ទីក្រុងផតអូព្រីនស៍៖ បន្ទាប់ពីក្រុមបងធំឡើងចាងខ្លាំងនៅប្រទេសហៃទី ឥឡូវនេះ សមត្ថកិច្ចចាប់ផ្ដើមបើកយុទ្ធនាការវាយបកទៅលើពួកគេវិញហើយ ហើយបានបាញ់សម្លាប់សុទ្ធតែមេរបស់ពួកគេតែម្ដង។ សមត្ថកិច្ចបើកប្រតិបត្តិការបាញ់សម្លាប់មេបងធំឈ្មោះអឺន ចាល់មេ (Ernst Julme) រហស្សនាមទីក្រិច (Ti Greg)។ ហេតុការណ៍នេះកើតឡើងមួយថ្ងៃបន្ទាប់ពីសមត្ថកិច្ចបាញ់សម្លាប់មេបងធំមួយទៀតកាលពីម្សិលមិញ។
ការស្លាប់មេបងធំឈ្មោះ «ចាល់មេ» ដែលជាប្រធានក្រុមបាប៊ីឃ្យូ (Barbeque) ជាសញ្ញាព្រមានចំពោះក្រុមបងធំដទៃទៀតថាពួកគេមិនអាចធ្វើព្យុះធ្វើភ្លៀងស្រេចតែនឹងចិត្តតទៅទៀតឡើយ។ កាលពីមុននេះ ពួកគេដើរអុកឡុកពេញរដ្ឋធានីផតអូព្រីនស៍។ និយាយទៅ, ពួកគេសឹងតែប៉ាវផ្ដាច់ទីក្រុងនេះមួយទាំងមូល។ ចាលមេទើបតែរត់ចេញពីគុកកាលពីពេលថ្មីៗនេះ។
នៅពេលប្រទេសជាតិធ្លាក់ទៅក្នុងភាពអនាធិបតេយ្យបែបនេះ ក្រុមអ្នកនយោបាយសម្រេចចិត្តជ្រើសរើសសមាជិកក្រុមប្រឹក្សាជាតិដើម្បីគ្រប់គ្រងសភាពការណ៍នៅក្នុងសម័យអន្តរកាល និងត្រៀមរៀបចំការបោះឆ្នោតនាពេលខាងមុខ។ ក្រុមប្រឹក្សានេះប្រមូលផ្ដុំក្រុមអ្នកនយោបាយដែលបែកបាក់គ្នា។ គេត្រូវតែងតាំងអ្នកជំនួសនាយករដ្ឋមន្ត្រីអារីយែល ហឹនរី (Ariel Henry) ដែលប្រកាសលាលែងពីតំណែងកាលពីថ្ងៃទី១១ ខែមីនា។ លោកត្រូវតែបង្ខំចិត្តចុះពីអំណាចព្រោះក្រុមបងធំមិនស្វាគមន៍គាត់តទៅទៀតទេ។
គេរំពឹងថាប៉ុន្មានថ្ងៃទៀត ក្រុមប្រឹក្សាដែលមានសមាជិក៩រូបអាចនឹងបង្កើតចេញ។ ប៉ុន្តែក្រុមអ្នកនយោបាយខ្លះមិនឯកភាពគ្នារស់នៅក្រោមដំបូលតែមួយទេ។ បក្សនយោបាយ១ ប្រកាសច្រានចោលផែនការនេះពីដំបូងដៃ។ ប៉ុន្តែក្រោយមកប្រកាសគាំទ្រវិញ។ ចំណែកក្រុមដទៃទៀតដែលត្រូវគេផាត់ចេញមិនឱ្យចូលរួមនៅក្នុងផែនការបង្កើតក្រុមប្រឹក្សានេះមិនចង់ឃើញអ្នកនយោបាយនៅក្នុងរបបមុនចូលរួមនៅក្នុងក្រុមប្រឹក្សានេះទេ។ ពួកគេចោទប្រកាន់ថាអ្នកទាំងនោះជាមនុស្សពុករលួយ។
ការប្រយុទ្ធគ្នាបន្តកើតមាននៅក្នុងទីក្រុង
នៅពេលក្រុមប្រឹក្សាជាតិជិតបង្កើតបានហើយ គេសង្កេតឃើញថាការបាញ់គ្នាយ៉ាងសន្ធាប់នៅតែកើតមានកាលពីយប់មិញនៅក្នុងរដ្ឋធានី។ អ្នកខ្លះរត់គេចចេញពីការប្រយុទ្ធគ្នានៅតំបន់ជាយក្រុង។ កាលពីថ្ងៃពុធ មានករណីបាញ់ស្លាប់ក្រុមបងធំជាច្រើននាក់ និងដុតកម្ទេចសាកសពចោលថែមទៀត។ ក្នុងនោះ មានមេក្រុមបងធំម្នាក់ឈ្មោះម៉ាកាន់ដាល់ (Makandal)។
អង្គការសហប្រជាជាតិ និងស្ថាប័នអន្តរជាតិមួយចំនួនទៀតបន្តជម្លៀសបុគ្គលិករបស់ខ្លួន និងជនជាតិបរទេសតាមឧទ្ធម្ភាគចក្រព្រោះអាកាសយានដ្ឋានធំរបស់ប្រទេសហៃទីគ្មានសុវត្ថិភាពទេ។ រដ្ឋាភិបាលកាណាដាថ្លែងថាកងទ័ពរបស់ខ្លួននឹងសហការជាមួយស្ថានទូតនៅហៃទីដើម្បីជួយសម្រួលការជម្លៀសមនុស្ស។ ការថ្លែងដូចនេះបន្ទាប់ពីមានរបាយការណ៍ថាទាហានកាណាដាចាប់ផ្ដើមជាន់លើដីហៃទីជាបណ្ដើរៗហើយដើម្បីការពារស្ថានទូតរបស់ខ្លួន។
រដ្ឋាភិបាលអាមេរិកក៏បានជម្លៀសពលរដ្ឋរបស់ខ្លួន៩០នាក់ចេញពីប្រទេសហៃទីឆ្ពោះទៅទីក្រុងម៉ាយអាមីខ្លះ (Miami) និងទៅសាធារណរដ្ឋដូមីនីកាំងខ្លះ (Dominican Republic)។ អាមេរិកទើបតែជម្លៀសពលរដ្ឋរបស់ខ្លួន៧០នាក់ផ្សេងទៀតចេញពីប្រទេសហៃទីកាលពីថ្ងៃអាទិត្យ។ នេះបើយោងតាមការជូនដំណឹងពីក្រសួងការបរទេស៕
ប្រភព៖ Reuters
https://www.reuters.com/world/americas/un-welcomes-reports-haiti-transition-council-nearly-ready-conflict-flares-2024-03-21/
ចែករំលែកព័តមាននេះ