រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់យ៉ាងដូច្នេះថា គ្មានអ្វីត្រូវបារម្ភឡើយ បើទោះបីជាមានរោងចក្រដំឡើងរថយន្តនៅកម្ពុជា តួរយ៉ាងរោងចក្រដំឡើងរថយន្តតូយ៉ូតា ដែលជាក្រុមហ៊ុនជប៉ុននឹងធ្វើឱ្យបាត់បង់ចំណូលផ្នែកគយលើពន្ធនាំចូលក៏ពិតមែន ប៉ុន្តែកម្ពុជាបានផលចំណេញមកវិញ តាមរយៈការបង្កើនការងារជូនពលរដ្ឋ កម្មករកម្មការិនីទទួលបានចំណេះជំនាញ លើបច្ចេកវិទ្យាថ្មីៗពីឧស្សាហកម្មរថយន្ត ហើយជាពិសេសសម្តេចថា បាត់ចំណូលគយបានចំណូលពន្ធដាវិញដដែលទេ។
សម្តេចធិបតីបានថ្លែងក្នុងពិធីសម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា នៅព្រឹកថ្ងៃទី២ ខែឧសភា ឆ្នាំ២០២៤យ៉ាងដូច្នេះថា ៖«អ្វីដែលជាការធ្លាក់ចិត្តតិច គឺឯកឧត្តម គុណ ញឹម ។ ខ្ញុំសួរគាត់ថ្ងៃមុនថា ឯកឧត្តម ថ្ងៃមុន ជជែកគ្នាក្រៅផ្លូវការ គាត់ថា ឥឡូវចំណូលយើងមួយ ចំណូលពន្ធមួយ គឺពីរឿងរថយន្តតែឥឡូវចំណូលមួយផ្នែកត្រូវធ្លាក់ដោយសាររថយន្តមួយចំនួនត្រូវមកបើកធ្វើនៅក្នុងស្រុកអត់មានបង់ពន្ធនាំចូល» ។
ជុំវិញការបាត់បង់ចំណូលពន្ធនាំចូលនេះត្រូវបានសម្តេចធិបតីនាយករដ្ឋមន្ត្រីអះអាងថា រដ្ឋគួរតែបាត់បង់ចំណែកខ្លះ ដើម្បីផ្តល់ផលប្រយោជន៍ដល់ឯកជន ដើម្បីលើកទឹកចិត្តដល់វិស័យឯកជន ។
ក្នុងនោះ សម្តេចនាយករដ្ឋមន្ត្រី បានគូសបញ្ជាក់បន្ថែមថា ៖ «អត់អីទេ ធ្លាក់ពន្ធគយពីរថយន្តនាំចូលបន្តិចចុះ ប៉ុន្តែលុយចេញពីកាប៉ាវឆ្វេង ចូលការប៉ាវស្តាំទេ ពេលដែលគាត់មកបង្កើតក្រុមហ៊ុននៅក្នុងស្រុក ទី១ រីកចម្រើន បង្កើតការងារចំណូលចូលមកពន្ធដារកាប៉ាវស្តាំ ។ ពេលដែលគាត់មកបណ្តុះបណ្តាលមនុស្សបៀវត្សរ៍ទៅប្រជាពលរដ្ឋយើង ប្រជាពលរដ្ឋយើងគាត់មានលទ្ធភាពកើនជីវភាពរស់នៅទៅទិញបន្តចឹងចូលមកសេដ្ឋកិច្ចយើងដដែលទេ» ។
ជាមួយគ្នានោះដែរ សម្តេចធិបតី បន្តទៀតថា៖ «បើសិនជារថយន្តនោះផលិតនៅក្នុងពន្ធអនុគ្រោះចឹងផលិតផលសម្រេច និងគុណភាពមិនមែនរថយន្ត Copy ទេ រថយន្តបង្កើតដោយក្រុមហ៊ុនតូយូតា បង្កើតនៅទីនេះ អត់យកពន្ធនាំចូល អាចលក់បានថ្លៃសមរម្យ ចឹងប្រជាពលរដ្ឋយើង អាចមានលទ្ធភាពទិញរថយន្តថ្មី ដែលផលិតនៅក្នុងស្រុកយើង តម្លៃសមរម្យ ដូច្នេះជាអ្វីដែលខ្ញុំនិយាយកុំខ្លាចឯកឧត្តម គុណ ញឹម កុំអន់ចិត្ត គង់តែចូលមកឯកឧត្តម គង់ វិបុលនោះទេ ។ ព្រោះពេលដែលរថយន្តដើរលក់ផលិតផល ប្រជាជនយើងទិញច្រើនចឹងចំណូលពីក្រុមហ៊ុន ក្រុមហ៊ុនចូលមកវិញ ហើយនេះ គឺជាអ្វីដែលយើងចង់លើកទឹកចិត្តបន្ថែម» ។
