(អាមេរិក)៖ បច្ចុប្បន្នមានមហាសេដ្ឋីជិត ២,៨០០នាក់នៅទូទាំងពិភពលោក កើនឡើងចំនួន ១៤១នាក់បើធៀបនឹងឆ្នាំ២០២៣។ ក្នុងចំណាត់ថ្នាក់មហាសេដ្ឋីថ្មីលោក Bernard Arnault ដែលជាម្ចាស់ក្រុមហ៊ុន LVMH Group គឺជាអ្នកមានបំផុតនៅលើពិភពលោក។ នេះបើយោងតាមការ​ចុះផ្សាយរបស់ទស្សនាវដ្តី FORBES។

១. លោក Bernard Arnault គឺជាប្រធានក្រុមហ៊ុន LVMH ដែលជាក្រុមទំនិញប្រណិតដ៏ធំបំផុតរបស់ពិភពលោក ដែលមានម៉ាកសំលៀកបំពាក់ និងគ្រឿងសំអាងប្រហែល ៧៥ម៉ាក។ ទ្រព្យសម្បត្តិរបស់អ្នកជំនួញជនជាតិបារាំងវ័យ ៧៥ឆ្នាំរូបនេះបានឈានដល់ ២៣៣ពាន់លានដុល្លារអាមេរិក កើនឡើង ២២ពាន់លានដុល្លារ បើធៀបនឹងឆ្នាំមុន។ នេះ​ជា​លើក​ទី​ពីរ​ហើយ​ដែល​មហាសេដ្ឋី​រូប​នេះ​បាន​ជាប់​ក្នុង ​បញ្ជី​អ្នក​មាន​បំផុត​របស់​ពិភពលោក​របស់ ​ទស្សនាវដ្ដី Forbes ។

២. ចំណាត់ថ្នាក់ទី២ គឺ លោក Elon Musk ដែលជានាយកប្រតិបត្តិនៃក្រុមហ៊ុនធំៗជាច្រើនដូចជា Tesla, SpaceX ទ្រព្យសម្បត្តិរបស់កើនដល់ ១៩៥ពាន់លានដុល្លារ ។

៣. Jeff Bezos ដែលជាស្ថាបនិកក្រុមហ៊ុន Amazon បច្ចុប្បន្នមានទ្រព្យសម្បត្តិសរុបចំនួន ១៩៤ពាន់លានដុល្លារអាមេរិក ដែលជាប់ចំណាត់ថ្នាក់ទី៣ក្នុងបញ្ជីមហាសេដ្ឋីពិភពលោក។ អ្នកជំនួញវ័យ៦០ឆ្នាំរូបនេះធ្លាប់ជាអ្នកមានជាងគេបំផុតនៅលើពិភពលោកពីឆ្នាំ២០១៨ ដល់ឆ្នាំ ២០២១។

៤. គួរកត់សម្គាល់ថានៅឆ្នាំនេះ ថៅកែ Facebook លោក Mark Zuckerberg បានឡើងដល់ចំណាត់ថ្នាក់ទី៤ ក្នុងបញ្ជី ដែលមានទ្រព្យសម្បត្តិ ១៧៧ពាន់លានដុល្លារ ។

៥. ចំណាត់ថ្នាក់ទី៥ គឺ លោក Larry Ellison ដែលជាស្ថាបនិកក្រុមហ៊ុនកម្មវិធី Oracle ។ អ្នកជំនួញជនជាតិអាមេរិករូបនេះក៏ជាសមាជិកក្រុមប្រឹក្សាភិបាលរបស់ក្រុមហ៊ុន Tesla ពីឆ្នាំ២០១៨ ដល់ខែសីហា ឆ្នាំ ២០២២ ផងដែរ។ ទ្រព្យសម្បត្តិរបស់មហាសេដ្ឋីបច្ចុប្បន្នមានចំនួន១៤១ពាន់លានដុល្លារអាមេរិក។

