ទីក្រុងបាងកក៖ ថ្មីៗនេះ ក្រសួងអប់រំថៃទើបតែចេញសេចក្ដីណែនាំមួយជម្រាបទៅគ្រឹះស្ថានអប់រំគ្រប់ទម្រង់ទាំងអស់ទាំងសាលារៀន និងសាកលវិទ្យាល័យដែលស្ថិតនៅក្រោមចំណុះក្រសួងសូមមេត្តាសម្របសម្រួលកុំសូវរឹតបន្តឹងដាច់ខាតខ្លាំងពេកចំពោះការតម្រូវឱ្យសិស្ស និងនិស្សិតស្លៀកពាក់ឯកសណ្ឋាន។ ចំណាត់ការនេះធ្វើឡើងដើម្បីជួយសម្រួលជីវភាពរបស់ឪពុក-ម្ដាយ ឬអាណាព្យាបាលរបស់សិស្ស-និស្សិតដែលគ្មានលទ្ធភាពគ្រប់គ្រាន់ដើម្បីរ៉ាប់រងលើថ្លៃចំណាយ។
សេចក្ដីណែនាំដែលចុះហត្ថលេខាដោយរដ្ឋមន្ត្រីក្រសួងអប់រំថៃ លោកផឺមភូន ឈីតឆុប (Permpoon Chidchob) បានស្នើសុំឱ្យគ្រឹះស្ថានអប់រំមេត្តាពិចារណតាមការគួរនៅក្នុងបញ្ហាឯកសណ្ឋានដើម្បីជួយសម្រួលឱ្យសិស្ស-និស្សិតស្លៀកពាក់ត្រឹមឯកសណ្ឋានក៏បាន។ ចំពោះស្បែកជើងពាក់ស្បែកជើងធម្មតាក៏បាន។ សំខាន់ឱ្យតែមើលទៅឃើញថាអាចទទួលយកបាន។
លោករដ្ឋមន្ត្រីបានស្នើសុំឱ្យសាលា និងសាកលវិទ្យាល័យធ្វើរបាយការណ៍ជូនទៅក្រសួងដើម្បីចង់ដឹងថាតើការស្លៀកពាក់ឯកសណ្ឋានអាចអនុវត្តបានកម្រិតណា? និងថាតើសិស្ស-និស្សិតដែលត្រូវការការអនុគ្រោះលើបញ្ហាឯកសណ្ឋានមានកម្រិតណា? ក្រសួងបញ្ជាក់ថាសេចក្ដីណែនាំនេះមិនមែនលើកទឹកចិត្តឱ្យសិស្ស-និស្សិតជិះសេះលែងដៃ ឥតវិន័យ និងសណ្ដាប់ធ្នាប់ទេ។ ក្រសួងចង់ផ្ដោតសំខាន់ទៅលើការធ្វើយ៉ាងណាបង្កបរិយាកាសល្អ និងរីករាយនៅក្នុងគ្រឹះស្ថានសិក្សា។
គោលនយោបាយនេះត្រូវក្រសួងដាក់ចេញតាំងពីខែកញ្ញា ឆ្នាំ២០២៣ និងមានគោលដៅបន្ធូរបន្ថយបន្ទុករបស់លោកគ្រូ-អ្នកគ្រូ, បុគ្គលិកផ្នែកអប់រំ, សិស្ស-និស្សិត និងឪពុកម្ដាយរបស់ពួកគេ។ ទាំងនេះធ្វើឡើងដើម្បីធ្វើឱ្យគុណភាពអប់រំកាន់តែល្អប្រសើរ។ លោករដ្ឋមន្ត្រីថ្លែងថាសេចក្ដីណែនាំរបស់ក្រសួងមានគោលដៅកាត់បន្ថយបន្ទុកផ្នែកថវិកាដែលឪពុក-ម្ដាយ ឬអាណាព្យាបាលត្រូវចំណាយលើការទិញខោអាវឯកសណ្ឋាន និងស្បែកជើងដើម្បីឱ្យកូនរបស់ខ្លួនចូលរៀននៅឆមាសថ្មី។
លោករដ្ឋមន្ត្រីរូបនេះក្រៅពីមានជំនាញខាងវិស័យអប់រំ លោកក៏យល់ដឹងអំពីវិស័យសេដ្ឋកិច្ច និងស្ថានភាពគ្រួសារផងដែរ។ លោកថ្លែងថាដោយយោងទៅលើស្ថានភាពសេដ្ឋកិច្ចសព្វថ្ងៃនេះឃើញថាប្រជាជនមានជីវភាពខ្វះខាត ប្រាក់ចំណូលធ្លាក់ចុះ។ ដូច្នេះ ពួកគេមិនសូវមានលទ្ធភាពរ៉ាប់រងទៅលើថ្លៃចំណាយទេ។ និយាយនេះសំដៅលើគ្រួសារជនជាតិថៃភាគច្រើន។
សាលារៀននៅប្រទេសថៃចាប់ផ្ដើមចូលរៀនឆមាសថ្មីកាលពីថ្ងៃព្រហស្បតិ៍សប្ដាហ៍នេះ។ លោករដ្ឋមន្ត្រីថ្លែងបន្តទៀតថាក្រសួងផ្ដល់សិទ្ធិជូនទៅគ្រឹះស្ថានអប់រំដែលចំណុះឱ្យក្រសួងដើម្បីពិចារណាទៅលើការបន្ធូរបន្ថយ ឬអនុគ្រោះខ្លះៗចំពោះអ្នកដែលគ្មានលទ្ធភាពបំពេញទៅតាមតម្រូវការរបស់សាលាដែលចង់ឱ្យសិស្សស្លៀកពាក់ខោអាវ និងស្បែកជើងឯកសណ្ឋាន។
ប៉ុន្តែលោកសូមបញ្ជាក់ថាបញ្ហានេះអាស្រ័យទៅលើគណៈគ្រប់គ្រងសាលានីមួយៗជាអ្នកសម្រេច។ លុះត្រាតែពួកគេគាំទ្រសេចក្ដីណែនាំរបស់ក្រសួងអប់រំដែរ។ មានន័យថាបើពួកគេមិនយល់ព្រមធ្វើតាមទេ ដាច់ខាតត្រូវតែដាក់កំហិតឱ្យសិស្សស្លៀកពាក់ឯកសណ្ឋាន១០០% ហ្នឹងស្រេចតែលើការសម្រេចរបស់ពួកគេទៅចុះ។ មែនទែនទៅ សេចក្ដីណែនាំរបស់ក្រសួងមិនមែនជាការបង្គាប់បញ្ជា ឬជាការសម្រេចចិត្តជំនួសទេ។ ប៉ុន្តែជាអនុសាសន៍សម្រាប់ពិចារណាតែប៉ុណ្ណោះ៕
ចែករំលែកព័តមាននេះ