នៅថ្ងៃទី១៧ ខែមេសា ទីភ្នាក់ងារព័ត៌មាន និងសារព័ត៌មានធំៗជាច្រើនជុំវិញពិភពលោកបានរាយការណ៍ក្នុងពេលដំណាលគ្នាអំពីព្យុះភ្លៀងនៅទីក្រុងឌូបៃ ខណៈទីក្រុងនេះពុំដែលជួបប្រទះនូវគ្រោះធម្មជាតិបែបនេះពីមុនមក ដែលអាចនិយាយបានថានេះជាបរិបទនៃបញ្ហាការប្រែប្រួលអាកាសធាតុដែលកាន់តែគួរឱ្យព្រួយបារម្ភ។
VIDEO
យោងតាម កាសែត New York Times ប្រទេសអារ៉ាប់រួម បានកត់ត្រានូវភ្លៀងធ្លាក់ខ្លាំងបំផុតក្នុងរយៈពេល ៧៥ឆ្នាំដែលបណ្តាលឱ្យជើងហោះហើរជាបន្តបន្ទាប់ត្រូវបានពន្យារពេលជាបណ្តោះអាសន្ន ហើយភ្លៀងនឹងបន្តរហូតដល់ថ្ងៃទី ១៧ ខែមេសា។
រ៉យទ័រ បានរាយការណ៍ថា ព្យុះភ្លៀងធ្លាក់ដ៏ខ្លាំងក្លា បណ្តាលឱ្យមានទឹកជំនន់ដ៏គួរឱ្យភ័យខ្លាចនៅទីក្រុងឌូបៃកាលពីថ្ងៃទី១៦ខែមេសា នៅពេលដែលផ្លូវបានប្រែទៅជាទន្លេ ហើយទឹកបានជន់លិចចូលអគារ និងផ្ទះប្រជាពលរដ្ឋជាច្រើន។
ភ្លៀងធ្លាក់ខ្លាំងធ្វើឲ្យអ្នកបើកបរយានយន្តជាច្រើនត្រូវបង្ខំចិត្តបោះបង់យានជំនិះនៅលើដងផ្លូវ នៅពេលទឹកជន់ឡើង។ ហើយវីដេអូពីប្រព័ន្ធផ្សព្វផ្សាយសង្គមបានបង្ហាញពីទឹកហូរកាត់មជ្ឈមណ្ឌលលក់ទំនិញក្នុងតំបន់ និងបានជន់លិចជាន់ផ្ទាល់ដីនៃអគារជាច្រើនខ្នង។
ឌូបៃ ដូចជាប្រទេសដទៃទៀតនៃអារ៉ាប់រួម មានអាកាសធាតុក្តៅនិងស្ងួត ដូច្នេះ ភ្លៀងកម្រនឹងកើតមានណាស់ ហើយហេដ្ឋារចនាសម្ព័ន្ធមិនទាន់ត្រៀមខ្លួនជាស្រេចដើម្បីទប់ទល់នឹងព្រឹត្តិការណ៍ធ្ងន់ធ្ងរដែលបង្កឡើងដោយទឹកជំនន់។
ទីភ្នាក់ងារសារព័ត៌មានជាច្រើនក៏បានរាយការណ៍ថា នៅក្នុងប្រទេសអូម៉ង់ ជាប់ព្រំដែនប្រទេសអារ៉ាប់រួម ភ្លៀងធ្លាក់ខ្លាំងបានសម្លាប់មនុស្សយ៉ាងហោចណាស់ ១៨ នាក់កាលពីថ្ងៃទី១៦ ខែមេសា៕ ប្រភព៖ Zing News / hindus times / sky news
ចែករំលែកព័តមាននេះ