បាតុភូតអន្ទង់ងាប់រាប់ពាន់ក្បាលបានកើតមានឡើងផ្ទួនៗយ៉ាងចម្លែកនាដើមឆ្នាំ២០២៤ក្នុងប្រទេសនូវែលសេឡង់មកដល់ពេលនេះ គ្មាននរណាម្នាក់ដឹងពីមូលហេតុនោះឡើយ ។ តាមសារព័ត៌មាន RT របស់រុស្ស៊ី បានចេញផ្សាយនៅថ្ងៃទី០២ ខែមេសា ឆ្នាំ២០២៤ថា ករណីហ្វូងអន្ទង់រាប់ពាន់ក្បាលងាប់យ៉ាងចម្លែក…
បាតុភូតអន្ទង់ងាប់រាប់ពាន់ក្បាលបានកើតមានឡើងផ្ទួនៗយ៉ាងចម្លែកនាដើមឆ្នាំ២០២៤ក្នុងប្រទេសនូវែលសេឡង់មកដល់ពេលនេះ គ្មាននរណាម្នាក់ដឹងពីមូលហេតុនោះឡើយ ។
តាមសារព័ត៌មាន RT របស់រុស្ស៊ី បានចេញផ្សាយនៅថ្ងៃទី០២ ខែមេសា ឆ្នាំ២០២៤ថា ករណីហ្វូងអន្ទង់រាប់ពាន់ក្បាលងាប់យ៉ាងចម្លែក ត្រូវគេរាយការណ៍ថា បានកើតឡើងសារជាថ្មីម្តងទៀតហើយ នៅក្នុងប្រទេសនូវែលសេឡង់ ។
បាតុភូតអន្ទង់ងាប់ក្នុងចំនួនដ៏ច្រើនសម្បើមនេះ គឺជាលើក២ហើយ នៅក្នុងប្រទេសនូវែលសេឡង់ សម្រាប់ដើមឆ្នាំ២០២៤នេះ ដោយកាលពីខែកុម្ភៈកន្លងទៅ ហ្វូងអន្ទង់ជាច្រើនពាន់ក្បាល ក៏ត្រូវបានគេប្រទះឃើញងាប់បែបនេះនៅក្នុងព្រែកមួយក្នុងទីក្រុង Mataura លើកោះខាងត្បូងប្រទេស ដែលពេលនោះ ត្រូវបានគេស្តីបន្ទោសទៅសារធាតុពុលដែលសាយភាយចូលទៅក្នុងទឹកអូរធម្មជាតិដែលជាជម្រករបស់សត្វអន្លង់ទាំងនោះ ខណៈដែលករណីថ្មីបំផុតចុងក្រោយនេះ មិនត្រូវបាននរណាម្នាក់ដឹងពីមូលហេតុអ្វីឲ្យពិតប្រាកដនោះឡើយ សូម្បីតែអ្នកវិទ្យាសាស្ត្រជំនាញក៏ដោយ ។
សារព័ត៌មាននៅក្នុងប្រទេសនូវេសេឡង់រាយការណ៍ថា មកដល់ពេលនេះ ក្រសួងឧស្សាហកម្ម កំពុងបន្តស៊ើបអង្កេតស្រាវជ្រាវរកមូលហេតុដែលនាំឱ្យហ្វូងសត្វអន្ទង់តូចៗប្រមាណ៣៥០០ក្បាលងាប់នៅក្នុងព្រែក Kauritutahi ខាងជើងទីក្រុង Auckland ។
អាជ្ញាធរបរិស្ថានណែនាំថា «បាតុភូតដ៏អាថកំបាំងនេះ» ត្រូវបានផ្សារភ្ជាប់ទៅនឹងការប្រែប្រួលអាកាសធាតុ ដែលអាចជាមូលហេតុបណ្តាលឱ្យមានអន្ទង់ងាប់ ។ ពូជអន្ទង់ប្រភេទនេះ លូតលាស់នៅក្នុងបរិស្ថានទឹកដែលមានសីតុណ្ហភាពចន្លោះពី ១៦ ទៅ១៨អង្សាសេ រួមជាមួយនឹងលំហូរទឹកល្អ និងកម្រិតអុកស៊ីហ្សែនរលាយពី ៧ទៅ៨.៥មីលីក្រាមក្នុងមួយលីត្រ។
របាយការណ៍បានបង្ហាញថា បន្ទាប់ពីការវាស់វែងមួយថ្ងៃបន្ទាប់ពីអន្ទង់ងាប់ត្រូវបានរកឃើញ គុណភាពទឹកក្នុងព្រែកKauritutahi ស្ថិតក្នុងស្ថានភាពប្រក្រតីធម្មតា មិនមានការប្រែប្រួល ឬរងការបំពុលនោះឡើយ ប៉ុន្តែសារព័ត៌មាន New Zealand Herald បានដកស្រង់សម្តីរបស់អ្នកជំនាញក្នុងប្រទេសនូវែលហ្សេឡង់ថា គុណភាពទឹកនៅក្នុងព្រែកនោះ បានធ្លាក់ចុះក្នុងរយៈពេលប៉ុន្មានឆ្នាំចុងក្រោយនេះ ហើយពួកគេបានប្រទះការកើនឡើងនៃសារាយ នៅក្នុងផ្នែកខ្លះនៃព្រែកនោះ ដែលមានន័យថា ទឹកកំពុងឡើងកំដៅ។
បណ្ឌិត Simon Stewart អ្នកជំនាញបរិស្ថានទឹកសាបរបស់វិទ្យាស្ថាន Cawthron ជឿជាក់ថា កត្តាជាច្រើនដូចជា អាហារ ទីជម្រក អាចធ្វើឱ្យអន្ទង់កើតស្ត្រេស ហើយងាប់។ បាតុភូតនេះ ត្រូវបានអ្នកវិទ្យាសាស្ត្រចាត់ទុកថា ជាសញ្ញាមួយសម្រាប់ក្រើនរំលឹកឱ្យមនុស្សទាំងអស់គ្នាបង្កើនការយកចិត្តទុកតាមដែលអាចធ្វើបាន ដើម្បីបង្កើនគុណភាពទឹកនៅនៅក្នុងប្រទេសនូវេសេឡង់ ដើម្បីចៀសវាងស្ថានភាពបែបនេះ ៕ ដោយ៖អោម ចែតច័ន្ទណារ៉ា
ចែករំលែកព័តមាននេះ