រដ្ឋមន្ត្រីការបរទេសចិននឹងមកទស្សនកិច្ចកម្ពុជា
រដ្ឋមន្ត្រីការបរទេសចិនលោក វ៉ាង យី នឹងធ្វើទស្សនកិច្ចក្នុងប្រទេសកម្ពុជា ឥណ្ឌូនេស៊ី និងប៉ាពួញូហ្គីណេ ចាប់ពីថ្ងៃទី១៨ ដល់ថ្ងៃទី២៣ ខែមេសា។ យោងតាម…
រដ្ឋមន្ត្រីការបរទេសចិនលោក វ៉ាង យី នឹងធ្វើទស្សនកិច្ចក្នុងប្រទេសកម្ពុជា ឥណ្ឌូនេស៊ី និងប៉ាពួញូហ្គីណេ ចាប់ពីថ្ងៃទី១៨ ដល់ថ្ងៃទី២៣ ខែមេសា។
យោងតាម ទីភ្នាក់ងារព័ត៌មានចិន ស៊ីន ហួរ បានអោយដឹងថា អ្នកនាំពាក្យក្រសួងការបរទេសចិន Lin Jian បាន ប្រកាស កាលពីថ្ងៃអង្គារថា រដ្ឋមន្ត្រីការបរទេសចិន លោក វ៉ាង យី នឹងទៅបំពេញទស្សនកិច្ចផ្លូវការនៅប្រទេសឥណ្ឌូនេស៊ី កម្ពុជា និងប៉ាពួញូហ្គីណេ ចាប់ពីថ្ងៃទី១៨ ដល់ថ្ងៃទី២៣ ខែមេសា ។
នៅកម្ពុជាលោក វ៉ាង យី នឹងចូលរួមដឹកនាំប្រជុំ គណកម្មាធិការសម្របសម្រួលអន្តររដ្ឋាភិបាល ។ ប៉ុន្តែមិនមានព័ត៌មានលម្អិតស្តីពី របៀបវារ:នៃកិច្ចប្រជុំនោះឡើយ ។ ក្រសួងការបរទេសកម្ពុជាមិនទាន់មានសេចក្តីប្រកាសព័ត៌មានអំពីទស្សនកិច្ចរបស់លោកវ៉ាង យី នៅឡើយទេ ។
ទស្សនកិច្ចរបស់លោកវ៉ាង យី មកកម្ពុជាកើតមាន នៅចំពេលដែលកម្ពុជាបានប្រតិកម្មខ្លាំងបដិសេធចំពោះការចោទប្រកាន់ដែលថា គម្រោងព្រែកជីកតេជោ ហ្វូណននឹងអាចសម្រួលដល់ការចល័តកងទ័ពចិនខិតជិតចូលទឹកដីវៀតណាម ។ កម្ពុជាបានចាត់ទុកគម្រោងដែលមានតម្លៃ១, ៧ ពាន់លានដុល្លារ គឺដើម្បីការរីកចម្រើនសេដ្ឋកិច្ច និងសង្គម ហើយកម្ពុជាមិនអនុញ្ញាតអោយមានវត្តមាន កងទ័ពបរទេសនៅកម្ពុជាឡើយ ៕
ចែករំលែកព័តមាននេះ