បរទេស ៖ ត្រី​ចិញ្ចឹម​ក្នុង​ដៃទន្លេ​របស់​ពលរដ្ឋ​វៀតណាម​បាន​ងាប់​យ៉ាង​រង្គាល​ជាង​៣០០​តោន ដោយ​អ្នកជំនាញ​ព្រមាន​ថា វិនាសកម្ម​នេះ​នឹង​បន្ត​កើត​មាន​ដោយ​មិន​អាច​បញ្ឈប់​បាន​ឡើយ ។
តំបន់​វារីវប្បកម្ម​តាម​ដង​ទន្លេ​ដ៏​ល្បីល្បាញ​មួយ​ប្រចាំ​ប្រទេស​វៀតណាម ត្រូវ​បាន​រាយការណ៍​ពី​វិនាសកម្ម​ត្រី​ងាប់​អណ្តែត​ពណ៌​ស​ពាសពេញ​ផ្ទៃ​ទឹក​ក្នុង​ចំនួន​រាប់រយ​តោន​។

យោង​តាម​សារព័ត៌មាន​វៀតណាម VN Express ចេញផ្សាយ​នៅ​ថ្ងៃ​ទី​០៨ ខែមេសា បានឱ្យ​ដឹង​ថា ត្រី​ច​ញ្ចឹ​ម​រាប់រយ​តោន​ដែល​ងាប់ យ៉ាង​រង្គាល​នេះ គឺជា​ត្រី​ចិញ្ចឹម​របស់​ប្រជាពលរដ្ឋ​វៀតណាម​ប្រមាណ​៥១​គ្រួសារ ក្នុង​ចំណោម​​អ្នក​ចិញ្ចឹម​ត្រី​រាប់​ពាន់​គ្រួសារ​តាម​ដង​ទន្លេ Thai Binh ក្នុង​ខេត្ត Hai Duong ស្ថិត​ក្នុង​តំបន់​ដីសណ្ដ​ទន្លេ​ក្រហម ភាគ​ខាងជើង​វៀតណាម​។

បច្ចុប្បន្ន នៅ​ក្នុង​ខេត្ត Hai Duong មាន​បែ​ចិញ្ចឹម​ត្រី​ជិត​៧៤០០​កន្លែង​នៅ​តាម​ដង​ទន្លេ ហើយ​បាតុភូត​ត្រី​ងាប់​ត្រូវ​បាន​រាយការណ៍​ថា បាន​ចាប់ផ្តើម​ឡើង​តាំងពី​ថ្ងៃ​ទី​២០ មីនា បន្ត​រហូត​មក​ដល់​ពេល​នេះ នៅ​តាម​បណ្តា​ស្រុក​ក្រុង​ចំនួន​៥ ដែល​សរុប​ត្រួស​ៗ​ត្រី​រាប់រាប់​លាន​ក្បាល​នេះ ស្មើនឹង​ប្រមាណ​​៣០០​តោន​ដោយ​គ្រួសារ​ខ្លះ​បាន​អះអាង​ពួក​គេ​បាន​បាត់បង់​ត្រី​ប្រហែល​១៥​តោន ហើយ​ត្រី​ងាប់​ទាំងនោះ​ត្រូវ​គេ​បោះចោល​ក្នុង​ទន្លេ ដែល​បង្ករ​ឱ្យ​មាន​ផល​ប៉ះពាល់​យ៉ាង​ខ្លាំង​ដល់​បរិស្ថាន ។

ជុំវិញ​មូលហេតុ​ដែល​បណ្តាល​ឱ្យ​កើត​មាន​បាតុភូត​ត្រី​ងាប់​រាប់រយ​តោន ត្រូវ​បាន​មន្ទីរ​បរិស្ថាន និង​នាយកដ្ឋាន​ជលផល​បាន​បើក​ការ​ស៊ើបអង្កេត ដោយ​យក​គំរូ​ទឹកទន្លេ​ទៅ​ធ្វើតេស្ត​នៅ​មន្ទីរ​ពិសោធន៍ ។

លោកស្រី Pham Thi Dao អនុប្រធាន​មន្ទីរ​កសិកម្ម​ខេត្ត Hai Duong បាន​និយាយ​ប្រាប់​អ្នក​សារ​ព័ត​មាន​នា​រសៀល​ថ្ងៃ​ទី​៨ មេ​សា ថា លទ្ធផល​នៃ​ការ​ធ្វើតេស្ត​លើ​គុណភាព​ទឹក​នៅ​ទីតាំង​ដែល​មាន​ត្រី​ងាប់​ជា​ច្រើន​បាន​រក​ឃើញ​ថា អុកស៊ីហ្សែន​ក្នុង​ទឹក​មាន​កម្រិត​ទាប​ណាស់ ហើយ​កំហាប់​ឧស្ម័ន​ពុល​មាន​កម្រិត​ខ្ពស់​»​។

ដោយឡែក មន្ត្រី​មន្ទីរ​បរិស្ថាន​ខេត្ត​បាន​បញ្ជាក់​ថា ត្រី​ងាប់​ដោយសារ​ខ្វះ​អុកស៊ីហ្សែន ប៉ុន្តែ​មូលហេតុ​នៃ​កង្វះ​អុកស៊ីហ្សែន​មិន​ទាន់​កំណត់​បាន​ច្បាស់លាស់​នៅឡើយ​ទេ តែ​ការ​សន្និដ្ឋាន​បឋម​ដោយសារ​តែ​ការ​ប្រែប្រួល​អាកាសធាតុ និង​លំហូរ​មិន​គ្រប់គ្រាន់​។

