ខេត្តបាត់ដំបង ៖ ជនសង្ស័យចំនួនពីរនាក់ដែលមានម្នាក់ជាស្ត្រីបានបន្លំចូលលួចយកលុយអស់ចំនួនជាង៦ពាន់ដុល្លាអាមេរិក នៅកន្លែងវេលុយ «ទ្រូម៉ានី» រួចនាំគ្នាជិះម៉ូតូគេចខ្លួនដោយសុវត្ថិភាព កាលពីវេលាម៉ោង៨និង១០នាទីព្រឹក ថ្ងៃទី២២ ខែមិនា ស្ថិតក្នុងភូមិនំក្រៀប…
ខេត្តបាត់ដំបង ៖ ជនសង្ស័យចំនួនពីរនាក់ដែលមានម្នាក់ជាស្ត្រីបានបន្លំចូលលួចយកលុយអស់ចំនួនជាង៦ពាន់ដុល្លាអាមេរិក នៅកន្លែងវេលុយ «ទ្រូម៉ានី» រួចនាំគ្នាជិះម៉ូតូគេចខ្លួនដោយសុវត្ថិភាព កាលពីវេលាម៉ោង៨និង១០នាទីព្រឹក ថ្ងៃទី២២ ខែមិនា ស្ថិតក្នុងភូមិនំក្រៀប សង្កាត់ព្រែកព្រះស្ដេច ក្រុងបាត់ដំបង បន្សល់ទុកតែសកម្មភាព នៅក្នុងកាម៉េរាសុវត្តិភាព តែអំពើចោរកម្មនេះហាក់មិនធ្វើឲ្យសមត្ថកិច្ចភ្ញាក់ផ្អើលប៉ុន្មានទេ ។
ជនរងគ្រោះនៅក្នុងហេតុការណ៍នេះឈ្មោះ ប៉េង ចាន់នី ស្រី អាយុ២៦ឆ្នាំ មានមុខរបរលក់ដូរ និងវេលុយ«ទ្រូម៉ានី» ។ នាង ចាន់នី បានប្រាប់កោះសន្តិភាព ក្រោយពេលកើតហេតុបន្តិចថា ពេលកើតហេតុ នាងនៅលក់ដូរម្នាក់ឯង នៅខាងមុខផ្ទះ ខណៈម្ដាយនាងកំពុងធ្វើការងារនៅផ្ទះបាយខាងក្រោយ ។ នាងនិយាយថា ពេលនោះមានជនសង្ស័យពីរនាក់ និងមានស្ត្រីម្នាក់ជាអ្នកជិះម៉ូតូមកឈប់នៅខាងមុខផ្ទះនាង រួចធ្វើជាចូលមករកទិញគ្រឿងភេសជ្ជៈ រីឯបុរសម្នាក់ទៀតបានបន្លំដើរចូលទៅលួចលុយក្នុងថតតុ ដែលទុកនៅក្នុងបន្ទប់វេលុយ ។
នាង ប៉េង ចាន់នី បាននិយាយបន្តថា ដំបូងមានស្ត្រីម្នាក់បានឈប់ម៉ូតូនៅលើថ្នល់មុខផ្ទះ រួចចុះដើរចូលមករកទិញគ្រឿងភេសជ្ជៈ ដែលគិតជាប្រាក់អស់ចំនួនជាង៥ម៉ឺនរៀល ។ ពេលទិញរួច ស្ត្រីនោះមិនកាន់យកទៅទេ ហើយក៏មិនទាន់ឲ្យលុយដែរ បានដើរទៅឡើងជិះម៉ូតូ ហើយឲ្យនាងកាន់យកទៅឲ្យដល់ម៉ូតូ ។ នាងប្រាប់ថា ពេលយកទំនិញទៅឲ្យស្ត្រីនោះបានហុចលុយឲ្យនាងមួយដុំរាប់ចំនួនជាង៥ម៉ឺនរៀលសុទ្ធតែលុយរាយ ។ ស្ត្រីចោរនោះបានបង្ខំឲ្យនាងរាប់ច្រើនលើកច្រើនសារ បើទោះជានាងរាប់គ្រប់ចំនួនហើយក្ដី ។
ត្រង់ចំណុចនេះជនរងគ្រោះបានពន្យល់ថា តាមពិតស្ត្រីចោរនោះបង្គាប់ឲ្យនាងរាប់លុយម្ដងហើយម្ដងទៀត ដើម្បីផ្ដល់ឪកាសឲ្យជនម្នាក់ (ប្រុស និង ជាបក្ខពួក) បន្លំដើរចូលពីចំហៀងផ្ទះ ទៅលួចលុយនៅក្នុងបន្ទប់វេលុយក្នុងផ្ទះនាង ដែលនាងទុកក្នុងកិតុ ។
នាងបានបញ្ជាក់ថា នាងបានដឹងបាត់លុយ នៅពេលនាងយកលុយទៅទុក ព្រោះឃើញលុយធ្លាក់រប៉ាត់រប៉ាយ ។ ពេលដឹងភ្លាម នាងក៏ប្រញាប់ប្រញល់ឆែកមើលកាម៉េរាសុវត្ថិភាព ស្រាប់តែឃើញបុរសម្នាក់ដើរចូលទៅប្រមូលយកលុយនៅក្នុងបន្ទប់វេលុយ ខណៈពេលនាងកំពុងឈររាប់លុយជាមួយស្ត្រីម្នាក់នៅលើថ្នល់ខាងមុខផ្ទះ ទើបមានការភ្ញាក់ផ្អើល តែហួសពេលទៅហើយ ព្រោះស្ត្រីនោះក៏ជិះម៉ូតូទៅបាត់ រីឯជនដៃដល់ចូលលួចលុយក៏បាត់ដែរ ។
