ខេត្តបាត់ដំបង ៖ ប្រជាពលរដ្ឋដែលប្រើប្រាស់ទឹក «អូរត្រែង» បានភ្ញាក់ផ្អើលយ៉ាងខ្លាំង កាលពីរសៀលថ្ងៃទី០៣ ឧសភា ក្រោយពីគេបានប្រទះឃើញត្រីពុលទឹកងាប់រាយប៉ាយពេញដងអូរ រីឯទឹកអូរក៏មានក្លឹនស្អុយដែលមិនអាចប្រើប្រាស់បាន ដែលគេសង្ស័យថា…
ខេត្តបាត់ដំបង ៖ ប្រជាពលរដ្ឋដែលប្រើប្រាស់ទឹក «អូរត្រែង» បានភ្ញាក់ផ្អើលយ៉ាងខ្លាំង កាលពីរសៀលថ្ងៃទី០៣ ឧសភា ក្រោយពីគេបានប្រទះឃើញត្រីពុលទឹកងាប់រាយប៉ាយពេញដងអូរ រីឯទឹកអូរក៏មានក្លឹនស្អុយដែលមិនអាចប្រើប្រាស់បាន ដែលគេសង្ស័យថា ទឹកសម្អុយដែលមានសារធាតុពុលនោះ ត្រូវគេបង្ហូរចេញពីក្នុងរោងចក្រកែច្នៃផ្លែស្វាយមួយកន្លែង នៅក្បែរមាត់មាត់អូរនោះ នៅចំណុចភូមិស្វាយសរ ឃុំត្រែង ស្រុករតនមណ្ឌល ហើយគេបានរាយការណ៍ប្រាប់អាជ្ញាធរភ្លាមៗដែរ។
អ្នកភូមិបាននិយាយថា រយៈពេល៣ ទៅ៤ថ្ងៃមុននេះ គេឃើញទឹកអូរខាងក្រោយភូមិប៉ែកខាងក្រោមនៃរោងចក្រកែច្នៃផ្លែស្វាយ មានសភាពចម្លែកខុសប្រក្រតី ឡើងពណ៌ខ្មៅ ហើយធុំក្លិនស្អុយ ។ លុះនៅរសៀលថ្ងៃទី០៣ ឧសភា ពេលអ្នកភូមិទៅបូមទឹកដាក់ដំណាំ ស្រាប់តែគេប្រទះឃើញមានត្រីងាប់ព្រាតពេញដងអូរ ទឹកកាន់តែឡើងពណ៌ខ្មៅ និងកាន់តែធំក្លិនស្អុយ មិនអាចប្រើប្រាស់បាន ទើបមានការភ្ញាក់ផ្អើលតែម្ដង។
អ្នកស្រី ណាំ ស៊ីណាត បានដែលរស់នៅក្បែរមាត់អូរក្បែរចំណុចកើតហេតុ បានប្រាប់កោះសន្តិភាពនៅព្រឹកថ្ងៃទី ០៤ ឧសភា ថា អ្នកភូមិតែងប្រើប្រាស់ទឹកអូរខាងក្រោយភូមិនេះជាប្រចាំ ទាំងដាំស្លរ ងូត និងស្រោចស្របដំណាំ។ ប៉ុន្តែពេលនេះប្រើប្រាស់លែងកើតហើយ ព្រោះទឹកឡើងពណ៌ខ្មៅ ធុំក្លិនស្អុយ និងមានជាតិពុលទៀត។
ដៃរបស់គាត់កំពុងជាប់បំបៅទឹកដោះចៅនៅលើអង្រឹងផង គាត់បានឆ្លៀតនិយាយប្រាប់បន្តថា ដំបូងគាត់មិនបានដឹងរឿងនេះទេ តែបានឮអ្នកភូមិនិយាយ រហូតមានអ្នកខ្លះរើសបានត្រីងាប់ក្នុងអូរយ៉ាងសន្ធឹកសន្ធាប់ទៀត។ គាត់បានដើរទៅអើតមើលអ្នកភូមិ ដែលកំពុងនាំគ្នាចុះអូរប្រមូលយកត្រី តែគាត់មិនបានចុះរើសទេ ព្រោះធ្លាប់ដឹងថា ត្រីដែលពុលទឹកនោះយកទៅហូបមិនកើតទេ ទើបគាត់បានត្រិមឈរមើលគេ និងហាមកូនចៅមិនឲ្យចុះរើសត្រី និងងូតទឹកអូរទៀត ព្រោះពេលនោះទឹកអូរកំពុងឡើងពណ៏ខ្មៅ និងធុំក្លិនស្អុយខ្លាំង។
