ខេត្តបាត់ដំបង ៖ ដំណាំស្វាយកែវរមៀតដែលមានលាយឡំដំណាំផ្សេងៗទៀតខ្លះៗផងរបស់អ្នកភូមិ ត្រូវអគ្គិភ័យឆេះរោលខ្លោចខូចខាតអស់ស្ទើរពាក់កណ្ដាលនៃផ្ទៃដីសរុបទំហំ៨០ហិកតា នៅចំណុចស្រែព្រីង ស្ថិតក្នុងភូមិធ្ង័រ ឃុំចែងមានជ័យ ស្រុកបាណន់ តែរហូតមកដល់ពេលនេះ គេមិនទាន់ដឹងពីមូលហេតុ…
ខេត្តបាត់ដំបង ៖ ដំណាំស្វាយកែវរមៀតដែលមានលាយឡំដំណាំផ្សេងៗទៀតខ្លះៗផងរបស់អ្នកភូមិ ត្រូវអគ្គិភ័យឆេះរោលខ្លោចខូចខាតអស់ស្ទើរពាក់កណ្ដាលនៃផ្ទៃដីសរុបទំហំ៨០ហិកតា នៅចំណុចស្រែព្រីង ស្ថិតក្នុងភូមិធ្ង័រ ឃុំចែងមានជ័យ ស្រុកបាណន់ តែរហូតមកដល់ពេលនេះ គេមិនទាន់ដឹងពីមូលហេតុ ដែលនាំឲ្យមានអគ្គិភ័យដ៏មហន្តរាយនេះនៅឡើយទេ ។
មន្ត្រីមូលដ្ឋានបានរាយការណ៍ថា ដំណាំស្វាយកែវរមៀត រួមជាមួយដំណាំផ្សេងៗខ្លះផង ប្រមាណ៤០% នៅលើផ្ទៃដីសរុបចំនួន៨០ហិចតា ត្រូវអគ្គិភ័យឆេះរោលខ្លោចខូចខាតអស់គ្មានសល់ ។ ប្រភពដដែលបានប្រាប់ថា ម្ចាស់ចម្ការស្វាយដ៏ធំសម្បើមនេះត្រូវគេស្គាល់ថា ឈ្មោះ ឡុង សយសុធី ភេទប្រុស ។ ម្ចាស់ចម្ការនេះមិនទាន់បានដឹងច្បាស់ពីមូលហេតុ ដែលនាំឲ្យមានអគ្គិភ័យកើតឡើងក្នុងចម្ការគាត់នៅឡើយទេ ។ ព្រោះទាំងម្ចាស់ចម្ការ ទាំងសមត្ថកិច្ចកំពុងប្រឹងប្រែងពន្លត់ភ្លើង ។
គិតត្រឹមម៉ោង៩ព្រឹថ្ងៃទី៩ មេសា ក៏គេពុំទាន់ស្រាវជ្រាវរកឃើញមូលហេតុនៃអគ្គិភ័យនេះនៅឡើយដែរ។ អធិការស្រុកបាណន់ លោក សំ វីរៈ បានប្រាប់ថា រហូតមកដល់ពេលនេះយើងនៅមិនទាន់ដឹងឲ្យច្បាស់លាស់អំពីទំហំនៃការខូចខាត និងពីមូលហេតុនៃអគ្គិភ័យដែលបានកើតឡើងនៅឡើយទេ ព្រោះរង់ចាំជួបសួរនាំម្ចាស់ចម្ការផ្ទាល់សិន ។ លោកអធិការបានបញ្ជាក់ថា ពេលនេះ យើងកំពុងរង់ចាំជួបម្ចាស់ចម្ការ ដើម្បីសួរនាំ និងចុះពិនិត្យទីតាំងកើតហេតុជាក់ស្ដែង ។
ជុំវិញអគ្គិភ័យឆេះដាំំណាំស្វាយកែវរមៀតរាប់សិបហិចតាខាងលើនេះ បើតាមប្រភពព័ត៌មានបានឲ្យដឹងថា អគ្គិភ័យនោះទំនងបានចាប់ផ្ដើមពីខាងព្រំដីចម្ការ ហើយក៏ឆេះរាលដាលចូលក្នុងចម្ការស្វាយដ៏ធំនេះតែម្ដង តែគេពុំអាចស្មានដឹងពីមូលហេតុដំបូងទេ ។ នេះគ្រាន់តែជាការប៉ាន់ស្មានបឋម ដែលមនុស្សមួយចំនួនបានឃើញ និងជួយអន្តរាគមន៍ពន្លត់ ។
ប្រភពបានបញ្ជាក់ថា អគ្គិភ័យនោះបានឆាបឆេះរាលដាលកាន់តែខ្លាំង រហូតសមត្ថកិច្ចបញ្ជូនរថយន្តទឹកមកជួយពន្លត់ ទើបទប់ស្កាត់បាន ។ បើតាមមន្ត្រីរដ្ឋបាលឃុំចែងមានជ័យបានប្រាប់ថា រថយន្តពន្លត់អគ្គិភ័យរបស់អធិការស្រុកបាណន់មួយគ្រឿង និងរថយន្តពន្លត់អគ្គីភ័យរបស់អធិការស្រុករតនមណ្ឌលមួយគ្រឿង បានជួយអន្តរាគមន៍បាញ់ទឹកពន្លត់អគ្គិភ័យដែលគេមិនទាន់ដឹងប្រភពនេះ ។
មន្ត្រីរដ្ឋបាលដដែលបានបញ្ជាក់ថា តុល្យការនៃការខូចខាតបឋម ដែលពិនិត្យឃើញជាក់ស្ដែង អគ្គិភ័យបានបំផ្លាញដំណាំស្វាយ និងដំណាំដទៃៗទៀតអស់ប្រហែល៤០% នៃផ្ទៃដីសរុបចំនួន៨០ហិកតា។ ប៉ុន្តែយ៉ាងណា បើតាមលោក សំ វីរៈ អធិការស្រុកបាណន់ បានបញ្ជាក់ថា មន្ត្រីជំនាញ និងអាជ្ញាធរស្រុក កំពុងរៀបចំចុះទៅពិនិត្យផ្ទាល់ដល់ដីចម្ការហើយ ៕
ចែករំលែកព័តមាននេះ