តាមការព្យាករណ៍របស់អ្នកជំនាញ ដែលបានសិក្សាអំពីសេដ្ឋកិច្ចមួយបានអះអាងថា តម្លៃស្បៀងអាហារនៅលើពិភពលោកនឹងស្រុតចុះ ដូច្នេះកម្ពុជានៅក្នុងនាមជាប្រទេសមួយក្នុងចំណោមប្រទេសនាំចេញអង្ករកំពូលទាំង១០ សូមត្រៀមជាពិសេស គឺបញ្ហាតម្លៃ ។ការលើកឡើងបែបនេះ គឺផ្អែកទៅតាមរបាយការនៃការសិក្សាមួយដែលបានធ្វើឡើងដោយក្រុមអ្នកសិក្សាសេដ្ឋកិច្ចនៅសាកលវិទ្យាល័យអុកស្វ័ត (Oxford Economics)…
តាមការព្យាករណ៍របស់អ្នកជំនាញ ដែលបានសិក្សាអំពីសេដ្ឋកិច្ចមួយបានអះអាងថា តម្លៃស្បៀងអាហារនៅលើពិភពលោកនឹងស្រុតចុះ ដូច្នេះកម្ពុជានៅក្នុងនាមជាប្រទេសមួយក្នុងចំណោមប្រទេសនាំចេញអង្ករកំពូលទាំង១០ សូមត្រៀមជាពិសេស គឺបញ្ហាតម្លៃ ។
ការលើកឡើងបែបនេះ គឺផ្អែកទៅតាមរបាយការនៃការសិក្សាមួយដែលបានធ្វើឡើងដោយក្រុមអ្នកសិក្សាសេដ្ឋកិច្ចនៅសាកលវិទ្យាល័យអុកស្វ័ត (Oxford Economics) ។
ក្រុមអ្នកសេដ្ឋកិច្ចនៅសាកលវិទ្យាល័យនេះបានអះអាងថា សង្គ្រាមរវាងរុស្ស៊ី និងអ៊ុយក្រែន លែងជាបញ្ហាតម្លៃស្បៀងទៀតហើយ ដោយសារតែពេលនេះតម្លៃស្រូវសាឡីដែលរុស្ស៊ីលក់ គឺកំពុងចាល់នៅលើទីផ្សារហើយតម្លៃដែលរុស្ស៊ីលក់ចេញក៏ថោកដែរ ខណៈដែលអ៊ុយក្រែន នៅពេលនេះ ក៏អាចនាំចេញផលិតផលស្បៀងជាស្រូវសាឡី និងពោតរបស់ខ្លួនបានជាបន្តបន្ទាប់ផងដែរ ទោះបីជាកិច្ចព្រមព្រៀងការនាំចេញស្បៀងសមុទ្រខ្មៅដែលផ្តួចផ្តើមដោយអង្គការសហប្រជាជាតិដួលរលំ កាលពីចុងឆ្នាំ២០២៣ក៏ដោយចុះ។
ប្រភពដដែលក៏បានបន្តទៀតថា មូលហេតុដែលបង្កឲ្យតម្លៃស្បៀងនឹងស្រុតចុះនៅពេលខាងមុខក៏ដោយសារតែដោយឃើញតម្លៃស្បៀងមានស្ថានភាពល្អ នៅពីចុងឆ្នាំ២០២៣ កសិករ និងប្រទេសផលិតស្បៀងនានា បានខិតខំពង្រីកសក្តានុពលផលិត ដែលនាំអោយទិន្នផលចាល់នៅលើទីផ្សារ ។
តាមការសិក្សារបស់ស្ថាប័ននេះ តម្លៃស្បៀងពិភពលោកនឹងស្រុតចុះ នៅចុងឆ្នាំ២០២៤ ដូច្នេះតម្លៃស្រូវអង្ករក៏អាចនឹងប៉ះពាល់ ទោះបីជាកម្ពុជាមិនមែនជាប្រទេសផលិតស្រូវសាឡីក៏ពិតមែន ប៉ុន្តែកម្ពុជា គឺជាប្រទេសផលិតអង្ករនាំចេញអង្ករ និងនាំចេញពោតផងដែរ ។ ដំណឹងបែបនេះ អាចអោយអ្នកទទួលទាននៅជុំវិញពិភពលោក