សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានចេញដំណើរទៅទស្សនកិច្ចនៅ ប្រទេសឡាវ កាលពីថ្ងៃទី២៥ ខែមិនា ។ តើមេដឹកនាំកម្ពុជា និងឡាវ…
សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានចេញដំណើរទៅទស្សនកិច្ចនៅ ប្រទេសឡាវ កាលពីថ្ងៃទី២៥ ខែមិនា ។ តើមេដឹកនាំកម្ពុជា និងឡាវ អាចពិភាក្សា ដល់ការរកស៊ីរួមគ្នាលើការផ្គត់ផ្គង់ថាមពលក្នុងតំបន់ឬទេ?
ទំនាក់ទំនងកម្ពុជា និងឡាវ គឺធម្មតា ពោលជាទំនាក់ទំនងបែបប្រពៃណី និងជាទំនាក់ទំនងនៃប្រទេសជិតខាងល្អតាំងពីដើមរៀងមកនៃប្រវត្តិសាស្ត្រ ។ ប៉ុន្តែចំណុចមួយថ្មីដែលកម្ពុជាសម្លឹងឃើញនោះ គឺឡាវអាចជួយឲ្យកម្ពុជាក្លាយជាឈ្មួញកណ្តាលថាមពលមួយនៅក្នុងតំបន់ ខណៈដែលឡាវក៏ត្រូវការកម្ពុជាជួយលើផ្នែកនេះផងដែរ ដើម្បីបង្កើនចំណូលថវិកាជាតិរបស់ខ្លួន ។
កម្ពុជាមានព្រំដែនជាប់នឹងប្រទេសបី គឺឡាវ វៀតណាម និងថៃ ប៉ុន្តែទំនាក់ទំនងសេដ្ឋកិច្ច និងកិច្ចសហប្រតិបត្តិការជាមួយនឹងឡាវ គឺមានតិចតួចបំផុតធៀបនឹងប្រទេសទាំងពីរផ្សេងទៀត ។ ដោយមកដល់ឆ្នាំ២០២៣កន្លងទៅទំហំពាណិជ្ជកម្មរវាងប្រទេសទាំងពីរ គឺមានតែត្រឹមជាង១៩៤លានដុល្លារប៉ុណ្ណោះ ដោយនៅក្នុងនោះកម្ពុជានាំចេញទៅឡាវតែជាង៤លានដុល្លារទេ តែនាំចូលមកវិញជាង១៩០លានដុល្លារ ។
ក្រៅពីពាណិជ្ជកម្ម គឺអាចមានវិស័យទេសចរណ៍ ដោយកាលពីឆ្នាំ២០២៣កន្លងទៅភ្ញៀវ ទេសចរឡាវ គឺឈរនៅលំដាប់លេខរៀងទី៤ដែរដោយទាក់ទាញបានអ្នកទេសចរឡាវសរុប ជាង៣៧ម៉ឺននាក់ដែរ ហើយនៅមានកម្ពុជាវិនិយោគលើវិស័យហិរញ្ញវត្ថុខ្លះនៅក្នុងប្រទេស ឡាវផងដែរ ប៉ុន្តែមិនធំប៉ុន្មានឡើយ ។
ក្រៅពីនោះ គឺជាកិច្ចសហប្រតិបត្តិការនយោបាយ ការទូត និងសន្តិសុខ ប៉ុន្តែនៅក្នុង ដំណើរទស្សនៈកិច្ចរបស់សម្តេចធិបតី ហ៊ុន ម៉ាណែត នៅឡាវរយៈពេលពីរថ្ងៃពោល គឺចាប់ពីថ្ងៃទី២៥ ដល់២៦ ខែមីនា ឆ្នាំ២០២៤នេះ អាចមានសមិទ្ធផលសេដ្ឋកិច្ចថ្មីសម្រាប់ជាប្រយោជន៍ ដល់ប្រទេសទាំងពីរបន្ថែមលើសក្តានុពលសេដ្ឋកិច្ចដែលមានស្រាប់ ។
មកដល់ពេលនេះ ឡាវត្រូវបានគេចាត់ទុកថា ជាធុងអាគុយអគ្គិសនីមួយនៅក្នុងតំបន់អាស៊ាន ប៉ុន្តែមកដល់ពេលនេះឡាវហាក់កំពុងតែទទួលបានផលពីសក្តានុពលនេះតិច ។ នៅពេលនេះឡាវត្រូវបានគេដឹងថា អាចផលិតថាមពលលើសពី១១.៦០០ មេហ្គាវ៉ាត់ពីរោងចក្រអគ្គិសនី ៩៤កន្លែង ដោយនៅក្នុងនោះ មាន៨១ កន្លែង គឺជាវារីអគ្គិសនី ហើយឡាវអាចលក់ចេញថាមពលទាំងនោះទៅថៃ ចិន វៀតណាម មីយ៉ាន់ម៉ា និងកម្ពុជា នៅក្នុងតម្លៃ២,៣ពាន់លានដុល្លារ ។
