ទីក្រុងគែ៖ អ៊ីស្រាអែលបន្តវាយប្រហារតំបន់ហ្កាហ្សាយ៉ាងខ្លាំងក្លាទន្ទឹមនឹងការចរចាក៏កំពុងផុលផុសផងដែរនៅទីក្រុងគែប្រទេសអេហ្ស៊ីបក្រោមការសម្របសម្រួលពីប្រទេសអេហ្ស៊ីប និងកាតា។ ចរចាបានត្រឹមតែចរចាតែប៉ុណ្ណោះ។ ប៉ុន្តែមិនទាន់សម្រេចបានសាច់ការជាដុំកំភួននៅឡើយទេ។ ក្រុមហាម៉ាស់ដាក់លក្ខខណ្ឌមួយ «បើចង់ឱ្យខ្លួនចុះកិច្ចព្រមព្រៀងលុះត្រាតែអ៊ីស្រាអែលបញ្ចប់សង្គ្រាមទាំងស្រុងនៅតំបន់ហ្កាហ្សា»។ នេះបើយោងតាមមន្ត្រីប៉ាឡេស្ទីនដែលចូលរួមកិច្ចចរចា។
យោងតាមមន្ត្រីប៉ាឡេស្ទីនម្នាក់, ក្រុមហាម៉ាស់តាំងចិត្តថារាល់កិច្ចព្រមព្រៀងគ្នាណាមួយអាចធ្វើទៅបានលុះត្រាតែមានអ្វីដោះដូរគ្នា។ កិច្ចព្រមព្រៀងលើកនេះត្រូវតែបញ្ចប់សង្គ្រាម។ អ៊ីស្រាអែលត្រូវតែដកកងទ័ពពីតំបន់ហ្កាហ្សា។ ប៉ុន្តែអ៊ីស្រាអែលអត់ដែលបាននិយាយថាខ្លួននឹងដកកងទ័ពទាល់តែសោះ។ អ៊ីស្រាអែលទាមទារឱ្យហាម៉ាស់ដោះលែងចំណាប់ខ្មាំង។ ទោះបីដោះលែងមិនបានទាំងអស់ក៏ត្រូវដោះលែងមួយចំនួនដែរនៅក្នុងចំណាប់ខ្មាំងនៅសល់១៣០នាក់ទៀត។
មន្ត្រីរដ្ឋាភិបាលអ៊ីស្រាអែលដែលចូលរួមកិច្ចប្រជុំឱ្យសញ្ញាថាខ្លួននឹងបន្តយុទ្ធនាការបោសសម្អាតក្រុមហាម៉ាស់រហូតដល់អស់ទាំងស្រុង។ មន្ត្រីប៉ាឡេស្ទីនម្នាក់ទៀតដែលស្នើសុំមិនបញ្ចេញឈ្មោះប្រាប់ថាការចរចាគ្នានេះជួបប្រទះនឹងបញ្ហាជាច្រើនព្រោះអ៊ីស្រាអែលមិនគាំទ្របទឈប់បាញ់ទេ។ ទោះជាមិនទាន់សម្រេចបានផ្លែផ្កាអ្វីក៏ដោយ ក្រុមហាម៉ាស់រក្សាទុកអ្នកចរចារបស់ខ្លួននៅទីក្រុងគែដដែលក្រែងលោមានការវិវត្តថ្មី។ ហាម៉ាស់សង្ឃឹមថាអ៊ីស្រាអែលអាចនឹងដូរគោលជំហររបស់ខ្លួន។
ចរចាគ្នាបណ្ដើរ អ៊ីស្រាអែលឆ្លៀតវាយប្រហារបណ្ដើរទៅលើតំបន់ហ្កាហ្សាដោយប្រើប្រាស់យន្តហោះ និងរថក្រោះបណ្ដាលឱ្យមនុស្សស្លាប់ និងរបួសមួយចំនួន។ សង្គ្រាមរយៈពេលជាងកន្លះឆ្នាំនេះបានឆក់យកជីវិតជនជាតិប៉ាឡេស្ទីនជាង៣៤៦០០ម៉ឺននាក់ និងរបួសជាង៧៧០០០នាក់។ កាតា និងអេហ្ស៊ីបកំពុងជួយសម្រុះសម្រួលការចរចា ខណៈដែលទីក្រុងវ៉ាស៊ីនតោន,ក្រុមបស្ចិមប្រទេស និងអ៊ីស្រាអែលចាត់ទុកហាម៉ាស់ជាអង្គការភេរវកម្ម និងជំរុញឱ្យហាម៉ាស់ទទួលយកកិច្ចព្រមព្រៀង។
អ៊ីស្រាអែលឱ្យតម្រុយថាបើហាម៉ាស់យល់ព្រមដោះលែងចំណាប់ខ្មាំងមិនបាច់ច្រើនពេកទេត្រឹមតែ២០ទៅ៣៣នាក់ អ៊ីស្រាអែលយល់ព្រមដោះលែងអ្នកទោសប៉ាឡេស្ទីនដែលកំពុងជាប់ឃុំនៅអ៊ីស្រាអែលរាប់រយនាក់ ហើយយល់ព្រមផ្អាកវាយប្រហារគ្នាពីរបីអាទិត្យ។ ប៉ុន្តែហាម៉ាស់មិនចង់បានបែបនេះទេ។ បានការអីឈប់បាញ់គ្នាត្រឹមតែ១ភ្លែត? ហាម៉ាស់ចង់ឈប់បាញ់គ្នាជារៀងរហូត។ មើលទៅហាម៉ាស់ហាក់លែងចង់បាញ់គ្នាទៀតហើយនៅក្នុងសង្គ្រាមដែលខ្លួនជាអ្នកចាប់ផ្ដើមមុន។
បើហាម៉ាស់ដោះលែងម្ភៃសាមសិបនាក់តាមការស្នើសុំរបស់អ៊ីស្រាអែលមានន័យថានៅសល់ចំណាប់ខ្មាំង១០០នាក់ទៀត។ ចំណាប់ខ្មាំងខ្លះបានស្លាប់ហើយ។ ប្រភពដែលស្នើសុំមិនបញ្ចេញឈ្មោះយល់ថាបើអ៊ីស្រាអែលចង់បានបែបហ្នឹងលុះត្រាតែចរចាគ្នានៅក្នុងកិច្ចព្រមព្រៀងដាច់ដោយឡែក១ទៀត។ អ៊ីស្រាអែលកំពុងទទួលសម្ពាធយ៉ាងខ្លាំង។ មនុស្សហែបាតុកម្មកាន់តែខ្លាំងក្លាដើម្បីទាមទារឱ្យលោកណឺតាន់យ៉ាហ៊ូទទួលយកបទឈប់បាញ់ ហើយនាំយកចំណាប់ខ្មាំងត្រឡប់មកផ្ទះវិញ៕
ចែករំលែកព័តមាននេះ