ដោយឡែក បុរសម្នាក់ទៀត ដែលមានការ៉ុងស្ពាយជាប់លើស្មារផង គឺលោក សរ សុភាព អាយុ៣៥ឆ្នាំ ជាអ្នកភូមិស្វាយសរដែរ បានប្រាប់នៅក្បែរមាត់អូរដូច្នេះថា «ខ្ញុំមិនបានដើររើសត្រីក្នុងទឹកអូរទេ តែខ្ញុំដើរជីកទំពាំងតាមមាត់អូរ»។ សំណួរ៖ តើបងបានប្រទះឃើញត្រីងាប់ក្នុងអូរខ្លះទេ ? គាត់បានផ្ដល់ចម្លើយយ៉ាងរហ័ស ហើយខ្លីៗ «ខ្វះអី… ត្រីអីក៏មានដែរ ងាប់ពេញអូរ តែគេរើសអស់ច្រើនហើយ»។
សំណួរ៖ ហេតុអ្វីបានបងមិនរើសយកធ្វើម្ហូប ? ជាមួយនឹងសម្ពាយការ៉ុងលើស្មារ គាត់បានងាកមើលទឹកអូរ រួចគ្រវីក្បាលបន្តិច ហើយបានបញ្ជាក់ប្រាប់ថា «ខ្ញុំមិនហ៊ានហូបទេ ព្រោះត្រីដែលងាប់នោះ គឺដោយសារពុលទឹក»។
សំណួរ៖ តើបងដឹងទេថា ទឹកដែលមានជាតិពុលនោះហូរចេញពីប្រភពណា ? ឬអាចត្រូវគេបង្ហូរចេញពីក្នុងរោងចក្រនៅក្បែរៗមាត់អូរខាងលើនេះ ? គាត់រារែកក្នុងការផ្ដល់ចម្លើយ តែបុរសនេះបានលើកហេតុផលបន្តិចដែរថា «នៅប៉ែកខាងលើគ្មានភ្លៀងទេ» ប៉ុន្តែគាត់ងក់ក្បាល ដែលទំនងគាត់ឯកភាពនឹងសំណួរចុងក្រោយ (សំដៅលើទឹកស្អុយហូរចេញពីរោងចក្រ) ជាមួយនឹងបន្លឺពាក្យមួយឃ្លាថា «បែបហ្នឹងហើយ»។
ក្រោយពីអ្នកភូមិបានប្រទះឃើញស្ថានភាពទឹក«អូរត្រែង» ឡើងពណ៌ខ្មៅ មានក្លិនស្អុយ មានត្រីពុលងាប់ពាសពេញដងអូរ និងមានការបង្ហោះព្រោងព្រាតតាមបណ្ដាញសង្គមផង អាជ្ញាធរមូលដ្ឋាន និងសមត្ថកិច្ច ដែលទូលបានដំណឹងនេះ បាននាំគ្នាចុះស្រាវជ្រាវ ដល់ទីតាំងកើតហេតុភ្លាមៗដែរ កាលពីរសៀលថ្ងៃទី ០៣ ឧសភា ដើម្បីពិនិត្យស្ថានភាពជាក់ស្ដែង។ នេះបើតាមអ្នកភូមិបាននិយាយប្រាប់។
ប៉ុន្តែគេមិនទាន់មានវិធានការបែបណាទេ បានត្រឹមតែរាយការបឋមជូនថ្នាក់ដឹកនាំបានជ្រាប់ប៉ុណ្ណោះ។ នៅព្រឹកថ្ងៃទី ០៤ ឧសភា គេឃើញមន្ត្រីគ្រប់មន្ទីរជំនាញ ដែលដឹកនាំដោយលោក ផេង សិទ្ធី អភិបាលរងខេត្ត ដែលមានអាជ្ញាធរ និងមន្ត្រីមូលដ្ឋានចូលរួមផង បានចុះទៅពិនិត្យស្ថានភាពទឹកផ្ទាល់ដល់ក្នុង«អូរត្រែង» និងស្វែងរកត្រីងាប់ ដែលអ្នកភូមិអះអាងថា «ត្រីងាប់ព្រាតពេញទឹកអូរ ដោយសារពុលសារធាតុគីមី ឬពុលកាកសំណល់ទឹកស្អុយ ដែលគេបង្ហូរចេញពីក្នុងរោងចក្រកែច្នៃផ្លែស្វាយ នៅប៉ែកខាងលើបន្តិច ក្បែរចំណុចកើតហេតុនោះ»។
