ខេត្តបាត់ដំបង ៖ ប្រជាពលរដ្ឋម្នាក់បានរងរបួសប្រអប់ជើងម្ខាងដោយសារដើររើសផ្លែសំរងក្នុងព្រៃ រួចជាន់ចំគ្រាប់មីនបណ្ដាលឱ្យផ្ទុះកាលពីវេលាម៉ោង៤ និង៣០នាទីរសៀលថ្ងៃទី៣០ មីនា ស្ថិតនៅចំណុចទឹកជុល ក្នុងភូមិភ្នំរៃ ឃុំតាតោក ស្រុកសំឡូត…
ខេត្តបាត់ដំបង ៖ ប្រជាពលរដ្ឋម្នាក់បានរងរបួសប្រអប់ជើងម្ខាងដោយសារដើររើសផ្លែសំរងក្នុងព្រៃ រួចជាន់ចំគ្រាប់មីនបណ្ដាលឱ្យផ្ទុះកាលពីវេលាម៉ោង៤ និង៣០នាទីរសៀលថ្ងៃទី៣០ មីនា ស្ថិតនៅចំណុចទឹកជុល ក្នុងភូមិភ្នំរៃ ឃុំតាតោក ស្រុកសំឡូត ។
អធិការស្រុកសំឡូត លោក ម៉ែន រីម បានឲ្យដឹងថា ជនរងគ្រោះឈ្មោះជី ឃាន ហៅតាសក់ស អាយុ៦២ឆ្នាំ រស់នៅភូមិ ឃុំកើតហេតុខាងលើ ។ លោកបានបញ្ជាក់ថា ជនរងគ្រោះ រួមជាមួយអ្នកភូមិជាច្រើននាក់ទៀតបាននាំគ្នាចូលព្រៃនៅតំបន់ខាងលើ ដើម្បីដើររើសផ្លែសំរងយកទៅលក់ តែចៃដន្យជនរងគ្រោះ បានដើរជាន់ចំគ្រាប់មីនដែលកប់ក្នុងដី បណ្ដាលឲ្យផ្ទុះឡើងរបួសធ្ងន់ធ្ងរប្រអប់ជើងខាងស្ដាំ ។
ក្រោយពេលត្រូវរបួសអ្នកភូមិបានជួយដឹកជនរងគ្រោះទៅកាន់មណ្ឌលសុខភាពតាតោក ដើម្បីសង្គ្រោះបន្ទាន់ ។ ជារៀងរាល់ឆ្នាំ នារដូវប្រាំងគេតែងឃើញប្រជាពលរដ្ឋមួយចំនួននៅស្រុកសំឡូត តែងនាំគ្នាចូលព្រៃដើររើសផ្លែសំរងយកទៅលក់ ដើម្បីរកចំណូលផ្គត់ផ្គង់ជីវភាពគ្រួសារប្រចាំថ្ងៃ ។ ក្រៅពីនេះពួកគេក៏បាននាំគ្នាដើរកាប់ស្លឹកចេកព្រៃយកទៅលក់ដែរ ដែលជាមុខរបរបន្ទាប់បន្សំក្រៅពីធ្វើចំការ ។
ដោយសារតែការចូលរុករានព្រៃរកអនុផលព្រៃឈើបែបនេះ ទើបធ្វើឲ្យប្រជាពលរដ្ឋក្រីក្រមួយចំនួននៅក្នុងស្រុកសំឡូតតែងជួបគ្រោះថ្នាក់ដោយសារគ្រាប់មីនដែលសេសសល់ពីសម័យសង្គ្រាមជាបន្តបន្ទាប់នាពេលកន្លងមក ។
យ៉ាងណាក្ដី បើតាមលោក ម៉ែន រីម បានប្រាប់ថា អ្នកសមត្ថកិច្ចបានមិនបានដឹងរឿងនេះក្នុងពេលកើតហេតុភ្លាមៗទេ គឺបានដឹងនៅពេលអ្នកភូមិនាំគ្នាដឹកជនរងគ្រោះ ចេញពីក្នុងព្រៃបញ្ជូនមកដល់មណ្ឌលសុខភាពនៅពេលយប់ ។ ពេលនេះ ត្រូវបានក្រុមគ្រួពេទ្យបញ្ជូនបន្តទៅកាន់មន្ទីរពេទ្យខេត្តហើយ ៕
ចែករំលែកព័តមាននេះ