គម្រោងព្រែកជីកតេជោហ្វូណន បានក្លាយទៅជាប្រធានបទក្តៅសម្រាប់ការពិភាក្សានៅកម្ពុជា និងវៀតណាម ព្រមទាំងនៅលើឆាកអន្តរជាតិផងដែរ នៅពេលដែលមាន ការលេចព័ត៌មានអំពីការមិនសប្បាយចិត្តរបស់វៀតណាមចំពោះគម្រោងនេះ ដោយ ឈរលើហេតុផលការប៉ះពាល់ដល់ទន្លេមេគង្គ និងការព្រួយបារម្ភពីឥទ្ធិពលចិន ដោយសារព្រែកជីកនេះ…
គម្រោងព្រែកជីកតេជោហ្វូណន បានក្លាយទៅជាប្រធានបទក្តៅសម្រាប់ការពិភាក្សានៅកម្ពុជា និងវៀតណាម ព្រមទាំងនៅលើឆាកអន្តរជាតិផងដែរ នៅពេលដែលមាន ការលេចព័ត៌មានអំពីការមិនសប្បាយចិត្តរបស់វៀតណាមចំពោះគម្រោងនេះ ដោយ ឈរលើហេតុផលការប៉ះពាល់ដល់ទន្លេមេគង្គ និងការព្រួយបារម្ភពីឥទ្ធិពលចិន ដោយសារព្រែកជីកនេះ ។
![](https://kohsantepheapdaily.com.kh/wp-content/uploads/2024/04/978cafd520adbd8245a9a151a4948c52.jpeg)
តើគម្រោងព្រែកជីក តេជោ ហ្វូណន នេះនឹងត្រូវធ្វើអ្វីខ្លះ? តើហេតុអ្វីកម្ពុជាចង់ធ្វើគម្រោងនេះ? អ្វីពិតប្រាកដដែលវៀតណាមព្រួយបារម្ភចំពោះគម្រោងព្រែកជីកនេះ? គម្រោង «ព្រែកជីកហ្វូណនតេជោ» ប្រវែង១៨០គីឡូម៉ែត្រ ចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ស្រុកកោះធំ និងបន្តរហូតដល់សមុទ្រខេត្តកែប ដោយឆ្លងកាត់ខេត្តចំនួន៤ រួមមាន ៖ ខេត្តកណ្តាល ខេត្តតាកែវ ខេត្តកំពត និងខេត្តកែប ។ ផ្លូវទឹកនេះនឹងមានទទឹងមុខកាត់ផ្នែកខាងលើ ប្រវែង១០០ម៉ែត្រ និងមុខកាត់ផ្នែកខាងក្រោមប្រមាណ៨០ម៉ែត្រ និងជម្រៅទឹកប្រមាណ៥,៤ម៉ែត្រ (ជម្រៅនាវាចរណ៍៤,៧ម៉ែត្រ និងគម្លាតសុវត្ថិភាព០,៧ម៉ែត្រ) មានគន្លងនាវាចរណ៍ចំនួន២គន្លង អាចចេញ-ចូល និងជៀសគ្នាបានដោយសុវត្ថិភាព ។
គម្រោងនេះ នឹងសាងសង់សន្ទះផ្លូវនាវាចរណ៍ចំនួន៣កន្លែង, សាងសង់ស្ពានចំនួន ១១កន្លែង, សាងសង់ផ្លូវអមសាងខាងប្រវែង២០៨គីឡូម៉ែត្រ និងមានបំពាក់សញ្ញា ជំនួយនាវាចរណ៍ និងហេដ្ឋា រចនាសម្ព័ន្ធឆ្លងកាត់ទន្លេផ្សេងៗទៀតផងដែរ ។ ការសាងសង់គម្រោងផ្លូវទឹកថ្មីនេះត្រូវបានប៉ាន់ស្មានថា នឹងចំណាយទុនវិនិយោគ ១,៧០០លានដុល្លារអាមេរិក និងរយៈពេលសាងសង់ប្រមាណ៤ឆ្នាំ ។ គម្រោងនេះគ្រោងនឹងចាប់ផ្តើមសាងសង់នៅចុងឆ្នាំ២០២៤នេះ ។
