រាជធានីភ្នំពេញ ៖ ក្មេងស្រីជំទង់ម្នាក់ខឹងឪពុកម្ដាយស្ដីបន្ទោសរឿងលេងឆាត និងមិនឲ្យដើរលេងជាមួយមិត្តភក្ដិ ឆ្លៀតឱកាសឪពុកម្ដាយប្រើឲ្យទៅរៀបចំអីវ៉ាន់លក់ដូរ នៅមុខរោងចក្រ ស្រាប់តែលួចចាកចេញទៅបាត់ ហើយទៅនៅចំថ្ងៃបុណ្យនៃសេចក្ដីស្រលាញ់១៤ កុម្ភៈថែមទៀត ។…
រាជធានីភ្នំពេញ ៖ ក្មេងស្រីជំទង់ម្នាក់ខឹងឪពុកម្ដាយស្ដីបន្ទោសរឿងលេងឆាត និងមិនឲ្យដើរលេងជាមួយមិត្តភក្ដិ ឆ្លៀតឱកាសឪពុកម្ដាយប្រើឲ្យទៅរៀបចំអីវ៉ាន់លក់ដូរ នៅមុខរោងចក្រ ស្រាប់តែលួចចាកចេញទៅបាត់ ហើយទៅនៅចំថ្ងៃបុណ្យនៃសេចក្ដីស្រលាញ់១៤ កុម្ភៈថែមទៀត ។
ដោយពុំដឹងថា នាងទៅរស់នៅកន្លែងណា និងនៅជាមួយនរណានោះទេ ចំណែកឪពុកម្ដាយបានព្យាយាមខលក៏នាងមិនឆ្លើយ មិននិយាយរក ហើយឆាតឆ្លើយ និងមិនប្រាប់ពីកន្លែងដែលនាងស្នាក់នៅឡើយ ។
ទង្វើរបស់នាងបែបនេះបានធ្វើឲ្យឪពុកម្ដាយ និងសាច់ញាតិមានការព្រួយបារម្ភខ្លាំងណាស់ អំពីសុវត្ថិភាពរបស់នាង ហើយពួកគាត់ក៏បានតាមរកគ្រប់កន្លែង ប៉ុន្តែមិនឃើញ ឬទទួលបានដំណឹងថា នាងកំពុងតែស្ថិតនៅទីណាឡើយ ។ ទើបនៅវេលាព្រឹកថ្ងៃទី០២ ខែឧសភា ឆ្នាំ២០២៤ ស្ត្រីជាម្ដាយរួមជាមួយស្ត្រីម្នាក់ទៀត ត្រូវជាជីដូនសាច់ឆ្ងាយកាន់រូបថតកូនស្រីរូបនោះធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។ ដើម្បីផ្ដល់ដំណឹង និងបង្ហាញរូបថតដល់អាជ្ញាធរ និងនគរបាលប៉ុស្តិ៍ ព្រមទាំងប្រជាការពារឲ្យបានស្គាល់នូវភិនភាគកូនស្រីគាត់ ហើយគាត់ក៏បានស្នើសុំឲ្យអាជ្ញាធរ និងនគរបាលជួយធ្វើការស្រាវជ្រាវរកកូនគាត់ផង ។
ស្ត្រីរូបនោះបានប្រាប់អាជ្ញាធរថា គាត់ឈ្មោះ ឆេង ស្រីម៉ា អាយុ៣៣ឆ្នាំ មុខរបរលក់ដូរ និងប្ដីឈ្នោះពៅ កាក់ អាយុ៣៨ឆ្នាំ មុខរបរលក់ដូរ ។ ចំណែកកូនស្រីរបស់គាត់ ដែលកំពុងបាត់ខ្លួនពីផ្ទះនោះ ឈ្មោះ ពៅ សុធា អាយុ១៦ឆ្នាំ សព្វថ្ងៃគ្រួសាររបស់គាត់ស្នាក់នៅក្នុងបុរីច័ន្ទសម្បត្តិ ស្ថិតនៅក្នុងភូមិត្រពាំងពោធិ៍ សង្កាត់ចោមចៅទី៣ ខណ្ឌពោធិ៍សែនជ័យ និងមានស្រុកកំណើតនៅភូមិតាអូ ឃុំតាអូ ស្រុកគីរីវង្ស ខេត្តតាកែវ ។
