នៅក្នុងខណៈពេលដែលទៅណាមកណានៅសង្គមខ្មែរឧស្សាហ៍ឃើញមនុស្សក្បាលត្រងោលជាងពីមុនជាងកាត់សក់ម្នាក់បានអះអាងថា វាគឺជាម៉ូដែលសក់ ដែលមានទំនោរកើនឡើងជាងពីមុន ។ ជាងកាត់សក់ម្នាក់ ដែលសុំមិនបញ្ចេញអត្តសញ្ញាណបានប្រាប់កោះសន្តិភាពថា ពីមុនពលរដ្ឋខ្មែរមានភាពអាម៉ាស់ នៅពេលដែលខ្លួនមានសភាពទំពែក ជាពិសេស គឺត្រងោល…
នៅក្នុងខណៈពេលដែលទៅណាមកណានៅសង្គមខ្មែរឧស្សាហ៍ឃើញមនុស្សក្បាលត្រងោលជាងពីមុនជាងកាត់សក់ម្នាក់បានអះអាងថា វាគឺជាម៉ូដែលសក់ ដែលមានទំនោរកើនឡើងជាងពីមុន ។
ជាងកាត់សក់ម្នាក់ ដែលសុំមិនបញ្ចេញអត្តសញ្ញាណបានប្រាប់កោះសន្តិភាពថា ពីមុនពលរដ្ឋខ្មែរមានភាពអាម៉ាស់ នៅពេលដែលខ្លួនមានសភាពទំពែក ជាពិសេស គឺត្រងោល ។ ប៉ុន្តែបច្ចុប្បន្នមានអ្នកឧស្សាហ៍មករកជាងឲ្យកោរត្រងោលអោយណាស់ ។
បុរសជាជាងកាត់សក់ ដែលមានអាយុ៣៤ឆ្នាំ រូបនេះបានបញ្ជាក់ថា «ខ្ញុំឧស្សាហ៍ជួបណាស់ ហើយអ្នកមកកាត់ គឺមានទាំងចាស់ទាំងក្មេង » ។ លោកបានបន្តទៀតថា នៅក្នុងចំណោមអ្នកដែលពេញនិយមកោរត្រងោលបែបនេះ គឺតែងតែនិយាយលេងសើចថា កោរត្រងោលស្រួលមិនចាំបាច់កក់សក់ ឬសិតអីទេ ដឹងតែងូតទឹកហើយជូតខ្លួនស្លៀកពាក់ស្រួលបំផុត ។
ជាសេចក្តីពិត នៅក្នុងសង្គមបច្ចុប្បន្ននេះ មនុស្សដែលតែងតែកោរត្រងោលនេះគឺមានសឹងតែគ្រប់មជ្ឈដ្ឋានទាំងអ្នកនយោបាយ សិល្បៈ ហើយក៏មានជួរមន្ត្រីរដ្ឋាភិបាលជាន់ខ្ពស់មួយចំនួនដែរ ខណៈដែលយុវវ័យខ្លះក៏ចូលចិត្តដែរ ។
លោក ទេព សុផាន ជាប្រជាពលរដ្ឋមួយរូបបានឲ្យដឹងថា អ្នកដែលកោរសក់ ភាគច្រើនគេដឹង ឬសម្គាល់ថា គេមានទុក្ខ ដោយមានសាច់ញាតិណាម្នាក់ទទួលមរណៈភាព ហើយការកោរនេះ គឺដើម្បីបញ្ជាក់អំពីការកាន់ទុក្ខ ហើយអ្នកខ្លះទៀតគាត់អាចមានបញ្ហាសុខភាពដោយសារ ត្រូវចាក់គីមីព្យាបាលជំងឺបណ្តាលឲ្យជ្រុះសក់ ប៉ុន្តែសម័យនេះអ្នកខ្លះមិនដូច្នេះទេ ។ លោកបានបញ្ជាក់ថា «ឥឡូវឃើញគេកោរសក់ តិចគិតបែបនោះទៀត គឺអាចផ្ទុយស្រឡះពីព្រោះមនុស្សជាច្រើនចូលចិត្តបែបនេះ» ។
បើតាមសេចក្តីរាយការណ៍របស់សារព័ត៌មានបរទេសក៏បានឲ្យដឹងដែរថា ក្បាលត្រងោលជាមូលដែលសក់ពេញនិយមមួយ ហើយមនុស្សជាច្រើនកំពុងតែពេញនិយមរហូតដល់អ្នកខ្លះបានគិតការដែលខ្លួនជ្រើសរើសនូវម៉ូដែលសក់បែបនេះ គឺជាការពង្រឹងនូវភាពជឿជាក់ និងភាពប៉ិនប្រសប់ទៅវិញ ។
តាមសេចក្តីរាយការណ៍នោះ បានឲ្យដឹងថា ត្រងោលត្រូវបានគេចាត់ទុកថា ល្អឬអាក្រក់ គឺអាស្រ័យលើចំណង់ចំណូលចិត្តផ្ទាល់ខ្លួន និងបទដ្ឋានវប្បធម៌ ។ មនុស្សមួយចំនួនចាត់ទុកការរក្សាក្បាលត្រងោលថា ជាសញ្ញានៃភាពចាស់ ឬយល់ឃើញថា វាអវិជ្ជមានដោយសារតែស្តង់ដារសោភ័ណភាពសង្គមដែលតែងតែផ្តល់អាទិភាពដល់សក់ ។
ទោះជាយ៉ាងណាក៏ដោយ អ្នកផ្សេងទៀតជាច្រើនបានរកឃើញថា ក្បាលទំពែក មានភាពទាក់ទាញ ហើយថែមទាំងភ្ជាប់វាជាមួយនឹងគុណសម្បត្តិដូចជា ទំនុកចិត្ត និងភាពជាបុរសទៅវិញ ៕ ដោយៈ សា ផាន់
ចែករំលែកព័តមាននេះ