ត្រេកអរក្រោយពេលដែលពួកគេរស់នៅក្នុងសភាពដ៏តានតឹង ដោយសារតែស្បៀងជួបវិបត្តិអតិផរណាជាបន្តបន្ទាប់ នៅក្នុងរយៈពេល២ឆ្នាំចុងក្រោយ ប៉ុន្តែវា គឺជាដំណឹងដែលប្រទេសផលិតស្បៀង និងនាំចេញស្បៀងដូចជា កម្ពុជាមួយគួរតែយកចិត្តទុកដាក់ធ្វើយ៉ាងណា ដើម្បីរក្សាតម្លៃ និងពង្រឹងបរិមាណនាំចេញរបស់ខ្លួនឲ្យកើនដែល ។
តាមរបាយការណ៍ពីសហព័ន្ធស្រូវអង្ករកម្ពុជា បានឲ្យដឹងថា នៅត្រីមាសទី១ ដើមឆ្នាំ២០២៤នេះ កម្ពុជាអាចសម្រេចបានការនាំចេញអង្ករសរុបចំនួន១៦៦ពាន់តោន នៅក្នុងទឹកប្រាក់សរុបជិត១២៤ លានដុល្លារធ្លាក់ចុះ៥,៧ ភាគរយ ខណៈដែលការនាំចេញស្រូវទៅប្រទេសជិតខាងវិញ គឺបានជាង២,២២ លានតោន គិតជាទឹកប្រាក់ជាង ៦០០ លានដុល្លារ កើនឡើងគួរសម ។ រីឯតម្លៃនៃអង្ករកម្ពុជា ក៏ហាក់ដូចជាស្រុតចុះបន្តិចដែរ ដោយអង្ករដែលនាំចេញគិតដល់ថ្ងៃ១៩ ខែមេសា ឆ្នាំ២០២៤ អង្ករនាំចេញថោកបំផុត គឺមួយតោនតម្លៃ ៦៧៥ដុល្លារ ហើយថ្លៃបំផុត គឺ១.៤០០ ដុល្លារនៅក្នុងមួយតោន ។
ក្រៅពីស្រូវ និងអង្ករផលិតផលស្បៀងដែលកម្ពុជាបានផលិត និងនាំចេញទៅក្រៅប្រទេសផ្សេងទៀត គឺអាចមានពោត សណ្តែក ល្ង ដំឡូងមី និងម្សៅមី ជាដើម ដូច្នេះប្រសិនបើតម្លៃស្បៀងនៅលើពិភបលោកស្រុតចុះដូចជា ការព្យាករណ៍ខាងលើវាក៏នឹងអាចប៉ះពាល់ដល់ការនាំចេញរបស់កម្ពុជាលើផលិតផលស្បៀងទាំងនេះផងដែរ ។
សរុបមមក នេះ គឺជាស្ថានភាពត្រួសៗមួយនៃបច្ចុប្បន្នភាពទីផ្សារស្បៀងពិភពលោក និងនៅកម្ពុជា ហើយព័ត៌មានទាំងនេះ គឺអាចចាត់ទុកថា ជាព័ត៌មានមួយសម្រាប់អ្នកដែលពាក់ព័ន្ធសិក្សា និងប្រៀបធៀប ដើម្បីបន្តស្រាវជ្រាវនឹងរៀបចំយុទ្ធសាស្ត្រទីផ្សារឲ្យត្រូវសភាពការណ៍ ដើម្បីធ្វើយ៉ាងណារក្សាកិត្យានុភាព និងអនុភាពក៏ដូចជា សក្តានុពលនៃការនាំចេញស្បៀងរបស់កម្ពុជា ហើយជាពិសេស គឺប្រឹងប្រែងថែរក្សាតម្លៃដ៏ល្អមួយសម្រាប់កសិករកម្ពុជា ដែលពួកគាត់កំពុងតែសប្បាយចិត្តនឹងស្រូវឡើងថ្លៃជាងមួយឆ្នាំកន្លងមក ។ សឹងតែរាល់ឆ្នាំកសិករកម្រញញឹមណាស់ លើកលែងតែនៅក្នុងឆ្នាំនេះពួកគាត់ញញឹមកើត ពីព្រោះតែតម្លៃស្រូវវាថ្លៃ លើសពីការរំពឹង ៕
ចែករំលែកព័តមាននេះ