ពាក្យចាស់ពោលថា «ប្អូនអ្ហើយកុំសើចបងក្រែងពៀរឆ្លងម្ដងម្នាក់»។ កាលពីមុននេះ, ក្រុមបស្ចិមប្រទេសនាំគ្នាសើចពេបជ្រាយឱ្យប្រធានាធិបតីរុស្ស៊ី លោកពូទីន ដែលត្រូវរដ្ឋអាជ្ញានៃតុលាការព្រហ្មទណ្ឌអន្តរជាតិ អាយស៊ីស៊ី (ICC) នៅទីក្រុងឡាអេចេញដីកាចាប់ខ្លួនដើម្បីចូលឆ្លើយបំភ្លឺនៅក្នុងរង្វង់ក្រចកសេះពីបទសង្ស័យប្រព្រឹត្តអំពើឧក្រិដ្ឋកម្មសង្គ្រាម។ ឥឡូវនេះ បញ្ហានេះកំពុងតែតាមលងបន្លាចសម្ព័ន្ធមិត្តរបស់ក្រុមបស្ចិមប្រទេសវិញម្ដង។ នោះគឺគម្រោងចេញដីកាចាប់ខ្លួនមន្ត្រីរដ្ឋាភិបាលអ៊ីស្រាអែលពីបទសង្ស៏័យប្រព្រឹត្តឧក្រិដ្ឋកម្មប្រឆាំងនឹងមនុស្សជាតិនៅក្នុងយុទ្ធនាការបោសសម្អាតក្រុមហាម៉ាស់ដែលធ្វើឱ្យជនស៊ីវិលប៉ាឡេស្ទីនស្លាប់យ៉ាងរង្គាល។
ទីក្រុងយេរូសាឡឹម៖ ថ្មីៗនេះ សារព័ត៌មានលោកខាងលិចផ្សាយថាលោកណឺតាន់យ៉ាហ៊ូកំពុងតែរត់រកជំនួយពីលោកបៃដឹនដើម្បីទប់ស្កាត់មិនឱ្យតុលាការព្រហ្មទណ្ឌអន្តរជាតិចេញដីកាចាប់ខ្លួនមន្ត្រីជាន់ខ្ពស់អ៊ីស្រាអែលដែលជាប់ពាក់ព័ន្ធនឹងយុទ្ធនាការសង្គ្រាមនៅហ្កាហ្សា។ ខាងលើនេះជាការបង្ហើបឱ្យដឹងពីមន្ត្រីរដ្ឋាភិបាលអ៊ីស្រាអែល២រូបដែលស្នើសុំមិនបញ្ចេញឈ្មោះ។
សំណួរសួរថាតើរឿងនេះធំដល់ថ្នាក់ណាទើបបានជាធ្វើឱ្យលោកណឺតាន់យ៉ាហ៊ូស្នើសុំអន្តរាគមន៍ពីលោកបៃដិន? សព្វថ្ងៃនេះ គេលេចឮល្ហៀងៗថាមន្ត្រីរដ្ឋាភិបាលអ៊ីស្រាអែលកំពុងតែដេកមិនលក់បក់មិនល្ហើយអស់រយៈពេល២អាទិត្យមកហើយបន្ទាប់ពីពួកគេដឹងថាអាយស៊ីស៊ី (ICC) កំពុងរៀបចំដីកាចាប់ខ្លួនលោកណឺតាន់យ៉ាហ៊ូដែលជាមេដឹកនាំកំពូលរបស់អ៊ីស្រាអែលរួមទាំងរដ្ឋមន្ត្រីការពារជាតិអ៊ីស្រាអែលក៏ត្រូវចាប់ខ្លួនដែរ និងនាយអគ្គសេនាធិការកងទ័ពអ៊ីស្រាអែលម្នាក់ទៀត។
ដូច្នេះ នៅពីក្រោយវាំងនននយោបាយនេះ លោកណឺតាន់យ៉ាហ៊ូបានលួចទាក់ទងតាមទូរស័ព្ទស្ងាត់ៗជាមួយលោកបៃដិនកាលពីថ្ងៃអាទិត្យ។ កាលនោះ លោកទាំងពីរមិនត្រឹមតែនិយាយពីបញ្ហាអាយស៊ីស៊ីប៉ុណ្ណោះទេ ប៉ុន្តែក៏និយាយពីការចរចាគ្នាដើម្បីដោះលែងចំណាប់ខ្មាំង និងការរៀបចំយុទ្ធសាស្ត្រដើម្បីទប់ទល់នឹងលទ្ធភាពនៃការវាយប្រហារដោយគ្រាប់មីស៊ីលរបស់អ៊ីរ៉ង់នាពេលអនាគត ហើយនិងការជួយសម្រួលការដឹកជញ្ជូនជំនួយមនុស្សធម៌សម្រាប់ជនស៊ីវិលនៅតំបន់ហ្កាហ្សា។
បើដូច្នេះមែន ល្បែងនយោបាយនេះកាន់តែល្អមើលហើយ។ កាលពីមុននេះ លោកណឺតាន់យ៉ាហ៊ូហាក់ដូចជាប្រកាន់គោលជំហររឹងត្អឹងសម្បើមណាស់នៅចំពោះមុខការអំពាវនាវ និងការដាក់សម្ពាធពីសហគមន៍អន្តរជាតិ។ លោកថែមទាំងចង់លើកកងទ័ពជើងគោកវាយចូលតំបន់រ៉ាហ្វាថែមទៀតដើម្បីអ្វីដែលលោកហៅថាការបោសសម្អាតក្រុមហាម៉ាស់ឱ្យដល់ឫសគល់។
