ខេត្តបាត់ដំបង ៖ កម្លាំងអង្គភាពកំចាត់មីន«ស៊ីម៉ាក់»បានចុះទៅដោះយកគ្រាប់មីនប្រឆាំងរថក្រោះ(មីនតោន)ចំនួន០៣គ្រាប់ដែលគេកប់ត្រូតលើគ្នាក្នុងរណ្ដៅតែមួយនៅក្នុងដីចម្ការរបស់ពលរដ្ឋមួយកន្លែង កាលពីថ្ងៃទី០៨ មេសា នៅភូមិអូរចំណិប ឃុំតាស្ដា ស្រុកសំពៅលូន ក្រោយពីម្ចាស់ចម្ការបានប្រទះឃើញ ហើយរាយការណ៍ជូនអាជ្ញាធរ…
ខេត្តបាត់ដំបង ៖ កម្លាំងអង្គភាពកំចាត់មីន«ស៊ីម៉ាក់»បានចុះទៅដោះយកគ្រាប់មីនប្រឆាំងរថក្រោះ(មីនតោន)ចំនួន០៣គ្រាប់ដែលគេកប់ត្រូតលើគ្នាក្នុងរណ្ដៅតែមួយនៅក្នុងដីចម្ការរបស់ពលរដ្ឋមួយកន្លែង កាលពីថ្ងៃទី០៨ មេសា នៅភូមិអូរចំណិប ឃុំតាស្ដា ស្រុកសំពៅលូន ក្រោយពីម្ចាស់ចម្ការបានប្រទះឃើញ ហើយរាយការណ៍ជូនអាជ្ញាធរ ។
ប្រភពពីមន្ត្រីស៊ីម៉ាក់បានឲ្យដឹងថា គ្រាប់មីនតោនទាំង០៣គ្រាប់នោះ ត្រូវគេដាក់ត្រូតលើគ្នាកប់ក្នុងរណ្ដៅតែមួយ ស្ថិតក្នុងដីចម្ការកសិករម្នាក់ ដែលគាត់ធ្លាប់ភ្ជួរដាំដុះជារៀងរាល់ឆ្នាំ ។ ប្រភពបានបញ្ជាក់ថា ក្រោយពេលគាត់ភ្ជួររួចរាល់ ដែលត្រៀមរង់ចាំធ្លាក់ភ្លៀងដើម្បីចូលដាំដុះ ក៏ស្រាប់តែគាត់ប្រទះឃើញគ្រាប់មីនដែលហើបចេញពីក្នុងដីចម្ការ ធ្វើឲ្យគាត់មានការភ្ញាក់ផ្អើល ហើយក៏បានរាយការណ៏ប្រាប់អាជ្ញាធរមូលដ្ឋានតែម្ដង ។
បើតាមអ្នកភូមិបាននិយាយថា តាមពិតម្ចាស់ចម្ការធ្លាប់ប្រើត្រាក់ទ័រភ្ជួររាល់ឆ្នាំ ដើម្បីដាំដំឡូងមី ឬដាំពោត តែមិនពុំដែលប្រទះគ្រាប់មីន ឬគ្រាប់អ្វីផ្សេងទេ លុះចុះភ្ជួរឆ្នាំនេះ ក៏ស្រាប់តែប្រទះឃើញនៅចំកណ្ដាលដីចម្ការតែម្ដង ។ ក្រោយពីប្រទះឃើញកាកសំណល់សង្គ្រាម ភ័យស្ទើរលស់ព្រលឹង ម្ចាស់ចម្ការក៏បានទាក់ទងទៅសុំអន្តរាគមន៏ពីអាជ្ញាធរ និងកម្លាំងស៊ីម៉ាក់ភ្លាមៗតែម្ដង ។
យោងតាមប្រភព«មជ្ឈមណ្ឌលសកម្មភាពកំចាត់មីនស៊ីម៉ាក់»ដែលបានបង្ហោះជាសាធារណៈក្នុងបណ្ដាញសង្គមរបស់ខ្លួននៅថ្ងៃទី៩ មេសា បានឲ្យដឹងថា គ្រាប់មីនតោនចំនួន០៣គ្រាប់នោះ ជាកាកសំណល់សង្គ្រាម ហើយត្រូវគេកប់ត្រូតលើគ្នាក្នុងរណ្ដៅដីតែមួយ ។ ស្ថានភាពគ្រាប់មីនទាំង០៣គ្រាប់នេះនៅមានគុណភាពខ្ពស់ និងអាចបង្កគ្រោះថ្នាក់ធ្ងន់ធ្ងរ ។ ប៉ុន្តែសំណាងល្អណាស់ ដែលម្ចាស់ចម្ការមិនបើកត្រាក់ទ័រកិនចំកន្លែងមានមីនតោននោះ បើមិនដូច្នេះទេ ប្រាកដជាជួបគ្រោះថ្នាក់ធ្ងន់ធ្ងរហើយ។
