ទីក្រុងបាងកក៖ ថ្ងៃនេះ នាយករដ្ឋមន្ត្រីថៃ លោកសេដ្ឋា ថាក់វិស៊ីន ប្រកាសតែងតាំងដោយឥតបង្អង់យូរតទៅទៀតទេនូវតំណែងរដ្ឋមន្ត្រីការបរទេសស្ដីទីជំនួសលោកផានព្រីដែលបានដាក់ពាក្យលាឈប់យ៉ាងតក់ក្រហល់ និងគួរឱ្យភ្ញាក់ផ្អើលបំផុត។ ការលាលែងនេះធ្វើឡើងមិនយូរប៉ុន្មានបន្ទាប់ពីលោកអតីតរដ្ឋមន្ត្រីការបរទេសថៃរូបនេះដឹងច្បាស់ថានៅក្នុងសមាសភាពគណៈរដ្ឋមន្ត្រីថ្មីដែលទើបតែរុះរើកាលពីពេលថ្មីៗនោះ រូបលោកលែងជាឧបនាយករដ្ឋមន្ត្រីតទៅទៀតហើយ។
ជាជំហានដំបូង លោកសេដ្ឋាបានថ្លែងអំណរគុណចំពោះលោកផានព្រីដែលខិតខំបំពេញការងារកាលពីពេលកន្លងមក និងដែលមានទំនាក់ទំនងល្អនៅក្នុងរដ្ឋាភិបាលចម្រុះចាប់តាំងពីខែសីហា ឆ្នាំ២០២៣។ លោកប្រកាសតែងតាំងលោកភុំថាម វិឆាយ៉ាឆៃជារដ្ឋមន្ត្រីស្ដីទីនៅក្នុងសម័យអន្តរកាល មុនពេលជ្រើសរើសរដ្ឋមន្ត្រីពេញសិទ្ធិដើម្បីបំពេញមុខតំណែងនេះ។
លោកសេដ្ឋាសោកស្ដាយដែលលោកផានព្រីសម្រេចចិត្តបោះបង់ចោលមុខតំណែងដ៏សំខាន់នេះ និងក៏អរគុណលោកផងដែរដែលបានចូលរួមចំណែកនៅក្នុងរដ្ឋាភិបាលចម្រុះកាលពីពេលកន្លងមក។ លោកថ្លែងថាលោកទាំងពីរបានស្គាល់គ្នាជិតស្និទ្ធរយៈពេលដប់ឆ្នាំមកហើយ។ លោកភុំថាមសព្វថ្ងៃនេះក្នុងនាមជាឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្មនឹងកាន់តំណែងនេះជាបណ្ដោះអាសន្នរហូតដល់គណៈកម្មការចំពោះកិច្ចជ្រើសរើសបានអ្នកជំនួសតំណែងលោកផានព្រី។
លោកសេដ្ឋាមិនបានប្រកាសថាតើបេក្ខជនរូបណានឹងក្លាយជារដ្ឋមន្ត្រីការបរទេសថ្មីទេ។ លោកថាមានតែបេក្ខជនដែលមានបទពិសោធការទូត, នយោបាយ និងជាអ្នកដង្ហែតាមមាគ៌ានយោបាយរបស់គណបក្សភឿថៃទើបអាចកាន់មុខតំណែងនេះបាន។ សូមរំលឹកថាលោកផានព្រីនៅសុខៗស្រាប់តែប្រកាសលាលែងពីមុខតំណែង និងផ្ទេរភារកិច្ចគ្រប់យ៉ាងដែលថ្នាក់លើប្រគល់ជូនលោកត្រឡប់ទៅវិញបន្ទាប់ពីដឹងថាតំណែងឧបនាយករដ្ឋមន្ត្រីបានរបូតចេញពីដៃរបស់លោកបាត់ទៅហើយ។
លោកធ្លាប់ជារដ្ឋមន្ត្រីការបរទេសផង, ជាឧបនាយករដ្ឋមន្ត្រីផង និងជាប្រធានគណៈកម្មការពិសេសរបស់រដ្ឋាភិបាលទទួលបន្ទុកខាងដោះស្រាយបញ្ហាភូមា។ លោកយល់ថាការដែលគេដកហូតតំណែងឧបនាយករដ្ឋមន្ត្រីនោះមិនមែនដោយសារលោកអសមត្ថភាពទេ។ លោកបានលះបង់ច្រើនណាស់នៅក្នុងនយោបាយការទូត និងទំនាក់ទំនងសេដ្ឋកិច្ចអន្តរជាតិ។
លោកបានរៀបរាប់សមិទ្ធផលដែលសម្រេចបានកន្លងមកដូចជាទី១-ការទាក់ទាញវិនិយោគិនបរទេសទៅបណ្ដាក់ទុននៅប្រទេសថៃ, ទី២-ការយកចិត្តទុកដាក់ខ្ពស់ចំពោះជនជាតិថៃនៅបរទេស, ទី៣-ការចរចាដោយផ្ទាល់ជាមួយក្រុមហាម៉ាស់ដើម្បីដោះលែងចំណាប់ខ្មាំងជនជាតិថៃ២៣នាក់, ទី៤-លោកខិតខំជម្លៀសជនជាតិថៃ៨ពាន់នាក់ចេញពីអ៊ីស្រាអែល និងទី៥-លោកខិតខំជម្លៀសជនជាតិថៃ១ពាន់នាក់ចេញពីការប្រយុទ្ធគ្នានៅភូមា។ នេះគ្រាន់តែជាសមិទ្ធផលត្រួសៗតែប៉ុណ្ណោះ។
ក្រៅពីនេះ លោកបានចូលរួមរៀបចំគោលនយោបាយលើកលែងទិដ្ឋាការជាមួយរដ្ឋបរទេសមួយចំនួនដើម្បីទាក់ទាញអ្នកទេសចរ។ លោកក៏ជួយធ្វើឱ្យទំនាក់ទំនងកាន់តែប្រសើរជាមួយសមាជិកអាស៊ាន, សហភាពអឺរ៉ុប, ឥណ្ឌា, អាមេរិក និងចិន។ គេមិនទាន់ដឹងថាតើការលាលែងពីតំណែងនេះដោយសារគេដកគាត់ចេញពីតំណែង ឬដោយសារគាត់អាក់អន់ស្រពន់ចិត្តដែលមិនបានតំណែងឧបនាយករដ្ឋមន្ត្រី? ជាទូទៅ កាលណានាយករដ្ឋមន្ត្រី ឬប្រធានាធិបតី និងរដ្ឋមន្ត្រីដែលជាអ្នកក្រោមឱវាទចាប់ផ្ដើមខ្វែងគំនិតគ្នា, ធ្វើការមិនត្រូវគ្នា ឬមានគោលនយោបាយមិនស៊ីសង្វាក់គ្នា អ្នកដែលត្រូវដើរចេញគឺរដ្ឋមន្ត្រី៕
ចែករំលែកព័តមាននេះ