ពិធីបុណ្យសាសនានារបស់ខ្មែរ មិនថាបុណ្យចូលឆ្នាំថ្មី និងបុណ្យភ្ជុំបិណ្ឌនោះទេ ដូនតាខ្មែរបានបង្ហាត់បង្រៀននាំឱ្យកូនចៅរបស់ខ្លួនធ្វើបុណ្យជាមួយឪពុកម្តាយ ដែលគេហៅថា ព្រះរស់ និងធ្វើបុណ្យជាមួយព្រះសង្ឃនៅឯវត្តអារាម។ ក្រៅពីនោះពិធីបុណ្យនីមួយៗ តែងភ្ជាប់នឹងការកម្សាន្តសប្បាយ ។…
ពិធីបុណ្យសាសនានារបស់ខ្មែរ មិនថាបុណ្យចូលឆ្នាំថ្មី និងបុណ្យភ្ជុំបិណ្ឌនោះទេ ដូនតាខ្មែរបានបង្ហាត់បង្រៀននាំឱ្យកូនចៅរបស់ខ្លួនធ្វើបុណ្យជាមួយឪពុកម្តាយ ដែលគេហៅថា ព្រះរស់ និងធ្វើបុណ្យជាមួយព្រះសង្ឃនៅឯវត្តអារាម។ ក្រៅពីនោះពិធីបុណ្យនីមួយៗ តែងភ្ជាប់នឹងការកម្សាន្តសប្បាយ ។
ចូលឆ្នាំជាឱកាសជួបជុំក្រុមគ្រួសារខ្មែរ ។ ខ្មែរទោះបីធ្វើដំណើរទៅសិក្សា ទៅរស់នៅ ទៅរកស៊ីនៅកន្លែងណា ឱ្យតែដល់ឱកាសចូលឆ្នាំមកដល់ តែងតែនាំគ្នាធ្វើដំណើរត្រឡប់មកស្រុកកំណើតវិញ ដើម្បីជួបជុំញាតិមិត្ត ធ្វើបុណ្យទាន និងសប្បាយរីករាយ។
វាជាឱកាសដ៏ល្អសម្រាប់កូនចៅដើម្បីធ្វើបុណ្យជាមួយព្រះរស់ គឺឪពុកម្តាយនិងដើម្បីសម្តែងការដឹងគុណដល់ពួកគាត់។ ម្ល៉ោះហើយ កូនចៅក៏នាំគ្នាទៅកាន់ស្រុកឪពុកម្តាយ។ ប៉ុន្តែទន្ទឹមនោះ ក៏មាន បញ្ហាតូច មួយអាចកើតឡើង ហើយក៏ជាជម្លោះផងដែរ។ នោះគឺខាងប្រពន្ធអាចចង់ទៅស្រុកកំណើតរបស់ឪពុកម្តាយខាងប្រពន្ធ ខណះដែលខាងប្តីអាចចង់ទៅលេងស្រុកកំណើតឪពុកម្តាយខាងប្តី។
អ្នកខ្លួនមួយ ឬជាមនុស្សនៅលីវ ងាយស្រួល ឱ្យតែថ្ងៃចូលឆ្នាំថ្មី មកដល់គឺពួកគេធ្វើដំណើរទៅផ្ទះជួបម៉ែឪ បងប្អូន។ ប៉ុន្តែមានអ្នកគូ ជាប្តីប្រពន្ធ ពេលខ្លះការសម្រេចចិត្តទៅស្រុកជារឿងមួយលំបាក និងអាចឈាន ដល់មាន ជម្លោះទៀតផង។ ជម្លោះអាចកើតមានដោយសារប្រពន្ធចង់ទៅស្រុកខ្លួន ចំណែកស្វាមី ក៏ចង់ទៅស្រុកខ្លួន។
ឆ្នាំនេះ លោកអ្នកសម្រេចចិត្តទៅណា សម្រាប់អ្នកគួទៅស្រុកខ្លួន ឬស្រុកប្រពន្ធ?