ក្នុងឱកាសនោះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកទឹកចិត្ត ក៏ដូចជាណែនាំឱ្យក្រុមហ៊ុនដំឡើងរថយន្តតូយ៉ូតា របស់ជប៉ុនសិក្សា និងពិនិត្យលទ្ធភាពប្រើប្រាស់គ្រឿងបង្គំ សម្ភារៈ និងឧបករណ៍មួយចំនួន ដែលជាផលិតផល និងវត្ថុធាតុដើមដែលមានស្រាប់នៅកម្ពុជា តួយ៉ាងកម្ពុជាមានឧស្សាហកម្មកៅស៊ូ និងសង្វាក់ផលិតកម្មគ្រឿងបង្គំដូចជា ពូកអង្គុយ ដែលមានគុណភាព និងផលិតផលជាច្រើនទៀតក្នុងចំណោមផលិតផលជាច្រើនមុខ សម្រាប់យកមកផលិតចេញជារថយន្តមួយគ្រឿងៗ ។
សម្តេចធិបតី បានគូសបញ្ជាក់ថា «បន្តពិនិត្យនូវសក្តានុពលបន្ថែមទៀត ទន្ទឹមនឹងការនាំចូលសម្ភារៈឧបករណ៍ សម្រាប់ដំឡើងយាន្តយន្ត សូមពិនិត្យផលិតភាព ពង្រីកការប្រើប្រាស់ផលិតផល និងវត្ថុធាតុដើមដែលមានស្រាប់នៅក្នុងស្រុក» ។
ក្នុងន័យនេះ សម្តេចនាយករដ្ឋមន្ត្រីបានបញ្ជាក់ថា «កិច្ចការនេះ គឺជាកិច្ចការសំខាន់យើងចាប់ផ្តើមដំបូងដំឡើង យើងយកធាតុផ្សំ ក្រៅច្រើន ប៉ុន្តែទៅថ្ងៃមុខនៅពេលដែលយើងមានលទ្ធភាពធ្វើ ព្រោះក្រុមហ៊ុនរថយន្តមួយ រថយន្តមួយគ្រឿង ត្រូវការគ្រឿងបន្លាស់រាប់ពាន់មុខ សូមឱ្យពិនិត្យមើល នៅក្នុងការបង្កើតរោងចក្រ ដែលជាគេថា backward linkage ភ្ជាប់មកខាងក្រោម យើងអាចឈានទៅដល់ការជំរុញបើកឱកាសឱ្យក្រុមហ៊ុនផលិតខ្ចៅទំនើបសម្រាប់ផ្គត់ផ្គង់ ផលិតគ្រឿង ពូក ធ្វើពូក ជូនរថយន្តនៅទីនេះមិនបាច់នាំពីក្រៅ» ។
ក្នុងនោះសម្តេចធិបតី គូសបញ្ជាក់បន្ថែមថា «បើបង្កើតសិប្បកម្មផ្សេងៗទៀតដែលមានលក្ខណៈចឹងក្នុងប៉ុន្មានរយមុខអាចផលិតមើល បើថាក្រុមហ៊ុនមិនចាំបាច់ធ្វើខ្លួនឯងទេចាប់ដៃគូជាមួយនឹងក្រុមហ៊ុននៅក្នុងស្រុក សិប្បកម្មនៅក្នុងស្រុកដែលផលិត ។ ព្រោះជួនកាលផលិតពូក ផលិតអីសម្រាប់រថយន្តនេះអាចមើលក្រុមហ៊ុនណាដែលគាត់អាចធ្វើបាន ហើយនេះ គឺជាកិច្ចការដែលខ្ញុំនិយាយមិនត្រឹមតែពង្រីកធនធានមនុស្សទេ តែអាចពង្រីកអាចពិនិត្យទៅជា Ecosystem សម្រាប់ថ្នាល់បណ្តុះបណ្តាលបូកជាមួយនឹងការជួយនៅក្រុមហ៊ុនដៃគូតូចៗរបស់យើងក្នុងការជួយផ្គត់ផ្គង់» ៕
ចែករំលែកព័តមាននេះ