នៅក្នុងពេលដែលវិស័យអចលនទ្រព្យស្រុតចុះ កុំថាឡើយប្រជាពលរដ្ឋ សូម្បីតែបុគ្គលសាធារណៈដូចជាតារាៗមួយចំនួន ក៏កំពុងតែជួបបញ្ហា ហើយត្អូញត្អែរនឹងបញ្ហាទិញផ្ទះ និងដីបានមិនសមប្រកបជាបន្តបន្ទាប់ផងដែរ ។ អ្នកនាង សុខ ចាន់ធីតា…
នៅក្នុងពេលដែលវិស័យអចលនទ្រព្យស្រុតចុះ កុំថាឡើយប្រជាពលរដ្ឋ សូម្បីតែបុគ្គលសាធារណៈដូចជាតារាៗមួយចំនួន ក៏កំពុងតែជួបបញ្ហា ហើយត្អូញត្អែរនឹងបញ្ហាទិញផ្ទះ និងដីបានមិនសមប្រកបជាបន្តបន្ទាប់ផងដែរ ។
អ្នកនាង សុខ ចាន់ធីតា ហៅកាតុ ជាសិល្បករផ្នែកកំប្លែងមួយរូបបានលើកឡើង នៅលើបណ្តាញសង្គមថា «ប៉ុន្មានថ្ងៃនេះក្នុងបណ្តាញសង្គម មានរឿងរ៉ាវជាច្រើន អ្នកខ្លះចង់ធ្វើនេះ អ្នកខ្លះចង់នោះ តែចំណែកខ្ញុំមិនចង់ធ្វើអ្វីទេ ចង់បានតែផ្ទះដែលជាញើសឈាម ដែលខំសន្សំពីរនាក់ប្តីប្រពន្ធទាំងយប់ទាំងថ្ងៃ ទាំងក្នុងការងារសិល្បៈ និងការងាររកស៊ីផ្សេងៗដើម្បីយកលុយទិញផ្ទះ[….] តែអស់រយៈពេលជិតបីឆ្នាំហើយ ឃើញតែឥដ្ឋក្រហមបានពាក់កណ្តាល» ។
អ្នកនាងកាតុ បន្តថា «សួរគេដែរ តែគេឱ្យខ្ញុំយោគយល់ តើយោគយល់ប៉ុន្មានឆ្នាំទៀត (អាតូចយល់អាធំ) ខ្ញុំសែនពិបាកចិត្តរាល់ថ្ងៃ តែម្ចាស់បុរីដើរធ្វើបុណ្យដូចគ្មានរឿងអី ចុះទម្រាំបងប្អូននៅផ្ទះជួលយកលុយពីធនាគារ តើពួកគាត់គិតយ៉ាងម៉េច? ជួយពិចារណាតាមការគួរ» ។
ស្រដៀងគ្នានេះដែរ លោក ចែម ចាន់រ៉ា ដែលត្រូវបានមហាជនស្គាល់ថាជា នាយពាក់មី តារាកំប្លែងល្បីប្រចាំប្រទេស នៅថ្ងៃទី១៨ ខែមីនា បានបង្ហោះសារហួសចិត្តមួយ បន្ទាប់ពីលោកបានទិញផ្ទះក្នុងបុរីមួយកន្លែងពេលបានចុះមើលឃើញសភាពផ្ទះ ស្ទើរមិនគួរឱ្យជឿ ខណៈដែលជាងធ្វើផ្ទះឱ្យលោកធ្វើឱ្យរួចពីដៃ ហាក់បីមើលងាយលោកណាស់ ។
តាមរយៈសារបង្ហោះក្នុងគណនីហ្វេសប៊ុកផ្ទាល់របស់ លោក ចែម ចាន់រ៉ា បានសរសេររៀបរាប់យ៉ាងដូច្នេះថា «ផ្ទះទិញកុងត្រា១៨ខែទិញដាច់បង់លុយដាច់ តែជាង៣ឆ្នាំហើយ នៅធ្វើមិនទាន់ហើយទៀត ។ សូមម្ចាស់បុរី ជួយធ្វើអោយផង ជាពិសេសសូមដាក់ជាងដែលមានជំនាញមកធ្វើផងដីខ្ពស់ជាងផ្ទះសសរចាក់មិនត្រង់ជួរគ្នា ការ៉ូក្រាលខ្ពស់ទាបនៅមានទៀត! ខ្ញុំជាអ្នកធ្លាប់ធ្វើសំណង់ដែរ ។ ខ្ញុំយល់ច្បាស់ពីសំណង់ ដល់ពេលដាក់ជាងគ្មានជំនាញ ធ្វើផ្ទះខ្ញុំចឹងដូចមើលងាយខ្ញុំណាស់ ខ្ញុំប្រាប់ហើយថា ផ្ទះខ្ញុំទិញទុកអោយកូននៅ មិនមែនទិញទុកលក់វិញទេ សូមយកចិត្តទុកដាក់លើជាងផង» ។