បើតាមរដ្ឋបាលស្រុករតនមណ្ឌល ដែលបានសរសេរខ្លឹមសារបំំភ្លឺបង្ហោះក្នុងបណ្ដាញសង្គមរបស់ខ្លួន នៅថ្ងៃទី ០៤ ឧសភា ក្រោយក្រុមការងារជំនាញធ្វើការស្រាវជ្រាវ និងចុះត្រូតពិនិត្យកន្លែងបង្ហូរទឹកសម្អុយចូលអូរ បានឲ្យដឹងថា រោងចក្រដែលបង្ហូរទឹកស្អុយចូលក្នុង«អូរត្រែង» នោះរបស់ក្រុមហ៊ុន «cambodian Gome Farm Food co.L.t.d ស្ថិតនៅភូមិស្វាយសរ ឃុំត្រែង ស្រុករតនមណ្ឌល។ ប៉ុន្តែបើគេពិនិត្យលើស្លាកយីហោនៅខាងមុខទ្វារចូលក្រុមហ៊ុន គេឃើញរោងចក្រនេះដាក់ស្លាកយីហោ ក្រុមហ៊ុន« ពេជ្រ សំណាង » អិមផត និងអិចផត។
កោះសន្តិភាព មិនទាន់អាចសុំការទំនាក់ទំនងសុំការបំភ្លឺពីលោក ផេង សិទ្ធី អភិបាលរងខេត្ត និង លោក កត បូរ៉ាន់ ប្រធានមន្ទីរបរិស្ថានខេត្ត បានភ្លាមៗទេ នៅរសៀលថ្ងៃទី ០៤ ឧសភា នេះ ។ ប៉ុន្តែបើតាមយោងលើខ្លឹមសារ ដែលរដ្ឋបានស្រុករតនមណ្ឌល បានបំភ្លឺជូនមហាជនតាមរយៈបណ្ដាញសង្គម បាននិយាយថា រោងចក្រកែច្នៃផ្លែស្វាយខាងលើនេះ បានលួចបញ្ចេញទឹកកខ្វក់ចូលទៅក្នុង«អូរត្រែង» ហើយវាហូរធ្លាក់ចូលក្នុងដងស្ទឹងសង្កែ នៅប៉ែកខាងលើ នៃទំនប់«ពហុបំណង» ប្រមាណជាង១០គីឡូម៉ែត្រ។
រដ្ឋបាលស្រុកនេះ ហាក់ពុំទាន់មានចំណាត់ការជាដុំកំភូនទេ ជាមួយក្រុមហ៊ុនបង្ហូរទឹកសម្អុយចូលអូរបំពុលត្រីខាងលើនេះ ដោយគ្រាន់តែស្នើឲ្យភាគីក្រុមហ៊ុន ចាត់ការបន្ទាន់នូវការបូមទឹកកាកសំណល់ចេញពីកន្លែងស្ដុប បញ្ឍប់ការបង្ហូរទឹកស្អុយចូលអូរតែប៉ុណ្ណោះ។ ប៉ុន្តែរដ្ឋបាលស្រុក គ្រាន់បានសន្យាថា វិធានការបែបណាចំពោះក្រុមហ៊ុនបំពានច្បាប់នេះ រដ្ឋបាលស្រុកនឹងជូនដំណឹងបន្តបន្ទាប់ទៀតនៅពេលក្រោយ។
នេះមិនមែនជាលើកទី១ទេ គឺច្រើនលើកច្រើនសារហើយ ដែលពួកក្រុមហ៊ុនបង្កើតរោងចក្រនានា ដែលមានទីតាំងនៅស្រុករតនមណ្ឌល បានបង្ហូរកាកសំណល់ពុល ទឹកសម្អុយ ឬ ទឹកកខ្វក់បែបនេះចូលក្នុងអូរ ឬ ចូលក្នុងស្ទឹងសង្កែ ធ្វើឲ្យប៉ះពាល់ដល់បរិស្ថាន ពុលត្រីក្នុងស្ទឹងឬក្នុងអូរ ជាពិសេសប៉ះពាល់ដល់សុខភាពមនុស្ស ឬ សត្វពាហនៈ ដែលប្រើប្រាសទឹកស្ទឹងឬទឹកអូរខាងលើនេះ។
ប៉ុន្តែចំណាត់ការផ្លូវច្បាប់របស់អាជ្ញាធរគ្រប់ជាន់ថ្នាក់ ហាក់មានភាពកម្សោយបំផុត ក្នុងការអនុវត្តច្បាប់ទៅលើម្ចាស់ក្រុមហ៊ុនរោងចក្របំពានច្បាប់ទាំងនោះ។ ដូច្នេះហើយ ទើបរហូតមកដល់ពេលនេះ ម្ចាស់ក្រុមហ៊ុនរោងចក្រមួយចំនួន នៅតែហ៊ានប្រព្រឹត្តយ៉ាងគគ្លើន មិនញញើតច្បាប់ឡើយ។ គេរងចាំមើលថា តើអាជ្ញាធរខេត្ត ឬ ក្រសួងសាមី នឹង មានវិធានការបែបណា ពាក់ព័ន្ធនឹងផ្លូវច្បាប់ចំពោះម្ចាស់រោងចក្រកែច្នៃផ្លែស្វាយ បង្ហូរទឹកសម្អុយចូលអូរ បំពុលបរិស្ថាន បំពុលត្រីខាងលើនេះ ?
ចែករំលែកព័តមាននេះ