គាត់បាននិយាយបន្តទៀតថា កូនស្រីគាត់បានចេញបាត់ពីផ្ទះរយៈពេលជាង១ខែកន្លះមកហើយ គឺចាប់តាំងពីថ្ងៃទី១៤ ខែកម្ភៈ ឆ្នាំ២០២៤ មកម្ល៉េះ ព្រោះតែនាងខឹងពួកគាត់ដែលជាឪពុកម្ដាយស្ដីបន្ទោសរឿងលេងឆាត និងមិនឲ្យដើរលេងជាមួយមិត្តភក្ដិ ។ ដោយកាលវេលាម៉ោ១១ថ្ងៃព្រឹកថ្ងៃនោះ ពួកគាត់បានប្រើឲ្យកូនស្រីរូបនោះទៅរៀបចំអីវ៉ាន់លក់ដូរមុន នៅមុខរោងចក្រកាត់ដេរមួយ ស្ថិតនៅក្នុងភូមិត្រពាំងពោធិ៍ សង្កាត់ចោមចៅទី៣ ដើម្បីលក់ពេលកម្មករចេញពីធ្វើការ ហើយគាត់ និងប្ដីនៅផ្ទះរង់ចាំទៅតាមក្រោយ ។
អ្នកម្ដាយរូបនេះបាននិយាយរៀបរាប់ទៀតថា លុះដល់ម៉ោងកម្មករចេញពីធ្វើការពួកគាត់បានចេញពីផ្ទះទៅដល់កន្លែងលក់ ស្រាប់តែបាត់មិនឃើញកូនស្រី ដោយមិនដឹងជា នាងទៅទីណាឡើយ ហើយគាត់ក៏បានខលរក ប៉ុន្តែខលចូលហើយកូនស្រីមិននិយាយរកសោះ ។ ពួកគាត់មានការព្រួយបារម្ភខ្លាំងណាស់ក៏បានទាក់ទងតាមឆាតហ្វេសប៊ុក និងតេឡេក្រាមទៀត ប៉ុន្តែកូនស្រីនៅតែមិននិយាយរកទៀតទើបឲ្យសាច់ញាតិខាងគាត់ និងប្ដីជួយទាក់ទង ។ ពេលនោះក្រៅពីរូបគាត់ និងប្ដី ដែលជាឪពុកម្ដាយខលទៅនាងនិយាយរកទាំងអស់ តែក៏មិនប្រាប់ពីកន្លែងស្នាក់នៅ និងនៅជាមួយនរណាដែរ ។
ស្ត្រីជាម្តាយខាងលើ បានប្រាប់បន្ថែមទៀតថា សាច់ញាតិបានព្យាយាមលួងលោមឲ្យត្រឡប់មកផ្ទះវិញ ប៉ុន្តែនាងមិនព្រមឡើយ ហើយរហូតដល់ក្រោយថ្ងៃចូលឆ្នាំរួច៣ថ្ងៃ ស្រាប់តែទាក់ទងនាងលែងបានរហូតតែម្ដង ពុំដឹងថានាងមានរឿងអ្វី និងសុខទុក្ខបែបណានោះទេ ។
ដោយសារតែមានព្រួយបារម្ភកាន់តែខ្លាំងឡើងៗពីមួយថ្ងៃទៅមួយថ្ងៃនោះ ទើបនៅវេលាព្រឹកថ្ងៃទី២ ខែឧសភា ឆ្នាំ២០២៤ គាត់បាននាំយករូបថតកូនស្រីធ្វើដំណើរទៅកាន់សាលាសង្កាត់ចោមចៅទី៣ ខណ្ឌពោធិ៍សែនជ័យ ស្នើសុំឲ្យអាជ្ញាធរ និងនគរបាលជួយធ្វើការស្រាវជ្រាវរកកូនគាត់ផង ។
អ្នកស្រីឆេង ស្រីម៉ា បានបញ្ជាក់ថា កាលពីអំឡុងខែវិច្ឆិកា ឆ្នាំ២០២២ ខណៈដែលកូនស្រីគាត់រៀននៅសាលារៀនមួយក៏ធ្លាប់ចាកចេញបាត់ពីផ្ទះ ព្រោះតែខឹងការស្ដីប្រដៅបែបនេះម្ដងរួចមកហើយដែរ ។ ពេលនោះនាងបានទៅតាមមិត្តភក្ដិអូសទាញរយៈពេល១អាទិត្យ ប៉ុន្តែត្រូវបានបងប្អូនក្រុមគ្រួសារសាច់ញាតិជួយធ្វើការលួងលោមឲ្យវិលត្រឡប់មកផ្ទះវិញបាន ដោយឡែកលើកទី២នេះ ស្រាប់តែទៅបាត់តែម្ដង ដោយពុំដឹងថា ទៅដល់ទីណាឡើយ ៕
ចែករំលែកព័តមាននេះ