រាជធានីភ្នំពេញ ៖ ម៉ូតូម៉ាកហុងដាឌ្រីមសេ១២៥ មួយគ្រឿង បើកបរដោយបុរសម្នាក់ ក្នុងល្បឿនលឿន វ៉ាជែងរថយន្តសណ្ដោងរ៉ឺម៉កសម្រាប់ដឹកទូកុងតឺន័រ ១គ្រឿង ចូលទៅចំណែកផ្លូវម្ខាងទៀត ក៏ជ្រុលទៅបុកម៉ូតូម៉ាកហុងដា អឹមដេ ១គ្រឿងទៀត ដែលបើកបរដោយបុរសម្នាក់ កំពុងបើកបរធ្វើដំណើរក្នុងទិសដៅបញ្ច្រាស់គ្នា បណ្ដាលឲ្យរងរបួសទាំងសងខាង ហើយម៉ូតូទាំង ២គ្រឿង បានរងការខូចខាតប្រើការលែងកើតទាំង២គ្រឿង។
ឧប្បត្តិហេតុគ្រោះថ្នាក់ចរាចរណ៍នេះបានកើតឡើង នៅវេលាម៉ោង១២ថ្ងៃត្រង់ ថ្ងៃទី១៨ ខែមេសា ឆ្នាំ២០២៤ នៅតាមផ្លូវបេតុង ស្ថិតនៅក្នុងភូមិតាកេរ សង្កាត់កំបូល ខណ្ឌកំបូល រាជធានីភ្នំពេញ ។
អ្នកភូមិនៅជិតកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គាត់បានឃើញបុរសម្នាក់ ជិះម៉ូតូ១គ្រឿង ម៉ាកហុងដាឌ្រីសេ១២៥ ស៊េរីឆ្នាំ២០១៦ ពណ៍ខ្មៅ ពាក់ស្លាកលេខ ត្បូងឃ្មុំ 1A-4951 ក្នុងទិសដៅពីជើង ទៅត្បូង ក្នុងល្បឿនលឿន ស្របគ្នាជាមួយរថយន្តម៉ាកហ៊ីយ៉ាន់ដាយ ពណ៍ខៀវ ពាក់ស្លាកលេខភ្នំពេញ 3B-3659 ដែលជារថយន្តសណ្ដោងកន្ទុយរ៉ឺម៉ក សម្រាប់ដឹកទូកុងតឺន័រ លុះពេលទៅដល់ត្រង់ចំណុចកើតហេតុ ម៉ូតូនេះ បានវ៉ាជែងរថយន្តខាងលើ ហើយចូលទៅចំណែកផ្លូវម្ខាងទៀត ។
ប្រភពដដែល បានប្រាប់បន្តថា បន្ទាប់ពីវ៉ារថយន្តផុតបន្តិច ក៏ជ្រុលទៅបុកម៉ូតូ ១គ្រឿងទៀត ម៉ាកហុងដាអឹមដេ ពណ៍ក្រហម ពាក់ស្លាកលេខភ្នំពេញ 1DG-8482 ដែលបើកបរដោយបុរសម្នាក់ ក្នុងទិសដៅបញ្ច្រាស់គ្នា ពីត្បូងទៅជើងពេញទំហឹងតែម្ដង។ បណ្ដាលឱ្យម៉ូតូម៉ាកហុងដាឌ្រីមសេ១២៥ រួមទាំងបុរស ដែលជាអ្នកបើកបរបានខ្ទាតទៅពីមុខរថយន្តសណ្ដោងរ៉ឺម៉ក សម្រាប់ដឹកទូកុងតឺន័រ ប៉ុន្តែរថយន្តនោះ ជាន់ហ្វ្រាំងឈប់ទាន់ ទើបមិនបានបុក ឬកិនថែមបណ្ដាលឲ្យស្លាប់។
ប្រភពខាងលើបានឲ្យដឹងបន្តទៀតថា ខណៈនោះអ្នកជិះម៉ូតូបានរងរបួសធ្ងន់ទាំងសងខាង ចំណែកម៉ូតូបានរងការខូចខាតប្រើការលែងកើតទាំង២គ្រឿងតែម្ដង ហើយបន្ទាប់មកអ្នករងរបួសត្រូវបានបញ្ជូនទៅសង្គ្រោះភ្លាមៗ ។ បន្ទាប់មកនគរបាលប៉ុស្តិ៍កំបូលបានចុះទៅកន្លែងកើតហេតុ រួចបានធ្វើការវាស់វែង និងនាំយកម៉ូតូទាំង ២គ្រឿង ទៅរក្សាទុករង់ចាំការដោះស្រាយនៅពេលក្រោយ ចំណែករថយន្ត ត្រូវបានអនុញ្ញាតឱ្យបន្តដំណើរទៅមុខទៀត ព្រោះមិនបានពាក់ព័ន្ធក្នុងរឿងនេះឡើយ ៕
ចែករំលែកព័តមាននេះ