បើ​តាម​ម្ចាស់​បែ​ចិញ្ចឹម​ត្រី​បាន​និយាយ​ដោយ​ស្រងូត​ស្រ​ងាប់​ថា «​ត្រី​កាហោ ត្រី​កាប និង​ត្រី​ទី​ឡា​ព​យ៉ា​ក្រហម ទម្ងន់​ពី ២ ទៅ ៦​គីឡូក្រាម រាប់​ម៉ឺន​ក្បាល​បាន​ងាប់​អស់​គ្មាន​សល់ ហើយ​ត្រី​ងាប់​ច្រើន​បែប​នេះ​បណ្តាល​ឱ្យ​មានការ​ខូចខាត​រាប់​សិប​ពាន់​លាន​ដុ​ង​។ ពួក​គេ​សង្ស័យ​ថា ទឹកទន្លេ Thai Binh រង​ការ​ការ​បំពុល​។

ឆ្លើយ​តប​នឹង​ការ​ខាតបង់​របស់​ពលរដ្ឋ លោក Bui Van Thang ប្រធាន​នាយកដ្ឋាន​កសិកម្ម ខេត្ត​Hai Duong បាន​ជំរុញ​អ្នក​ចិញ្ចឹម​ត្រី​ឱ្យ​តាមដាន​យ៉ាង​ដិត​ដល់​នូវ​ការ​ព្យាករណ៍​អាកាសធាតុ និង​ការ​ប្រែប្រួល​អាកាសធាតុ​។ លោក​ថា នៅ​ពេល​ដែល​គុណភាព​ទឹក​មានការ​ប្រែប្រួល ត្រី​នឹង​បង្ហាញ​សញ្ញា​មិន​ចង់ស៊ី​ចំណី ហែល​យឺត​ៗ ឬ​អណ្តែត​លើ​ផ្ទៃ​ទឹក ដែល​ចំណុច​នេះ​ចាំបាច់​ត្រូវ​ចាត់វិធានការ​បន្ទាន់ ដូច​ជា​ការ​បង្កើន​អុកស៊ីហ្សែន ការ​ផ្លាស់​ប្តូរ​ទឹក និង​សម្អាត​បែ​ចិញ្ចឹម​ត្រី​ឱ្យ​បាន​ទៀងទាត់​។

ជា​ពិសេស នៅ​ពេល​កម្ពស់​ទឹកទន្លេ​ធ្លាក់​ចុះ អ្នក​ចិញ្ចឹម​ត្រី​ទាំងអស់​ត្រូវ​ទម្លាក់​បែ​ត្រី​ចុះ ដើម្បី​កាត់​បន្ថយកម្តៅ ចៀសវាង​កង្វះ​អុកស៊ីហ្សែន ហើយ​ត្រូវ​កាត់​បន្ថយ​បរិមាណ​ចំណី តែ​បន្ថែម​វីតាមីន និង​សារធាតុចិញ្ចឹម​សំខាន់​ៗ​។

បញ្ហា​មួយទៀត មន្ត្រី​បរិស្ថាន​អំពាវនាវ​ថា សូម​បងប្អូន​យក​ត្រី​ងាប់​ទាំងអស់​ទៅ​កប់ ដោយ​ចៀសវាង​បោះ​ក្នុង​ទន្លេ​ដែល​ធ្វើ​ឱ្យ​ការ​បំពុលបរិស្ថាន និង​ការ​រីក​រាលដាល​នៃ​ជំងឺ​។ ទោះជា​បែប​នេះ​ក្តី ត្រី​ដែល​ងាប់​ត្រូវ​បាន​គេ​ប្រទះ​ឃើញ​អណ្តែត​ពាសពេញ​ទន្លេ Thai Binh ហើយ​បានរ​សាត់អណ្តែត​ទៅ​បណ្តា​ចូល​ទន្លេ​ផ្សេង​ៗ ជំរុញ​ក្រុម​មន្ត្រី​បរិស្ថាន​ជា​ច្រើន​នាក់​ត្រូវ​បាន​បញ្ជូន​ទៅ​ប្រមូល​យក​សាកសព​ត្រី​ទាំងនោះ​ចេញពី​ទន្លេ​។

ដើម្បី​ជួយ​ដល់​អ្នក​ចិញ្ចឹម​ត្រី​ដែល​រង​ការ​ខាតបង់ អាជីវករ និង​ប្រជាជន​ជា​ច្រើន​នៅ​ក្នុង​តំបន់ បាន​ចុះ​ទៅ​ប្រមូល​ទិញ​ត្រី​ដែល​មិន​ទាន់​ងាប់ ដើម្បី​យក​មក​លក់​នៅ​លើ​ទីផ្សារ ប៉ុន្តែ​ទោះ​យ៉ាងណា​ក៏​ដោយ​ត្រី​រាប់​ពាន់​តោន​ត្រូវ​បាន​គេ​ជឿ​ថា នឹង​បន្ត​ងាប់​ជា​បន្តបន្ទាប់​ព្រោះតែ​ស្ថានភាព ជាក់ស្តែង​មិន​មាន​សញ្ញា​ប្រសើរ​និង​វិធានការ​ណា​អាច​ទប់ស្កាត់​វិនាសកម្ម​នេះ​បាន​ឡើយ​៕ ​