រកឃើញព្រះកេសទេវតាមួយអង្គ នៅខ្លោងទ្វារជ័យ នៃក្រុងអង្គរធំ
- សៀមរាប
ក្រុមការងារស្រាវជ្រាវ នៃនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានអះអាងថា ព្រះកេសទេវតាមួយអង្គ ត្រូវបានស្រាវជ្រាវរកឃើញនៅខ្លោងទ្វារជ័យ
ក្រុមការងារស្រាវជ្រាវ នៃនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានអះអាងថា ព្រះកេសទេវតាមួយអង្គ ត្រូវបានស្រាវជ្រាវរកឃើញនៅខ្លោងទ្វារជ័យ នៃក្រុងអង្គរធំ ។
អាជ្ញាធរជាតិអប្សរា បានឲ្យដឹងថា ការរកឃើញនេះ គឺតាមរយៈការធ្វើកំណាយស្រាវជ្រាវ ក្នុងរណ្ដៅនៅខ្លោងទ្វារជ័យ នៃក្រុងអង្គរធំ ពោលគឺនៅបាតគ្រឹះខាងផ្នែកទេវតា ទាញព្រ័ត្រតែម្តង។
លោក អន សុភាព បុរាណវិទូ ដែលកំពុងធ្វើកំណាយនៅខ្លោងទ្វារជ័យ បានបញ្ជាក់ថា ជាងពីរសប្ដាហ៍មកហើយ ក្រុមការងារបស់លោកបាននិងកំពុងធ្វើកំណាយ ស្រាវជ្រាវបុរាណវិទ្យា នៅខ្លោងទ្វារជ័យនេះ។
លោកបញ្ជាក់ថា ការងារនេះ ធ្វើឡើងក្នុងបំណងពិនិត្យមើលរចនាសម្ព័ន្ធបាតគ្រឹះ ចម្លាក់កូរសមុទ្រទឹកដោះ ដើម្បីរៀបចំបង្គ្រប់ឯកសារក្នុងគម្រោងជួសជុលចំណុចនេះឡើងវិញ។
តាមការលើកឡើងរបស់លោក អន សុភាព ជាការចៃដន្យ ក្នុងពេលក្រុមការងារលោកកំពុងកំណាយនោះ ក៏បានប្រទះឃើញព្រះកេសមួយនៅស្អាត កប់ក្នុងរណ្ដៅជើងគ្រឹះ ទេវតាទាញព្រ័ត្រតែម្ដង។
ក្រោយការសិក្សា និងពិនិត្យ អ្នកជំនាញសន្និដ្ឋានថា ព្រះកេសនោះ បានបាក់ធ្លាក់ពីរូបទេវតា នៅចំណុចលេខទី២៣ បើរាប់ពីជួរខាងមុខមក។ ព្រះកេស ធ្វើពីថ្មភក់នេះ មានបណ្ដោយ ២០ស.ម ទទឹង១១ស.ម និងកម្ពស់ ១២ស.ម។
ក្រោយកំណាយស្រាវជ្រាវបានមួយផ្នែកធំ អ្នកជំនាញបានសន្និដ្ឋានថា គ្រឹះចម្លាក់ កូរសមុទ្រទឹកដោះ នៅខ្លោងទ្វារជ័យនេះ នៅមានភាពមាំល្អ ព្រោះធ្លាប់បានជួសជុលម្ដងនៅសម័យកណ្ដាល និងសម័យបារាំង។
លោក អន សុភាព បញ្ជាក់ថា តាមការឱ្យយោបល់ពីអ្នកពាក់ព័ន្ធ គេត្រូវកំណាយស្រាវជ្រាវ នៅផ្នែកខាងលើបន្ថែមទៀត មើលស្ថានភាពតួស្ពានទាំងមូល ដើម្បីមើលស្ថានភាពជួសជុលនៅពេលនោះឱ្យបានល្អិតល្អន់ មុននឹងមានគម្រោងជួសជុលចម្លាក់ កូរសមុទ្រទឹកដោះ នាពេលខាងមុខ៕
ដោយ ៖ ស ផាន់
ចែករំលែកព័តមាននេះ