ទោះជាការវា.យប្រហារគ្នាតាមអាកាសទៅវិញទៅមករវាងអ៊ីស្រាអែល និងអ៊ីរ៉ង់មិនមានផលប៉ះពាល់ធ្ងន់ធ្ងរទាំងសងក្តី វាបានធ្វើអោយកក្រើកដល់តម្លៃប្រេង និងតម្លៃមាស នៅលើទីផ្សារអន្តរជាតិ ។
តម្លៃប្រេងឆៅដែលបានស្រុតចុះក្រោយឡើងដល់៩០ដុល្លារនៅក្នុងមួយបារ៉ែលមួយដង្ហើមចង្រិតនោះ បានស្ទុះកម្រើកឡើងខ្លាំងពោលដល់ទៅ៣ភាគរយភ្លាមៗ ក្រោយពីមានព័ត៌មាននៃការផ្ទុះនៅក្នុងប្រទេសអ៊ីរ៉ង់ ខណៈដែលជម្លោះនៅតែបន្តមានឥទ្ធិពលលើអារម្មណ៍វិនិយោគិន និងជំរុញឱ្យមានការប្រែប្រួលទីផ្សារ ។
តម្លៃនេះបានស្ទុះឡើង នៅព្រឹកថ្ងៃសុក្រសប្តាហ៍មុន បន្ទាប់ពីអ៊ីស្រាអែលត្រូវបានគេរាយការណ៍ថា បានធ្វើការវា.យប្រហារលើមូលដ្ឋានយោធាអ៊ីរ៉ង់ នៅទីក្រុងអីហ្វសាហាន (Ifsahan) ដែលពិភពលោកដឹងថា ជាមូលដ្ឋានទ័ពអាកាស និងជាកន្លែងស្រាវជ្រាវដែលពាក់ព័ន្ធជាមួយកម្មវិធីនុយក្លេអ៊ែររបស់អ៊ីរ៉ង់ ។
មជ្ឈមណ្ឌលបច្ចេកវិទ្យានុយក្លេអ៊ែរនៅទីក្រុងនោះ គឺជាមជ្ឈមណ្ឌលស្រាវជ្រាវនុយក្លេអ៊ែរដ៏ធំបំផុតរបស់ប្រទេសអ៊ីរ៉ង់ ដោយនៅទីនោះអ៊ីរ៉ង់បានជួលអ្នកវិទ្យាសាស្ត្រប្រមាណ៣.០០០ នាក់ ។ ក្រោយពេលដែលមានសេចក្តីរាយការណ៍ពីការវា.យប្រហារតម្លៃប្រេងបានស្ទុះឡើង ប៉ុន្តែបានថមថយបន្តិចមកនៅត្រឹមជិត៨៩ដុល្លារ នៅក្នុងមួយបារ៉ែល ខណៈដែលតម្លៃមាសវិញ គឺនៅក្នុងរង្វង់ប្រមាណជា ២.៤១១ ដុល្លារនៅក្នុងមួយអោន ឬ៣២០០ដុល្លារនៅក្នុងមួយតម្លឹង ។
លោក រូស មូល (Russ Mould) នាយកផ្នែកវិនិយោគ AJ Bell បាននិយាយថា ប្រសិនបើជម្លោះគ្មានការសម្របសម្រូល ហើយភាគីជម្លោះនៅតែឆ្លើយតបទៅវិញទៅមកនោះ តម្លៃប្រេង និងមាស គឺមិនបាច់និយាយនោះទេ ។
អ្នកវិភាគទីផ្សារនៅក្រុមហ៊ុន IG បាននិយាយថា ទីផ្សារហិរញ្ញវត្ថុស្ថិតនៅក្នុងការប្រុងប្រយ័ត្នបំផុតនៅពេលដែលភាពតានតឹងបានកំពុងតែកើតមានឡើងកាន់តែខ្លាំងឡើងនៅមជ្ឈិមបូព៌ា បន្ទាប់ពីមានរបាយការណ៍អំពីការផ្ទុះ និងការវា.យប្រហារតាមអាកាសរបស់អ៊ីស្រាអែលនៅក្នុងប្រទេសអ៊ីរ៉ង់ ។
កាលពីថ្ងៃទី១៣ ខែមេសា អ៊ីរ៉ង់បានបញ្ចេញនូវយន្តហោះគ្មានមនុស្សបើក និងកាំជ្រួចចំនួនជាង៣០០ គ្រាប់វា.យប្រហារទៅកាន់ប្រទេសអ៊ីស្រាអែល តែអ៊ីស្រាអែលប្រកាសថា ៩៩ភាគរយនៃការវា.យប្រហារត្រូវបានទប់ស្កាត់ ។ ការវា.យប្រហារនេះអ៊ីរ៉ង់បាននិយាយថា ជាការសងសឹកចំពោះការវា.យប្រហាររបស់អ៊ីស្រាអែលទៅលើអគារកុងស៊ុលអ៊ីរ៉ង់ នៅក្នុងប្រទេសស៊ីរី កាលពីដើមខែនេះដែលបានសម្លា.ប់មនុស្សចំនួន១២នាក់ ។ ដោយឡែកការវា.យប្រហារដោយអ៊ីស្រាអែលលើទីក្រុងអ៊ីហ្វសាហាន់ខាងអ៊ីរ៉ង់បានអះអាងថា ក៏មិនមានផលប៉ះពាល់ធ្ងន់ធ្ងរដោយឡែកសំឡេងផ្ទុះ គឺគ្រាន់តែផលនៃការទប់ស្កាត់ដ្រូនរបស់អ៊ីស្រាអែលប៉ុណ្ណោះ ។
គិតត្រឹមថ្ងៃទី២០ ខែមេសា ហាងឆេងមាសនៅកម្ពុជានៅក្នុងមួយតម្លៃសម្រាប់មាសដែលល្អជាងគេតម្លៃទិញចូលបានកើនឡើងដល់២.៨៨០ដុល្លារនៅក្នុងមួយតម្លឹង ខណៈដែលមាសគុណភាពអន់ជាងគេ គឺមួយតម្លឹង២០២០ដុល្លារ ។ រីឯតម្លៃប្រេងឥន្ធនៈវិញ គឺប្រេងម៉ាស៊ូតថ្លៃ៤.២៥០រៀល ប្រេងសាំងធម្មតា ៤.៥០០ រៀល និងស៊ុបពែ គឺ៥.១៥០ រៀលនៅក្នុងមួយលីត្រ ។
អ្នកវិភាគបានឲ្យដឹងថា តម្លៃនេះនឹងប្រែប្រួលផ្អែកតាមចរន្ត និងទីផ្សារក៏ដូចជា ដំណើរការស្តុកនៃប្រេង និងមាសនៅក្នុងប្រទេស ប៉ុន្តែជាទូទៅនៅពេលដែលទីផ្សារពិភពលោកប្រែប្រួលមិនយូរទេ ពេលដែលអស់ស្តុកតម្លៃនៅក្នុងស្រុកនឹងប្រែប្រួលតាមនោះ ៕ ដោយៈ ហេង ចេស្តារ
ចែករំលែកព័តមាននេះ