ដោយឃើញនូវសក្តានុពលនេះ កម្ពុជាក៏បានផ្តួចផ្តើមគម្រោងមួយដែលពាក់ព័ន្ធនឹង គម្រោងកសាងខ្សែកាបបញ្ជូនចរន្តអគ្គិសនីនៅក្រោមសមុទ្រដោយភ្ជាប់ពីឡាវ មកកម្ពុជា ហើយទៅប្រទេសផ្សេងៗមាន សិង្ហបុរី និងម៉ាឡេស៊ី ។
ពាក់ព័ន្ធនឹងគម្រោងនេះ សម្តេចធិបតីនាយករដ្ឋមន្ត្រីតែងតែបង្ហាញនូវគម្រោងនេះទៅមេដឹកនាំបរទេស ជាពិសេស គឺមេដឹកនាំសិង្ហបុរី និងម៉ាឡេស៊ី នៅពេលដែលលោកបានជួបនៅក្នុងជំនួបនៅក្រៅប្រទេសឬក៏ជំនួបទ្វេភាគី ដោយមេដឹកនាំនានាក៏បានបង្ហាញនូវ សមានចិត្តគាំទ្រចំពោះគម្រោងនេះដែរ គ្រាន់តែលទ្ធផលដែលជាក់ស្តែងហាក់នៅមិនទាន់លម្អិតនៅឡើយ ។ តាមការស្រាវជ្រាវឯកសារកន្លងមក គម្រោងនេះបានត្រួសត្រាយផ្លូវដោយរដ្ឋាភិបាលកម្ពុជា តាំងពីអាណត្តិមុនមកម្ល៉េះ ប៉ុន្តែទោះបីជាយ៉ាងណាក៏ដោយនៅក្នុងនាមជាអ្នកបន្តវេន គឺកម្ពុជា កំពុងតែដុតដៃដុតជើងនៅលើគម្រាងនេះខ្លាំងបំផុត ។
តាមសេចក្តីប្រកាសរបស់ក្រសួងបរទេសដែលបានចេញផ្សាយអំពីដំណើរទស្សនៈកិច្ចរបស់ សម្តេចធិបតីទៅឡាវ មិនមានបង្ហាញដោយត្រង់ៗអំពីចំណុចឈ្មួញថាមពលរបស់កម្ពុជានេះទេ ។ ប៉ុន្តែទោះបីជាយ៉ាងណាក៏ដោយ ប្រភពដដែលបានអោយដឹងថា នៅក្នុងឱកាស នៃដំណើរទស្សនៈកិច្ចនោះ សម្តេចធិបតីនឹងជួបសំដែងការគួរសមជាមួយនឹងថ្នាក់ដឹកនាំ ឡាវនានា ហើយនៅក្នុងជំនួបទ្វេភាគីជាមួយនឹងលោក សនសៃ ស៊ីផាន់ដន គឺបានបង្ហើបថា មេដឹកនាំកម្ពុជា និងឡាវ នឹងពិភាក្សាអំពីមធ្យោបាយនានាក្នុងការលើកកម្ពស់បន្ថែម ទៀតនូវកិច្ចសហប្រតិបត្តិការទ្វេភាគីលើវិស័យជាច្រើនដែលជាផលប្រយោជន៍រួមរបស់ ប្រទេសទាំងពីរ ។
ប្រភពដដែលបានបន្តថា បន្ទាប់ពីពិភាក្សា គេនឹងមានពិធីចុះហត្ថលេខាលើឯកសារកិច្ចសហប្រតិបត្តិការរវាងប្រទេសទាំងពីរនៅលើវិស័យ ឬគម្រោងមួយចំនួន ។
សរុបមកវិញ ប្រសិនបើកម្ពុជាអាចក្លាយជាឈ្មួញកណ្តាលលើផ្នែកថាមពលពីឡាវទៅសិង្ហបុរី ម៉ាឡេស៊ីមែននោះ កម្ពុជានឹងអាចទទួលបានភាគលាភ ដើម្បីជាចំណូលចូលជាតិបន្ថែមទៀត ទោះបីជាមិនច្រើនក៏វាជាប្រភពចំណូលបន្ថែមដល់រដ្ឋាភិបាល និងប្រទេសជាតិ ៕
ចែករំលែកព័តមាននេះ