![](https://kohsantepheapdaily.com.kh/wp-content/uploads/2024/04/16d6c222f3c926e9cefd40ee767f196c.jpg)
តាមការសិក្សាគម្រោងនេះនឹងផ្តល់អត្ថប្រយោជន៍ជាច្រើនរួមមាន ៖ ការកាត់បន្ថយរយៈពេលចម្ងាយ និងតម្លៃនៃការដឹកជញ្ជូននាពេលបច្ចុប្បន្ន, ការបង្កើតតំបន់ពាណិជ្ជកម្ម និងមជ្ឈមណ្ឌលភស្តុភារកម្ម, ការអភិវឌ្ឍផែរណបថ្មីៗជាច្រើន, ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម និងចិញ្ចឹមសត្វ, ការជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា, ការបង្កើតការងារបន្ថែមនៅកំពង់ផែស្វយ័តក្រុងព្រះសីហនុ កំពង់ផែស្វយ័តភ្នំពេញ និងកំពង់ផែផ្សេងទៀត, ការជំរុញការអភិវឌ្ឍទីក្រុង និងនគរូបនីយកម្ម, និងការជំរុញការរីកចម្រើនផ្នែកអចលនទ្រព្យ ។ កម្ពុជាចាត់ទុកគម្រោងព្រែកជីកតេជោ ហ្វូណន គឺជាក្តីសង្ឃឹមមួយសម្រាប់អនាគត កម្ពុជាក្នុងការអភិវឌ្ឍសេដ្ឋកិច្ច និងសង្គម ។
តាមរយ:ការបកស្រាយរបស់សម្តេចតេជោហ៊ុន សែន ប្រធានព្រឹទ្ធសភា និងអតីតនាយករដ្ឋមន្ត្រីកម្ពុជាក៏ដូចជា សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ពេលបច្ចុប្បន្ន បានពន្យល់យ៉ាងច្បាស់លាស់ថា កម្ពុជាធ្វើគម្រោងព្រែកជីកតេហ្វូណន នេះ គឺក្នុងគោលបំណងសេដ្ឋកិច្ច និងសង្គមសុទ្ធសាធហើយ មិនមែនបម្រើដល់ផលប្រយោជន៍កងទ័ពចិនក្នុងការចូលកាន់តែកៀកព្រំដែនវៀតណាមដូចការព្រួយបារម្ភដែរ ។
![](https://kohsantepheapdaily.com.kh/wp-content/uploads/2024/04/cadf2441f07745c89ad0cc1921ac168d.jpg)
ម្យ៉ាងទៀត មេដឹកនាំកម្ពុជាក៏បានពន្យល់លើទិដ្ឋភាពច្បាប់ផងដែរថា រដ្ឋធម្មនុញ្ញ របស់ប្រទេសកម្ពុជាមិនអនុញ្ញាតអោយមានវត្តមានកងទ័ពបរទេសនៅក្នុងប្រទេស កម្ពុជាឡើយ ។ ចំណែកក្រុមអ្នកវិភាគនៅកម្ពុជាក៏យល់ឃើញថា គម្រោងនេះនឹងមិនប៉ះពាល់ដល់សន្តិសុខវៀតណាម និងទឹកទន្លេមេគង្គដែរ ។
