អាកាសធាតុក្តៅ និងគ្មានភ្លៀងកក់ខែ នៅក្នុងឆ្នាំនេះ បានធ្វើឲ្យទុរេនធ្លាក់ទាំងទិន្នផល និងធ្លាក់ទាំងតម្លៃ ។ លោកស្រី ប៉ែន ឃីវ ជាអ្នកប្រមូលទិញទុរេនកំពតបានអោយដឹងថា…
អាកាសធាតុក្តៅ និងគ្មានភ្លៀងកក់ខែ នៅក្នុងឆ្នាំនេះ បានធ្វើឲ្យទុរេនធ្លាក់ទាំងទិន្នផល និងធ្លាក់ទាំងតម្លៃ ។ លោកស្រី ប៉ែន ឃីវ ជាអ្នកប្រមូលទិញទុរេនកំពតបានអោយដឹងថា ការដាំដុះដំណាំទុរេន កំពតរបស់ប្រជាកសិករនៅឆ្នាំនេះហាក់ជួបប្រទះនូវបញ្ហាប្រឈមជាច្រើនដូចជា ការកើតមាននូវជំងឺផ្សេងៗដែលត្រូវការថែទាំឱ្យបានដិតដល់ និងជាពិសេស គឺផលប៉ះពាល់ដោយសារការគំរាមកំហែងពីបាតុភូតអែលនីណូ បានធ្វើឱ្យអាកាសធាតុក្តៅខ្លាំង និងខ្វះខាតទឹកសម្រាប់ស្រោចស្រពដែលធ្វើឱ្យផ្លែទុរេនមិនអាចរីកធំធាត់បានល្អ និងមានការប្រេះ ឬជ្រុះ មុនពេលប្រមូលផលជាដើម ។
បើតាមអ្នកជំនាញរូបនេះបញ្ហាទាំងនេះ កំពុងជះឥទ្ធិពលដល់គ្រប់ប្រជាកសិករដាំទុរេនទាំងអស់នៅក្នុងខេត្តកំពត ហើយវានឹងអាចទាញទម្លាក់ទិន្នផលទុរេនរបស់ពួកគាត់នៅឆ្នាំនេះឱ្យធ្លាក់ចុះយ៉ាងគំហុកផងដែរ បើទោះបីជាមានការបង្កើនការដាំដុះបន្ថែមយ៉ាងណាក្តី ។
លោកស្រី ប៉ែន ឃីវ បានអោយកម្មវិធីលុយនៃសារព័ត៌មានកោះសន្តិភាពដឹងថា «ទិន្និផល ទុរេនឆ្នាំហ្នឹងទទួលផលបានតែ៣០ភាគរយ ទៅ៤០ភាគរយទេធៀបនឹងឆ្នាំមុន ។ បើយើងនិយាយទៅបានតិចមែនទែន ព្រោះអីអាកាសធាតុក្តៅពេក» ។ លោកស្រី ប៉ែន ឃីវ បានឱ្យដឹងដែរថា មកទល់ពេលនេះដំណាំទុរេនរបស់ប្រជាកសិករនៅខេត្តកំពត បានប្រមូលផលជាបណ្តើរៗហើយ ប៉ុន្តែសម្រាប់តម្លៃទុរេនកំពត នៅដើមរដូវ ដែលតែងតែមានតម្លៃខ្ពស់នាពេលកន្លងមកនោះ នៅឆ្នាំនេះហាក់មានការធ្លាក់ចុះគួរឱ្យកត់សម្គាល់ ពោល គឺបច្ចុប្បន្នអាចលក់បានក្នុងរង្វង់ជាង២ម៉ីនរៀលក្នុង១គីឡូក្រាមតែប៉ុណ្ណោះទៅតាមគុណភាព និងប្រភេទនីមួយៗ ខណៈកាលពីឆ្នាំមុន គឺអាចលក់បានក្នុងតម្លៃជិត៤ម៉ឺនរៀលក្នុង១គីឡូក្រាមឯណោះ ។ ការធ្លាក់ថ្លៃនេះត្រូវបានអ្នកជំនាញរូបនេះវាយតម្លៃថា គឺដោយសារតែឥទ្ធិពលនៃទុរេននាំចូលពីខាងក្រៅច្រើនដែលមានតម្លៃទាបជាងទុរេនក្នុងស្រុក ហើយទុរេនក្នុងស្រុកធ្លាក់ចុះទិន្នផល ។
លោកស្រី ប៉ែន ឃីវ បន្តថា «ឆ្នាំមុនៗឪខាក់ចេញដំបូង១គីឡូក្រាម ៣ម៉ីន៥ពាន់រៀល ម៉ាន់ថងចេញដំបូងគឺ៣ម៉ីន៧ពាន់រៀល ។ ប៉ុន្តែឆ្នាំមុនៗយើងទទួលផលបានលឿនជាងឆ្នាំនេះ ។ ឆ្នាំនេះដោយសារវាក្តៅពេកទទួលផលបានយឺត ហើយតម្លៃធ្លាក់ចុះដោយសារ បើយើងអត់លក់ចេញអ្នកចម្ការគាត់ទម្លាក់តម្លៃតាមទីផ្សារ ។ ទីផ្សារវាមានទុរេនច្រើនណាស់ ប៉ុន្តែអ្នកដែលស្គាល់ទុរេនពិតមានតិច អ៊ីចឹងបើអ្នកចម្ការ គាត់អត់ប្រមូលលក់ក្នុងតម្លៃដែលថា សមរម្យ វ៉ៃចេញទេ គឺអ្នកចម្ការយំទឹកភ្នែកហើយ» ។
មិនខុសគ្នានោះទេ កញ្ញា ប៉ូ លៀងមួយ ជាអ្នកដាំដំណាំសាម៉ាវ បានអះអាងថា ការដាំដុះដំណាំសាវម៉ាវរបស់ប្រជាកសិករនៅឆ្នាំនេះ ពិតជាបានជួបប្រទះនូវបញ្ហាប្រឈមយ៉ាងធ្ងន់ធ្ងរប្រាកដមែន ដោយតម្រូវចាយដើមទុនច្រើនលើការស្រោចស្រព និងជីកសិកម្ម ។
សូមបញ្ជាក់ថា តាមរបាយការណ៍ពីមន្ទីរកសិកម្មខេត្តកំពត បានបង្ហាញថា គិតត្រឹមឆ្នាំ២០២៣ ផ្ទៃដីដាំដុះទុរេននៅក្នុងខេត្តកំពត មានចំនួនប្រមាណជាង១ពាន់៧រយហិចតាដែលជាមធ្យមអាចប្រមូលផលបានប្រមាណ១៥តោនក្នុងមួយហិកតា ៕
ចែករំលែកព័តមាននេះ