រាជធានីភ្នំពេញ ៖ ផ្ទះស្តុកក្រណាត់មួយកន្លែងត្រូវបានអគ្គិភ័យឆាបឆេះ ផ្សែងហុយខ្មួលខ្មាញ់តែ សំណាងល្អប្រជាពលរដ្ឋក្បែរខាង រួមទាំងរថយន្តពន្លត់អគ្គិភ័យនាំគ្នាជួយពន្លត់ទាន់ បណ្តាលអោយរងការខូចខាតមួយចំនួនតែប៉ុណ្ណោះ ។
ហេតុការណ៍នេះបង្កអោយមានការភ្ញាក់ផ្អើល កាលពីវេលាម៉ោងប្រមាណ៦និង៣០នាទីព្រឹក ថ្ងៃទី០៥ ខែឧសភា ឆ្នាំ២០២៤ នៅក្នុងភូមិទំនប់១ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
តាមសាក្សីបានអោយដឹងថា នៅព្រឹកថ្ងៃកើតហេតុគេឃើញភ្លើងបានឆាបឆេះផ្សែងហុយទ្រលោមចេញពីផ្ទះស្តុកក្រណាត់បង្កអោយមានការភ្ញាក់ផ្អើលយ៉ាងខ្លាំង ។ ភ្លាមៗប្រជាពលរដ្ឋក្បែរខាងបាននាំគ្នាយកទុយោទឹក និងបំពង់ពន្លត់អគ្គិភ័យបាញ់ពន្លត់ ព្រមទាំងទាក់ទងរថយន្តពន្លត់អគ្កិភ័យទៅអន្តរាគមន៍ ។
តាមម្ចាស់ផ្ទះ បានអោយដឹងថា នៅព្រឹកនោះ បន្ទាប់ពីភ្ញាក់ពីដំណេកគាត់បានដោតខ្សែភ្លើងដាំទឹក រួចក៏បានចេញមកបោកសំអាត និងជជែកគ្នាលេងនៅក្រៅផ្ទះស្រាប់តែឃើញឆាបឆេះសន្ធោសន្ធៅ និងផ្សែងហុយទ្រលោមចេញពីក្នុងផ្ទះ ហើយបង្កអោយមានការភ្ញាក់ផ្អើលដល់អ្នកភូមិនាំគ្នាជួយជួយពន្លត់ និងជញ្ជូនអីវ៉ាន់ចេញ ។
តាមម្ចាស់ផ្ទះរូបនោះ មានការសង្ស័យថា អគ្គិភ័យនេះបណ្តាលមកពីឆ្លងចរន្តអគ្គិសនី (ដាំទឹកទុកចោល )ហើយឆេះរាលដាលទៅកំណាត់ក្លាយជាអគ្គិភ័យតែម្តង ។
តាមនគរបាលបានអោយដឹងថា នៅក្នុងហេតុការណ៍នេះ រថយន្តពន្លត់អគ្គិភ័យចំនួន៣គ្រឿង បានទៅអន្តរាគមន៍បាញ់ពន្លត់ហើយភ្លើងបានរលត់ទៅវិញ ពុំបណ្តាលអោយឆេះរាលដាលទៅលំនៅឋាននៅក្បែរខាងឡើយ ។ អគ្គិភ័យនេះ បណ្តាលឲ្យក្រណាត់ រួម និងសម្ភារៈមួយ ចំនួន បានរងការខូចខាត ។ នេះចាត់ទុកជាសំណាង ដែលរថយន្ត ទៅអន្តរាគមន៍ទាន់ពេល ៕
ចែករំលែកព័តមាននេះ