ថ្មីៗនេះ តារាសម្ដែង សាវិន ហ្វីលីព បានចេញមកប្រកាសនៅលើបណ្ដាញសង្គមហ្វេសប៊ុកជាសាធារណៈឱ្យមហាជនបានដឹងថា លោកបានក្លាយជាជនរងគ្រោះក្រោយបានទិញដីនៅក្នុងគម្រោងទី៣០ របស់លោកស្រី ម៉ន ដានី នៅខេត្តកំពត ប្រមាណជាង១០ឡូតិ៍ ដែលឥឡូវនេះត្រូវបាននិយ័តករអាជីវកម្មអចលនទ្រព្យវត្ថុ និងបញ្ចាំប្រកាសថាជា គម្រោងដែលលក់គ្មានច្បាប់ទទួលស្គាល់ត្រឹមត្រូវ ។
ជាមួយគ្នានេះ តារាសម្ដែង សាវិន ហ្វីលីព បានរៀបរាប់ជាសំណេរភ្ជាប់ជាមួយរូបថតជាច្រើនសន្លឹកយ៉ាងដូច្នេះ «នៅទីបំផុតនិយ័តករអាជីវកម្មអចលនទ្រព្យ និងបញ្ចាំ ទើបចេញលិខិតជូនដំណឹងថា គម្រោងដីទ្បូត៌ទី៣០ ម៉ន ដានី នៅខេត្តកំពត គឺបានពុះទ្បូត៌លក់ដោយគ្មានច្បាប់ ក្រោយ LIVE លក់ផ្អើលប្រទេសកន្លងមក ។ ខ្ញុំបានក្លាយជាជនរងគ្រោះម្នាក់ដែលបានទិញដីនេះជាង១០ទ្បូត៌ (បង់លុយផ្ដាច់) ក្នុងចំណោមជនរងគ្រោះរាប់រយនាក់ កំពុងធ្វើការតវ៉ាទៅក្រសួងដែនដី ខណៈពេលនេះលោកស្រី ម៉ន ដានី ដែលជាមនុស្សដែលខ្ញុំគោរពរាប់អានក៏មិនដឹងនៅទីណាដែរ?
ប្រភពមួយបញ្ជាក់ថា លោកស្រី ម៉ន ដានី ក៏នៅមិនទាន់ឱ្យលុយម្ចាស់ដីនេះនៅទ្បើយទេ..ខ្ញុំសង្ឃឹមថា ប្អូនស្រី ម៉ន ដានី នឹងចេញមុខមកដោះស្រាយលើបញ្ហានេះជូនអតិថិជនមិនខាន»។
ទាក់ទង និងរឿងផ្ទះ និងដីឡូត៌នេះ នៅក្នុងវេទិកាតុមូល ស្តីពីវេទិកាពិភាក្សាស្តីពីស្ថានភាពសេដ្ឋកិច្ច និងអចលនទ្រព្យនៅកម្ពុជា ឆ្នាំ២០២៤ ថ្មីៗនេះ លោកបណ្ឌិត គី សេរីវឌ្ឍន៍ ថ្លែងថា វិស័យអចលនទ្រព្យមានកំណើនយឺតៗ មិនអាចមានសន្ទុះលឿនបាននោះទេ ហើយមានការប្តូរទម្រង់សម្រាប់ឆ្នាំ២០២៤នេះ ។
លោកបណ្ឌិត គី សេរីវឌ្ឍន៍ បន្តថា «ដីឡូ គឺចប់ហើយ ដីឡូត៌ដែលមានបញ្ហាពីមុនមកធ្វើអោយពលរដ្ឋរៀងចាល ។ ខ្ញុំជឿថា ពលរដ្ឋយើងឆាប់រៀងណាស់ ។ គាត់លែងទិញដីឡូត៌ ប្រភេទហ្នឹងហើយ ។ ដីឡូត៌ដែលលក់បានជាដីឡូត៌ គឺជាដីឡូត៌ដែលម្ចាស់ជាប់លុយធនាគារលក់ ចុះថ្លៃ៥០ភាគរយទើបលក់បាន» ។
លោក ស៊ន សៀប ប្រធានសមាគអ្នកវាយតម្លៃ និងភា្នក់ងារអចលនទ្រព្យកម្ពុជា បានអោយដឹងថា ដីឡូត៌ដែលអាចមានទីផ្សារក្នុងការលក់ ឬទិញ អាស្រ័យលើកត្តាធំៗចំនួន ៥ រួមមាន តំបន់ដែលមានទីតាំងមានប្រជាពលរដ្ឋរស់នៅ មានផ្លូវតភ្ជាប់ទៅនឹងបណ្តាញ ទូរគមនាគមផ្សេងៗ សុវត្ថិភាពភាពងាយស្រួលទៅផ្សារ សាលារៀន មន្ទីរពេទ្យ និងកន្លែងដែលកំពុងធ្វើហេដ្ឋារចនាសម្ព័ន្ធ ។
លោក ស៊ន សៀប បន្តថា «កន្លងមកឃើញថា មានការប្រទូសសារាយបញ្ហាច្រើន ។ ដីឡូត៌យើងបែងចែកជាពីរ ។ ដីឡូត៌ដែលយើងធ្វើកន្លងមកច្រើន គឺដីឡូត៌នៅក្នុងគម្រោង ។ គម្រោង ហ្នឹងគេទិញហើយអត់ទាន់មានប្លង់ មិនទាន់មានអ្វីច្បាស់លាស់ ផ្លូវក៏អត់ទាន់មាន លូអត់ទាន់មាន ទឹកអត់ទាន់មាន ភ្លើងក៏អត់ទាន់មាន ហើយទីតាំងទៀតមិនអាចទៅនៅបាន» ៕ ដោយៈ ស នីត
ចែករំលែកព័តមាននេះ