៦. លោក Warren Buffett ជាអ្នកវិនិយោគដ៏ជោគជ័យបំផុត មហាសេដ្ឋីវ័យ ៩៤ឆ្នាំរូបនេះបច្ចុប្បន្នមានទ្រព្យសម្បត្តិ ១៣៣ពាន់លានដុល្លារអាមេរិក កើនឡើង ២៧ពាន់លានដុល្លារ បើធៀបនឹងឆ្នាំមុន។ យោងតាម ទស្សនាវដ្តី Forbes គាត់បានសន្យាថានឹងបរិច្ចាគច្រើនជាង ៩៩% នៃទ្រព្យសម្បត្តិរបស់គាត់។ រហូតមកដល់បច្ចុប្បន្ន គាត់បានបរិច្ចាគជាង ៥៦ពាន់លានដុល្លារអាមេរិក ដែលភាគច្រើនតាមរយៈមូលនិធិ Gates និងមូលនិធិសប្បុរសធម៌របស់កូនៗរបស់គាត់។

៧. លោក Bill Gates  ស្ថាបនិកក្រុមហ៊ុន Microsoft បច្ចុប្បន្នកំពុងជាប់ចំណាត់ថ្នាក់ទី ៧។ទ្រព្យសម្បត្តិសរុបរបស់មហាសេដ្ឋីវ័យ ៦៨ឆ្នាំរូបនេះត្រូវបានគេប៉ាន់ស្មានថាមានចំនួន ១២៨ពាន់លានដុល្លារ ។ បន្ទាប់ពីចាកចេញពីការងារជានាយកប្រតិបត្តិនៅក្រុមហ៊ុន Microsoft លោក Bill Gates បានបន្តស្វែងរកអាជីវកម្ម និងគម្រោងសប្បុរសធម៌នានា។

៨. លោក Steve Ballmer គឺជាមិត្តរួមថ្នាក់របស់ Bill Gates នៅ Harvard ។ មហាសេដ្ឋីអាមេរិករូបនេះក៏បានកាន់តំណែងជានាយកប្រតិបត្តិនៃក្រុមហ៊ុន Microsoft ពីឆ្នាំ២០០០ ដល់ឆ្នាំ២០១៤។ បច្ចុប្បន្នទ្រព្យសម្បត្តិរបស់គាត់ឈានដល់ ១២១ពាន់លានដុល្លារអាមេរិក ដែលកើនឡើងជាង៤០ពាន់លានដុល្លារអាមេរិក បើធៀបនឹងឆ្នាំ ២០២៣។

៩. មានទ្រព្យសម្បត្តិចំនួន ១១៦ពាន់លានដុល្លារអាមេរិក មហាសេដ្ឋីឥណ្ឌាលោក Mukesh Ambani បច្ចុប្បន្នគឺជាអ្នកមានបំផុតទី០៩ នៅលើពិភពលោក។ គាត់កំពុងដំណើរការក្រុមហ៊ុន Reliance Industries Group ដែលជាអាជីវកម្មមួយដែលកំពុងប្រតិបត្តិការក្នុងវិស័យជាច្រើន រួមទាំង ឥន្ធនៈ ប្រេង និងឧស្ម័ន ទូរគមនាគមន៍ ក៏ដូចជាការលក់រាយផងដែរ។

១០. លោក Larry Page មានទ្រព្យសម្បត្តិចំនួន ១១៤ពាន់លានដុល្លារអាមេរិក និងជាសហស្ថាបនិកក្រុមហ៊ុន Google រួមជាមួយលោក Sergey Brin ។ ក្នុងឆ្នាំ២០១៩ មហាសេដ្ឋីវ័យ ៥១ឆ្នាំរូបនេះបានលាលែងពីតំណែងជា CEO នៃ Alphabet ដែលជាក្រុមហ៊ុនមេរបស់ Google ប៉ុន្តែនៅតែជាសមាជិកក្រុមប្រឹក្សាភិបាល និងម្ចាស់ភាគហ៊ុន៕