ខេត្ត​បន្ទាយមានជ័យ ៖ បុរស​ជនជាតិឥណ្ឌូណេស៊ីម្នាក់​ស្រវឹង​ជោក បាន​បើកបរ​រថយន្ត​ដឹកស្រីស្នេហ៍ជនជាតិខ្មែរ ​បុករះម៉ូតូកង់បីមួយគ្រឿង និងម៉ូតូមួយគ្រឿង បង្កការភ្ញាក់ផ្អើល​ដល់​ប្រជាពលរដ្ឋនាំគ្នាហាមមិនឱ្យបន្តបើកបរ ក៏ផ្ទុះហិ.ង្សាកើត​ឡើងរវាងអ្នកបើកបររថយន្តបង្កនិងប្រជា​ពលរដ្ឋ បង្កការភ្ញាក់ផ្អើលកាល​ពីយប់ថ្ងៃទី២៩ ខែមីនា ឆ្នាំ២០២៤ នៅចំណុចដីស ស្ថិតភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ ។

អ្នកឃើញហេតុការណ៍បានឱ្យដឹងថា នៅពេលគ្រោះថ្នាក់ចរាចរណ៍កើតឡើង មានរថយន្តសេរីទំនើប​មួយគ្រឿង ពាក់ផ្លាក់លេខ កម្ពុជា CONG.168 បើកបរដោយជនជាតិឥណ្ឌូណេស៊ី បានដឹកស្រីស្នេហ៍ជនជាតិខ្មែរបើកបរក្នុងស្ថានភាពស្រវឹង បានបុកម៉ូតូកង់បីឥណ្ឌាមួយគ្រឿង ហើយសង​សំណង២​ម៉ឺនបាត ស្មើនឹង​ជិត៣លានរៀល ​លុះធ្វើដំណើរបានជិត១០០ម៉ែត្រ ក៏​បានបុកជនជាតិឥណ្ឌូណេស៊ីដូចគ្នាដែលជា​អ្នកជិះម៉ូតូ បណ្តាលឱ្យ​រង​របួសស្រាល និងខូចខាតម៉ូតូ។

ក្រោយឃើញជនជាតិឥណ្ឌូណេស៊ីបើកបរស្ថានភាពស្រវឹងបើកបរបុកយានយន្ត២គ្រឿង នៅ​កន្លែង​២ផ្សេងគ្នា ក្នុង​រយៈពេលមួយ​ប៉ប្រិច​ភ្នែក ​ប្រជា​ពលរដ្ឋ​ក៏​បាននាំគ្នាចូលហាមមិនឱ្យបើកបរបន្ត ព្រោះ​អាចបង្កគ្រោះថ្នាក់ទៀត ។ លុះ​ពេលចូលទៅ​ហាមឃាត់មិនឱ្យបើកបរ បែរជាជនជាតិឥណ្ឌូណេស៊ីស្ទុះ​វាយទៅ​លើប្រជាពលរដ្ឋទៅវិញ ហើយស្ត្រីជនជាតិខ្មែរដែលជាសង្សាស្រែកថាគេប្រើហិ.ង្សាទៅលើសង្សាខ្លួនទៅវិញ ពិតជាគួរ​ឱ្យ​ហួសចិត្ត។

ក្រោយគ្រោះចរាចរណ៍បង្កហិ.ង្សា ស្រាប់តែមានកម្លាំងនគរបាលចរាចរណ៍និងអន្តរាគមន៍បានចុះមកសម្របសម្រួលហើយឱ្យជនជាតិឥណ្ឌូណេស៊ីដោះស្រាយជាមួយជនជាតិឥណ្ឌូណេស៊ីដែលជិះ​រថយន្តបុក បណ្តាលឱ្យ​របួសស្រាល និងខូចខាតម៉ូតូ ហើយនាំយកទាំងរថយន្តនិងជនជាតិឥណ្ឌូណេស៊ីនិងស្ត្រីជាសង្សាជនជាតិខ្មែរទៅអធិការនគរបាលក្រុងប៉ោយប៉ែត ដើម្បីនាំយកទៅសាកសួរនិងអនុវត្តន៍តាមច្បាប់ចរាចរណ៍ដែលស្រវឹងបើកបរត្រូវពិន័យតាមច្បាប់ ៕