ចម្លើយមួយ ដែលមិនអាចឱ្យមានជម្លោះ គឺថាបើឆ្នាំមុនបានទៅស្រុកខាងស្វាមី ឆ្នាំនេះប្រាកដណាស់គឺទៅ ស្រុកភរិយាម្តង។ ឬថា បើឆ្នាំនេះយើងទៅស្រុកភរិយា គួរជជែកគ្នាឱ្យស្រេចថាឆ្នាំក្រោយទៅស្រុកខាងស្វាមីវិញម្តង។
រឿងតូចតាចប៉ុន្តែវាអាចធ្វើឱ្យគូស្វាមីភរិយាមិនសប្បាយចិត្តដែរ។ បើមិនបាននិយាយគ្នា ឬម្នាក់ៗមានះរៀងៗខ្លួននោះ។ កុំមានះតែយោគយល់គ្នាម្តងទៅខាងនេះ ម្តងទៅខាងនោះ ជីវិតគូស្រករនឹងមានសេចក្តីសុខ ឪពុកម្តាយសប្បាយចិត្តរីករាយនៅក្នុងឱកាសចូលឆ្នាំថ្មី ហើយទេវតាឆ្នាំថ្មីនឹងឱ្យពរជ័យដល់លោក។
នៅពេលចូលឆ្នាំថ្មី តាមទម្លាប់ខ្មែរនិយាយលេងល្បែងប្រជាប្រិយដ៏ច្រើនសម្បូរបែបរបស់ខ្លួន មានល្បែង ចោលឈូង លោតអន្ទាក់ ស្តេចចង់ ចាប់កូនខ្លែង លាក់កន្សែង បោះអង្គញ់ ទាញព្រ័ត្រ ជាដើម។
ការសប្បាយរីករាយពិធីបុណ្យចូលឆ្នាំបច្ចុប្បន្ន មានការកម្សាន្តសប្បាយផ្សេងៗគ្នា តាមការនិយមពលរដ្ឋ នៅក្នុងតំបន់នីមួយៗ។ ខេត្តខ្លះចូលចិត្តរាំវង់ ខេត្តខ្លះចូលចិត្តលេងប៉ាតម្សៅ បាញ់ទឹកជាដើម។
ក្រៅពីការសប្បាយ ពលរដ្ឋខ្មែរតែងតែជួបជុំគ្នាទទួលទានអាហារតាមគ្រួសារនីមួយៗផងដែរ។ ចូលឆ្នាំនេះ ដែលត្រូវនឹងឆ្នាំរោងនោះ មានរយៈពេល៤ថ្ងៃគឺពីថ្ងៃទី១៣ដល់ថ្ងៃទី១៦ខែមេសាឆ្នាំ២០២៤។ អាជ្ញាធរបាន អំពាវនាវពលរដ្ឋមានការប្រុងប្រយ័ត្ន ថែរក្សាសុវត្ថភាព សណ្តាប់ធ្លាប់សង្គម។ ដើម្បីបង្កបរិយាកាសកាស់តែសប្បាយរីករាយគេមិនគួរលេងល្បែងណាដែលនាំឱ្យមានគ្រោះថ្នាក់ដល់ខ្លួននិងអ្នកដទៃនោះទេ។
កោះសន្តិភាពសូមបូងដល់ទេវតាឆ្នាំថ្មី ប្រទានពរជ័យនិងតាមថែរក្សាបីបាច់ដល់ពលរដ្ឋខ្មែរ គ្រប់រូប ទទួល បាននូវសេចក្តីសុខ សប្បាយរីករាយគ្រប់ក្រុមគ្រួសារ មានសុវត្ថិភាពក្នុងការធ្វើដំណើរទៅទីជិតទីឆ្ងាយ៕
ចែករំលែកព័តមាននេះ