លោក សុខ ទូច ប្រធាន រាជបណ្ឌិត សភាកម្ពុជាធ្លាប់និយាយប្រាប់សារព័ត៌មានថា វាមិនបានប៉ះពាល់ដល់វៀតណាមទេ ហើយក៏អត់មានប៉ះពាល់ដល់បរិស្ថានដែរ ។ ខ្មែរធ្វើ (ព្រែកជីក) នៅលើទឹកដីខ្មែរ ហើយមិនមែននៅលើទន្លេមេគង្គទេ គឺដៃទន្លេមេគង្គ ។ អញ្ចឹងខ្មែរគ្រាន់តែជូនដំណឹងខ្មែរអាចធ្វើបាន ។
បើតាម ប្រធានរាជបណ្ឌិត្យសភាកម្ពុជា, មូលហេតុដែលវៀតណាមបង្ហាញកង្វល់ ពាក់ព័ន្ធនឹងការជីកព្រែកហ្វូណន តេជោ អាចដោយសារតែកន្លងទៅវៀតណាម ធ្លាប់យកចំណេញពីកម្ពុជាពីការដឹកទំនិញ ចេញតាមផ្លូវទឹកទៅកាន់សមុទ្រ ព្រោះ ត្រូវបង់លុយឱ្យវៀតណាម ។ ចំណុចមួយទៀត គឺវៀតណាមអាចលែងដឹងពីកម្លាំង ដឹកជញ្ជូនកម្ពុជា ហើយកម្ពុជាអាចប្រកួតប្រជែងជាមួយវៀតណាមលើផលិតផល កសិកម្មនៅទីផ្សារបរទេសផងដែរ ។
ចំណែកសារព័ត៌មានសេដ្ឋកិច្ចវៀតណាម VnEconomny ក៏បានរាយការណ៍កាល ពីឆ្នាំ២០២៣ថា ទំនិញរហូតដល់ប្រមាណ២០លានតោនបានឆ្លងកាត់កំពង់ផែ វៀតណាម ចាប់តាំងដែលកិច្ចព្រមព្រៀងដឹកជញ្ជូនផ្លូវទឹករវាងកម្ពុជា និងវៀតណាម បានចូលជាធរមាននៅខែមករា ឆ្នាំ២០១១មក ។ ដោយផ្អែកទៅលើការវិភាគ និងការចេញផ្សាយរបស់សារព័ត៌មានវៀតណាមនេះ វៀតណាមអាចយល់ថា ការធ្វើព្រែកជីកតេជោហ្វូណននេះនឹងធ្វើអោយបាត់ចំណូលមួយផ្នែករបស់វៀតណាម ដោយសារកម្ពុជាលែងត្រូវការចេញចូលកំពង់ផែវៀតណាមទៀតនៅពេលព្រែកជីកនេះលេចចេញជារូបរាង ។
ដូច្នេះការព្រួយបារម្ភពិតប្រាកដរបស់វៀតណាម គឺសេដ្ឋកិច្ច ជាជាងការប៉ះពាល់ទន្លេមេគង្គ និងការពាក់ព័ន្ធរបស់ចិនក្នុងការប្រើព្រែកជីកនេះសម្រាប់ហេតុផលយោធានៅពេលខាងមុខ ។ មេដឹកនាំកម្ពុជាគ្រប់លំដាប់ថ្នាក់បានពន្យល់យ៉ាងច្បាស់លាស់ថា គម្រោងនេះ គឺដើម្បីផលប្រយោជន៍ សេដ្ឋកិច្ច និងសង្គមកម្ពុជាប៉ុណ្ណោះ ។ វាមិនប៉ះពាល់ដល់ទន្លេមេគង្គ ហើយក៏មិនប៉ះពាល់ដល់សន្តិសុខ ប្រទេសវៀតណាមដែរ ។
ជាមួយនឹងការពន្យល់របស់កម្ពុជាដ៏ច្បាស់លាស់នេះ ប្រទេសវៀតណាមគួរស្ងប់ចិត្ត ហើយអនុញ្ញាតអោយកម្ពុជាសម្រេចក្តីស្រមៃរបស់ខ្លួនលើផ្នែកសេដ្ឋកិច្ចពីព្រោះកម្ពុជា និងវៀតណាមជាមិត្តដ៏ល្អនឹងគ្នាជាយូរមកហើយ ។ វៀតណាមមិនគួរធ្វើអោយគម្រោងព្រែកជីកនេះក្លាយជារឿងល្អក់កករក្នុងទំនាក់ទំនងរវាងប្រទេសទាំងពីរឡើយ ៕
ចែករំលែកព័តមាននេះ