់ X1 វាងព្រលានយន្តហោះចូលទៅបឹងជើងលោង ព្រែកអំបិល និងធ្លាក់ទៅសមុទ្រ ហើយគម្រោងនេះសម្រេចបាន៦៥ភាគរយហើយ ។
ចែករំលែកព័តមាននេះ