នៅក្នុងករណីឲ្យតែយើងទំនេរៗចេះតែនាំគ្នាវាតវង់ផឹកគ្រឿងស្រវឹងនិងលេងបៀរាល់តែដងរាល់តែពេលរាល់តែឱកាស នៅពេលអនាគតសូមកុំជេរកូនជេរចៅ នៅពេលដែលពួកគេចេះផឹក ចេះស៊ីនិងចេះលេងល្បែងពេលគេធំនោះ ។
ក្មេងៗវាចេះនិងចងចាំហើយត្រាប់តាមឥរិយាបទដ៏ងាយៗទាំងនេះតាមតែអស់លោក/លោកស្រីនេះឯង ។ ដូច្នេះហើយនៅក្នុងករណីដែលកាលពីក្មេងគេឃើញអស់ លោក/លោកស្រី ធ្វើសកម្មភាពតែដដែលៗរាល់តែពេលបែបនេះ នៅពេលដែលគេចម្រើនវ័យទៅនៅ ពេល ខាងមុខ គេក៏ដឹងតែចេះដោយឯងឯងនូវសកម្មភាពទាំងនេះ ។
នៅក្នុងសង្គមយើងសព្វថ្ងៃនេះ ទម្លាប់នៃការផឹកស៊ី និង លេងល្បែងស៊ីសងជាពិសេសគឺបៀរ នេះគឺពេញនិយមណាស់ ហើយគេឃើញយើងនាំគ្នាវាតវង់រាល់តែពេល មិនថាពេលណា ឫ ពេលណាទេ អោយតែមានឱកាសជួបជុំគ្នា និងពេលសម្រាកជាដើម ។
នៅក្នុងឱកាសបុណ្យចូលឆ្នាំថ្មីប្រពៃណីជាតិថ្ងៃសៅរ៍៥ កើតខែចេត្រ ឆ្នាំរោងឆស័ក ពុទ្ធសករាជ២៥៦៧ ត្រូវនឹងថ្ងៃទី១៣ ខែមេសា ឆ្នាំ២០២៤ខាងមុខនេះ ក៏ជាថ្ងៃដែលឱកាស វាតវង់ ផឹកស៊ី និង លេងល្បែងនឹងកើតមានឡើងជាច្រើនវង ជាច្រើនក្រុមផងដែរ ។
សកម្មភាពអវិជ្ជមានបែបនេះវាសឹងតែក្លាយជាទម្លាប់របស់ពលរដ្ឋយើងទៅហើយ ខណៈដែល តាំងពីបុរាណកាលមក ដើម្បីគេចចេញពីការវាតវងផឹកស៊ីនិងលេងល្បែងនេះ ដូនតាខ្មែរបាន ច្នៃបានប្រឌិតនូវល្បែងប្រជាប្រិយជាច្រើនសម្រាប់បន្សល់ទុកជាកេរ្តិ៍ដំណែលអោយកូនចៅ ជំនាន់ក្រោយលេងកម្សាន្ត ។
ល្បែងប្រជាប្រិយទាំងនេះប្រសិនបើជួបជុំគ្នា ហើយនាំគ្នាពពាក់ពពួលលេង នៅក្នុងភូមិ នៅក្នុងស្រុកគឺពិតជាសប្បាយរីករាយណាស់ ហើយវាក៏ជារូបភាពដ៏ល្អសម្រាប់សង្គម ពីព្រោះវាគឺជាអរិយធម៌បុរាណដែលយើងគួរត្រង់ត្រាប់ ។
ល្បែងបោះអង្គុយ ចោលឈូង ទាញព្រ័ត លាក់កន្សែង ក្លែងឆាបកូនមាន់ ស្តេចចង់ ដណ្តើម ស្លឹកឈើ គឺវាបង្កប់ នូវអត្ថន័យច្រើន ។ ជាក់ស្តែងគ្រាន់តែលេងចោល ឈូងតែ មួយ វាមាន តាំងពីច្រៀង មានតាំងពីរាំ ដែលអាចនឹងបង្កើតនូវចំណងសាមគ្គីភាព នៅក្នុង ចំណោម យុវវ័យ ស្របពេលដែល បោះអង្គុយគឺគេទម្លាប់អោយយុវជនចេះកំណត់គោលដៅ ចេះអប់រំចិត្តឲ្យផ្ចង់អារម្មណ៍សម្រួចគោលដៅ ដើម្បីបោះឲ្យចំកុំវៀចកុំវេ …ជាដើម ។ ប៉ុន្តែមិនអ៊ីចឹងអី ចាស់សម័យឥឡូវនៅតាមស្រុកតាមភូមិ មិនបែបនេះទេ គឺអោយតែ ជួបគ្នាដឹងតែបបួលគ្នាវាតវង់ផឹក និង លេងអារបស់ ដែលងាយៗអង្គុយលេងតែល្បែង អស់លុយអស់កាក់ហើយខូចសុខភាពនេះឯង ។
ល្បែងប្រជាប្រិយនានាឃើញបំផុតបំផុលអោយលេងតែតាមប្រព័ន្ធផ្សព្វផ្សាយ និង កន្លែង ពិធីធំៗនឹងតែតាមភូមិសឹងតែសូន្យសូម្បីតែតាមវត្តអារាម រហូតដល់អ្នកដែលលក់អង្គុញ ឥឡូវសឹងតែគ្មានឡើយដោយ សារតែលក់មិនដាច់ពលរដ្ឋមិនលេង ដាច់តែស្រាបៀ និងគ្រឿងស្រវឹង ហើយនឹងបៀរ ៥២ សន្លឹកនេះឯង ។
ដោយសារឥរិយាបទយើងទាំងអស់គ្នាបែបនេះហើយទើបបានជា រឿងគ្រឿងស្រវឹង ឥឡូវ យើងលេចធ្លោរមែនទែន សូម្បីតែពិភពលោកក៏បានកត់ត្រា ហើយធ្វើបច្ចុប្បន្នភាព ចំណាត់ ថ្នាក់រឿងប្រើប្រាស់គ្រឿងស្រវឹងនេះជាប្រចាំដែរ ។ សូមកុំនាំគ្នាមោទនភាពនឹងការផឹកស៊ី ហើយសប្បាយចិត្តនឹងការជូបជុំគ្នាលេងល្បែង ដែលវាមិនចំណេញអ្វីសូម្បីតែពន្តិច ។
អស់លោក/លោកស្រីប្រសិនបើឈប់បានគួរតែឈប់ទៅ ហើយបើឈប់មិន បានគួរ តែកាត់បន្ថយ ។ នៅក្នុងឱកាសបុណ្យចូលឆ្នាំខាងមុខនេះ ប្រសិនបើយកល្អ គឺគួរតែរិះ គិតចំណុចនេះ ហើយនាំគ្នាំបំផុសបំផុលលេងល្បែងប្រជាប្រិយវិញ ដើម្បីឲ្យអ្នកជំនាន់ ក្រោយយើងបានស្គាល់ ។ ល្បែងប្រជាប្រិយទាំងនេះឥឡូវមានតែនៅក្នុងសៀវភៅសិក្សាទេ ប៉ុន្តែធាតុពិតមិនសូវមាន គេលេង ហើយដល់ពេលដែលយើងជាចាស់ជាទុំមិន នាំគ្នាលេងនៅ ពេលចូលឆ្នាំ ហើយនាំគ្នាំតែគ្នាផឹក គឺសង្គមយើងវានឹងទៅតាមហ្នឹងឯងៗ ។ ដោយ៖ ហេង ចេស្តារ
ចែករំលែកព័តមាននេះ