ខេត្តកំពង់ចាម ៖ ក្រុមការងារនៃក្រសួងធនធានទឹក និងឧតុនិយម ដឹកនាំដោយឯកឧត្តម អ៊ុក វុទ្ធី អនុរដ្ឋលេខាធិការក្រសួងធនធានទឹក និងក្រុមការងាររដ្ឋបាលខេត្តកំពង់ចាម ដឹកនាំដោយលោក…
ខេត្តកំពង់ចាម ៖ ក្រុមការងារនៃក្រសួងធនធានទឹក និងឧតុនិយម ដឹកនាំដោយឯកឧត្តម អ៊ុក វុទ្ធី អនុរដ្ឋលេខាធិការក្រសួងធនធានទឹក និងក្រុមការងាររដ្ឋបាលខេត្តកំពង់ចាម ដឹកនាំដោយលោក ស្រី សុភ័ក្ត្រ អភិបាលរងខេត្ត បានចុះពិនិត្យអំពីស្ថានភាពករណីចាក់ថ្មច្រាំងទន្លេ នៅចំណុចភូមិជ័យ ឃុំមានជ័យ ស្រុកស្រីសន្ធរ ដោយមាន drone បើកកាត់លើផ្ទៃទឹកទន្លេ ដើម្បីធ្វើឡើងតាមលក្ខណៈបច្ចេកទេស ចង់ដឹងការចាក់ថ្មចូលទន្លេនេះ មានផលប៉ះពាល់កម្រិតណា ឬប្រយោជន៍ទប់ច្រាំងទន្លេកុំឲ្យបាក ។ ជាមួយនោះ គេមានឃើញស្ថាប័នពាក់ព័ន្ធចុះបំពេញការងារនេះផង
ដែរ។
លោកដឹប ប៊ុនហុង មេឃុំមានជ័យមានប្រសាសន៍ឲ្យដឹង នៅព្រឹកថ្ងៃទី២ ឧសភា ថា ចំពោះទីតាំងច្រាំងទន្លេដែលគេចាក់ថ្មចូលទៅក្នុងទន្លេចំណុចឃុំមានជ័យ ស្រុកស្រីសន្ធរ ជាកម្មសិទ្ធិរបស់ប្រជាពលរដ្ឋម្នាក់រស់នៅភ្នំពេញ ដែលមានស្រុកកំណើតនៅទីនេះ។ បានទិញដីមកចាក់ទប់ច្រាំងទន្លេប្រយោជន៍ការពារកុំឲ្យបាក់ចំពោះសកម្មភាពនេះបានបម្រើឲ្យផលប្រយោជន៍សាធារណៈ។ត្រូវបានប្រជាពលរដ្ឋរាប់រយគ្រួសារនាំគ្នាអបអរសាទរ ដោយនឹងធ្វើឲ្យច្រាំងទន្លេនេះបានរឹងមាំជាងមុនជៀសវាងការយាយីបាក់ច្រាំងដោយប្រការណាមួយ ហើយម្ចាស់ក៏បានស្នើសុំមកអាជ្ញាធរមូលដ្ឋានផងដែរ។
បើតាមសេចក្តីប្រកាសព័ត៌មាន របស់រដ្ឋបាលខេត្តកំពង់ចាមបានឲ្យដឹងថា ករណីចាក់ថ្មច្រាំងទន្លេ នៅទីតាំងខាងលើ កាលពីរសៀលថ្ងៃទី២៩ ខែមេសា ឆ្នាំ២០២៤ លោក ស្រី សុភ័ក្ត្រ អភិបាលរងខេត្តកំពង់ចាម បានដឹកនាំក្រុមការងារចម្រុះចុះពិនិត្យឃើញថា ការចាក់ថ្មច្រាំងទន្លេនេះ មានប្រវែងបណ្តោយច្រាំង ១៦៥ម៉ែត្រ ជម្រាលច្រាំង ១០ម៉ែត្រ និង ១៦ម៉ែត្រ ដែលផ្នែកខាងក្រោមចាក់ថ្ម ទប់ជម្រាលលយចូលក្នុងទឹក ។