សូមរំលឹកថា កាលពីថ្ងៃទី ០៣ មេសា កន្លងទៅប៉ុន្មានថ្ងៃមុននេះ មន្ត្រីអង្គភាពកំចាត់មីន«ស៊ីម៉ាក់» បានចុះទៅដោះយកគ្រាប់មីនប្រឆាំងរថក្រោះ (មីនតោន) នេះចំនួន០៤គ្រាប់ ដែលគេប្រទះឃើញកប់ក្នុងរណ្ដៅពីរក្បែរគ្នា នៅក្នុងដីចម្ការពលរដ្ឋមួយកន្លែង ស្ថិតក្នុងភូមិស្វាយស ឃុំត្រែង ស្រុករតនមណ្ឌល។
កាកសំណល់សង្គ្រាមដ៏គ្រោះថ្នាក់នេះ ត្រូវបានកម្មករដាំដំឡូងមីប្រទះឃើញប៉ើងផុសចេញពីក្នុងដីចម្ការ នៅពេលគាត់ដើរដាំដំឡូង ។ គ្រាប់មីនតោននោះ មានចំនួន០៤គ្រាប់ តែត្រូវគេកប់ត្រូតលើគ្នាក្នុងមួយរណ្ដៅចំនួន០២គ្រាប់។ ម្ចាស់ចម្ការបានប្រើប្រាសត្រាក់ទ័រភ្ជួរាល់ឆ្នាំ តែមិនធ្លាប់ប្រទះឡើយ។ នៅឆ្នាំនេះក៏ប្រើត្រាក់ទ័រភ្ជួរទៀត ហើយក៏មិនប្រទះឃើញគ្រាប់មីនដែរ លុះពេលដាក់កម្មករចុះដាំដំឡូង ក៏ស្រាប់តែប្រទះឃើញគ្រាប់មីនតោនទាំងនេះរដូករណែល ដែលត្រាក់ទ័រភ្ជួរប៉ើងចេញពីក្នុងដី ។
បើតាមមន្ត្រីស៊ីម៉ាក់ថា គ្រាប់មីនតោនទាំង០៤គ្រាប់នោះ ត្រូវគេកប់ត្រូតលើគ្នាចំនួន០២គ្រាប់ ក្នុងរណ្តៅ០២ផ្សេងគ្នា ។ គ្រាប់មីននេះបានហើបចេញពីដី ដោយសារត្រាក់ទ័រភ្ជួរប៉ះចំផាល តែបើសិនជាកង់ត្រាក់កិនចំពីលើអាចផ្ទុះគ្រោះថ្នាក់ធ្ងន់ធ្ងរហើយ។
ទោះយ៉ាងណា បើពិនិត្យលើស្ថានភាពជាក់ស្ដែង នៃការប្រទះឃើញគ្រាប់មីនតោនដ៏គ្រោះថ្នាក់ជាបន្តបន្ទាប់ដូចខាងលើនេះ គឺប្រជាកសិករកំពុងនៅតែប្រឈមនឹងគ្រោះថ្នាក់បំផុត ពីកាកសំណល់សង្គ្រាមដែលសេសសល់នៅក្នុងដីទាំងនេះ។ ជាពិសេស អ្នកបើកបរត្រាក់ទ័រភ្ជួរដីចម្ការតែម្ដង ។ ដូច្នេះ មានតែការប្រុងប្រយ័ត្នប៉ុណ្ណោះ ចំពោះទីតាំងទាំងឡាយណា ដែលសង្ស័យថា អាចមានគ្រាប់យុទ្ធភ័ណ្ឌសេសសល់កប់នៅក្នុងដី ហើយត្រូវចៀសវាង ឬរាយការណ៍ជូនអាជ្ញាធរ ឬផ្ដល់ព័ត៌មានទៅកាន់មន្ត្រីកំចាត់មីន ឲ្យជួយពិនិត្យឬអន្តរាគមន៍ ៕
ចែករំលែកព័តមាននេះ