ឥឡូវនេះ ករណីដែលអាយស៊ីស៊ីអាចនឹងចេញដីកាចាប់ខ្លួនលោកណឺតាន់យ៉ាហ៊ូគឺជាទម្ងន់នយោបាយមួយ ឬជាសន្លឹកបៀរអាត់សម្រាប់តថ្លៃជាមួយអ៊ីស្រាអែល។ មានន័យថាបើលោកណឺតាន់យ៉ាហ៊ូចង់បានការធ្វើអន្តរាគមន៍នៅក្នុងរឿងនេះលុះត្រាតែធ្វើសម្បទានឱ្យគ្នាទៅវិញទៅមក។ លោកណឺតាន់យ៉ាហ៊ូត្រូវតែបន្ធូរដៃខ្លះ, ហើយត្រូវតែស្ដាប់គេស្ដាប់ឯងខ្លះផង។
អាយស៊ីស៊ីដែលមានទីស្នាក់ការធំនៅប្រទេសហូឡង់កំពុងបន្តស៊ើបអង្កេតករណីសង្ស័យថាអាចនឹងមានឧក្រិដ្ឋកម្មសង្គ្រាមប្រព្រឹត្តឡើងដោយកងទ័ពអ៊ីស្រាអែល និងពួកយុទ្ធជនប៉ាឡេស្ទីន។ ពោលគឺរាប់ថយក្រោយទៅរកឆ្នាំ២០១៤ដែលជាការចាប់ផ្ដើមដំបូងនៃសង្គ្រាមរវាងអ៊ីស្រាអែល និងក្រុមហាម៉ាស់។ អ្នកសារព័ត៌មានបានសាកសួរមន្ត្រីរដ្ឋាភិបាលអាមេរិកអំពីបញ្ហាអាយស៊ីស៊ី។ ពួកគេមិនដឹងថាអាយស៊ីស៊ីនឹងចេញដីកាចាប់ខ្លួន ឬយ៉ាងណាទេ។ ប៉ុន្តែច្បាស់ណាស់ថាអាយស៊ីស៊ីត្រូវអង្គការក្រៅរដ្ឋាភិបាល អឹនជីអូ (NGO) និងរដ្ឋជាសមាជិកអាយស៊ីស៊ីជាច្រើនកំពុងតែនិយាយដុកឱ្យចេញដីការចាប់ខ្លួន។
តបទៅនឹងការនិយាយដុកនេះ លោកណឺតាន់យ៉ាហ៊ូបង្ហោះតាមបណ្ដាញទ្វីតថឺថាលោកមិនបណ្ដោយឱ្យអាយស៊ីស៊ីចូលមកកកូរកកាយសិទ្ធិស្វ័យការពារខ្លួនរបស់អ៊ីស្រាអែលជាដាច់ខាត។ លោកទទួលស្គាល់ថាចំណាត់ការរបស់អាយស៊ីស៊ីធ្វើការដោយឯករាជ្យពិតមែនហើយ។ ប៉ុន្តែចំណាត់ការរបស់ស្ថាប័ននេះអាចនឹងគំរាមកំហែងអាយុជីវិតរបស់កងទ័ព និងមន្ត្រីរដ្ឋាភិបាលនៃប្រទេសនិយមប្រជាធិបតេយ្យនានាដែលកំពុងខិតខំប្រយុទ្ធប្រឆាំងនឹងអំពើភេរវកម្ម និងអំពើឈ្លានពាន។
ចំពោះសំណួរថាតើនៅក្នុងការសន្ទនាគ្នាកាលពីថ្ងៃអាទិត្យនោះ លោកណឺតាន់យ៉ាហ៊ូពិតជាបានស្នើសុំឱ្យលោកបៃដិនជួយអន្តរាគមន៍កុំឱ្យអាយស៊ីស៊ីចាប់ខ្លួនលោក ឬយ៉ាងណា? អ្នកនាំពាក្យសេតវិមានសូមមិនធ្វើអត្ថាធិប្បាយទេ។
ប៉ុន្តែអ្នកនាំពាក្យរូបនេះនិយាយបង្ការទុកជាមុនថា «បើទុកជាអាយស៊ីស៊ីចង់ចេញដីកាចាប់ខ្លួនក៏មិនអាចទៅរួចដែរព្រោះអាយស៊ីស៊ីគ្មានដែនសមត្ថកិច្ចនឹងធ្វើរឿងហ្នឹងនៅក្នុងកាលៈទេសៈបច្ចុប្បន្ននេះទេ។ ម៉្យាងទៀត សេតវិមាននឹងមិនគាំទ្រចំណាត់ការនេះជាដាច់ខាត»។ ដូច្នេះ បើសេតវិមានចេញមុខធានាប៉ុណ្ណេះហើយ គេជឿជាក់ថាលោកណឺតាន់យ៉ាហ៊ូអាចនឹងមានអារម្មណ៍កក់ក្ដៅខ្លះជាមិនខាន៕
ចែករំលែកព័តមាននេះ