លោក ហេង រតនា អគ្គនាយកមជ្ឈមណ្ឌលកំចាត់មីនកម្ពុជាបានអះអាងថា ដំណើរការកសាងសារមន្ទីរបង្ហាញមរតកសង្គ្រាមនៅកម្ពុជាដែលមានឈ្មោះថា «សារមន្ទីរតេជោសន្តិភាពខេត្តសៀមរាប »បានកំពុងតែវឌ្ឍនភាពទៅមុខ ។
លោកបានឲ្យដឹងថា អាវុធអស់ប្រសិទ្ធភាពប្រើប្រាស់ដែលជាសំណល់នៃសង្គ្រាមស៊ីវិលនៅ
កម្ពុជាមួយចំនួនបានកំពុងតែត្រូវយកមករៀបចំក្នុងសារមន្ទីរតេជោសន្តិភាព ដើម្បីដាក់បង្ហាញមនុស្សជំនាន់ក្រោយៗបានស្វែងយល់រំលឹកពីរសជាតិនៃសង្គ្រាមផង និងដើម្បីពង្រឹងស្មារតីចូលរួមគោរពស្រលាញ់ និងការពារសន្តិភាពដែលរកបានមកវិញដោយលំបាកបំផុតផង ។
សារមន្ទីរនេះ ត្រូវបានគេដឹងថា បានកំពុងតែសាងសង់ក្រោមជំនួយដោយរដ្ឋាភិបាលជប៉ុន ដែលមានតម្លៃ ២.៤៥២លានយ៉េន ស្មើនិងប្រមាណ១៧លានដុល្លារ នៅក្នុងគម្រោងរួមជាមួយនឹងការសាងសង់ជាអគារហ្វឹកហ្វឺនសកម្មភាពបោសសំអាតមីនផងដែរ ។
សារមន្ទីរមួយនេះ ត្រូវសាងសង់ឡើងនៅលើផ្ទៃដី១២ហិកតា ស្ថិតឃុំត្រពាំងធំ ស្រុកបាគង ខេត្តសៀមរាប ក្បែរផ្លូវចូលទៅអាកាសយានដ្ឋានអន្តរជាតិសៀមរាបអង្គរថ្មី និងផ្លូវជាតិលេខ៦A ។
មកដល់ពេលនេះ ទោះបីជាកម្ពុជាបានទទួលសន្តិភាពអស់រយៈពេល២៦ឆ្នាំមកក៏ពិតមែន ប៉ុន្តែសំណល់នៃសង្គ្រាមស៊ីវិលមានមីន គ្រាប់មិនទាន់ផ្ទុះ និងគ្រាប់បែកបន្សល់ទុកដោយអន្តរគមន៍យោធាកងទ័ពបរទេសជាពិសេសគឺសហរដ្ឋអាមេរិកនៅឥណ្ឌូចិន នៅតែបានរកឃើញ និងសម្លាប់ជីវិត ក៏ដូចជាធ្វើឲ្យរបូសពលរដ្ឋកម្ពុជាជាបន្តបន្ទាប់ ។
ចែករំលែកព័តមាននេះ