សំណង់នេះដែរ ធ្វើឡើងពុំបានសុំច្បាប់ជាលាយលក្ខណ៍អក្សរទេ តែបានសុំផ្ទាល់មាត់ត្រឹមលោកមេឃុំមានជ័យ សំណង់ត្រូវបានចាប់ផ្តើមម្តងបន្តិចៗ រហូតដល់ចប់សកម្មភាពទាំងស្រុងនៅក្នុងខែមករា ឆ្នាំ២០២៤ កន្លងទៅ។ រីឯម្ចាស់ទីតាំង បានបញ្ជាក់ពីគោលបំណងនៃការចាក់ថ្មនេះ គឺដើម្បីការពារទប់ច្រាំងទន្លេកុំឲ្យបាក់បន្តទៀត។
យ៉ាងនោះក្តី ជាវិធានការរដ្ឋបាល គឺក្រុមការងារបានតម្រូវឲ្យម្ចាស់ទីតាំងបញ្ឈប់សកម្មភាពចាក់ថ្មបន្តទៀត និងរង់ចាំលទ្ធផលនៃការចុះសិក្សា វាយតម្លៃរបស់ក្រសួងធនធានទឹក និងឧតុនិយម អំពីលក្ខណៈបច្ចេកទេស និងផលប៉ះពាល់។
ឯកឧត្តម ឈុន ពុទ្ធារិទ្ធ អគ្គនាយកិច្ចការបច្ចេកទេសនៃក្រសួងធនធានទឹកនិងឧតុនិយម បានឱ្យដឹងក្នុងពេលចុះបំពេញការងារដោយធ្វើឡើងកាលពីថ្ងៃទី ១ឧសភាថា ករណីចាក់ថ្មទប់ច្រាំងទន្លេនេះ ក្រុមការងាររបស់លោក ធ្វើការចុះពិនិត្យដោយផ្ទាល់ ដើម្បីធ្វើរបាយការណ៍លម្អិតដាក់ជូន ឯកឧត្តមរដ្ឋមន្ត្រីក្រសួងធនធានទឹក និងឧតុនិយម ក៏ដូចជារដ្ឋបាលខេត្តកំពង់ចាម ជូនជ្រាប អំពីស្ថានភាពពិតប្រាកដនៅតំបន់នេះ ។
ឯកឧត្តម ឈុន ពុទ្ធារិទ្ធ បានបន្តថា ក្រុមការងារបច្ចេកទេសនិងធ្វើការប្រៀបធៀប ពីស្ថានភាពបច្ចុប្បន្ន និងឆ្នាំមុនៗ អំពីការបាក់ច្រាំងទន្លេនៅតំបន់នេះផងដែរ ដើម្បីចូលរួមផ្នែកបច្ចេកទេស ធ្វើឱ្យទន្លេមានរបបទឹក ចរន្តទឹក ជលសាស្ត្រ ហើយនិងជលវិទ្យា សិក្សាឲ្យបានត្រឹមត្រូវ ឱ្យមានលំហូរតាមបែបធម្មជាតិរបស់វា ចៀសវាងការចាក់ថ្មទប់ច្រាំងទន្លេ ដោយខ្វះបច្ចេកទេស ធ្វើឱ្យមានការបាក់ច្រាំងទន្លេបន្តទៅទៀត ដែលប៉ះពាល់ដល់ផលសេដ្ឋកិច្ច និងធ្វើឲ្យបាត់បង់លំនៅឋានរបស់ប្រជាពលរដ្ឋ ដែលរស់នៅតាមដងទន្លេ ។
សូមបញ្ជាក់ថា ករណីចាក់ថ្មចូលទន្លេនៅភូមិព្រៃទទឹង ឃុំឬស្សីស្រុក ស្រុកស្រីសន្ធរ ដោយឧកញ៉ា ទន់ ឆៃអ៊ាង រស់នៅភ្នំពេញ បានចាក់ថ្មចូលទន្លេមានទទឹង៥២ម៉ែត្រនិងបណ្ដោយជាង ១០០ម៉ែត្រ នាពេលកន្លងទៅ។ហើយត្រូវបានឯកឧត្តមអ៊ុន ចាន់ដា អភិបាលខេត្ត បានចាត់ឱ្យមន្ត្រីក្រោមឱវាទចុះពិនិត្យជាបន្តបន្ទាប់ដោយតម្រូវឲ្យម្ចាស់ទីតាំងនេះបានកាយថ្មចេញវិញ តាមការណែនាំរបស់រដ្ឋបាលខេត្តកិច្ចការនេះត្រូវបញ្ចប់។តែសំណុំរឿងឧកញ៉ាម្នាក់នេះកំពុងតែស្ថិតនៅក្នុងដៃតុលាការខេត្តកំពង់ចាមនៅឡើយ….។
ចែករំលែកព័តមាននេះ