នៅក្នុងហេតុការណ៍នេះ ហាក់មិនធ្វើឲ្យកម្លាំងសមត្ថកិច្ចចាប់អារម្មណ៍ប៉ុន្មានទេ ។ សូម្បីមន្ត្រីបុស្ដិ៍រដ្ឋបាល ព្រែកព្រះស្ដេច ដែលស្ថិតនៅខាងត្បូងនោះចម្ងាយប្រមាណ២០០ម៉ែត្រសោះ ក៏គេមិនឃើញចេញអើពើក្នុងរឿងនេះដែរ ។ ដោយឡែកបើក្រឡេកមើលនៅកន្លែងផ្ទះកើតហេតុវិញ នៅម៉ោងប្រហែលជិត១០ព្រឹក គេឃើញមានតែវត្តមានមន្ត្រីនគរបាលក្រុងពីររូបប៉ុណ្ណោះ គឺលោកនាយផ្នែកយុត្ដិធម៌ និងលោកអធិការរងក្រុងជំនួយការការងារព្រហ្មទណ្ឌ ដែលបានចុះទៅសួរនាំជនរងគ្រោះ និងពិនិត្យរូបភាពនៅក្នុងកាម៉េរាសុវត្ថិភាព ។ ប៉ុន្តែបើនិយាយពីកម្លាំងការិយាល័យជំនាញនៃស្នងការខេត្តវិញ សូម្បីតែម្នាក់ក៏ពុំមានមុខនៅកន្លែងកើតហេតុដែរ ។
នៅវេលាម៉ោង១១ថ្ងៃត្រង់ នៃថ្ងៃកើតហេតុ លោក លឹម ពុទ្ធីឡា ស្នងការរងទទួលផែនព្រហ្មទណ្ឌ បានបញ្ជាក់ប្រាប់កោះសន្តិភាពថា ករណីចោរបន្លំចូលលួចលុយកន្លែងវេលុយ«ទ្រូម៉ានី»ខាងលើនេះ គឺលោកទើបទទួលព័ត៌មានមុននេះបន្តិចប៉ុណ្ណោះ (មុនម៉ោង១១ថ្ងៃត្រង់)។ លោកស្នងការរងបានបញ្ជាក់ដូច្នេះថា «រឿងនេះគេមិនរាយការណ៍គេព្យាយាមបិតរឿងនេះ ។ ប៉ុន្តែពេលនេះ ជនរងគ្រោះបានទៅដាក់ពាក្យបណ្ដឹងនៅអធិការក្រុងហើយ» ។
ពាក់ព័ន្ធនឹងភាពអសកម្មរបស់កម្លាំងសមត្ថកិច្ចនេះបានធ្វើឲ្យមហាជន ក៏ដូចមន្ត្រីនានាដែរ បានរិះគន់យ៉ាងខ្លាំងទៅលើកម្លាំងសមត្ថកិច្ច ដោយបានលើកឡើងថា ថ្នាក់ដឹកនាំបានខំប្រឹងប្រែង តែងតាំងលោកអធិការរងទទួលផែនផងជំនួយការដឹកនាំការងារជំនាញផងច្រើននាក់ណាស់ តែការងារវិញសារ៉ូ គ្មានបានការទេ ។ ហើយបើនិយាយពីលោកស្នងការរងទទួលផែន និង លោកស្នងការរងជំនួយការដឹកនាំការងារជំនាញវិញក៏មិនខុសគ្នាដែរ គឺច្រើនតែចំនួនមនុស្ស ធំតែស័ក្ដិ តែពេលមានរឿងកើតឡើង គេមិនដែលឃើញលោកស្នងការរងពាក់ព័ន្ធទាំងនោះចេញមុខនៅកន្លែងកើតហេតុ សូម្បីតែដឹងរឿងក៏ទេដែរ ។ ដូចជាករណីចោរលួចលុយកន្លែង«ទ្រូម៉ានី»ខាងលើនេះជាដើម ។
បើតាមមន្ត្រីបានឲ្យដឹងថា នៅក្នុងអង្គភាពអធិការក្រុងបាត់ដំបង ថ្នាក់ដឹកនាំបានតែងតាំងអធិការរងចំនួន០៤រូប ទទួលកិច្ចការងារព្រហ្មទណ្ឌក្នុងនោះមានលោកអធិការរងមួយរូបទទួលផែន និងលោកអធិការរងចំនួន០៣រូបទៀត ជាជំនួយការការងារព្រហ្មទណ្ឌ ។
ដោយឡែក នៅក្នុងស្នងការខេត្តវិញ ក៏មិនខុសគ្នាដែរ គឺមានលោកស្នងការរងមួយរូបទទួលផែនព្រហ្មទណ្ឌ រីឯលោកស្នងការរងចំនួន០៣រូបទៀត ជាជំនួយការដឹកនាំការងារព្រហ្មទណ្ឌ ។ ប៉ុន្តែបើពិនិត្យទៅលើសកម្មភាពជាក់ស្ដែង ទៅលើការងារព្រហ្មទណ្ឌរបស់ក្រុមលោកអធិកររង និងក្រុមលោកស្នងការរងដែលធ្វើការងារព្រហ្មទណ្ឌកន្លងមកនេះហាក់មិនសូវចេញមុខ ឬគ្មានសកម្មភាពសោះតែម្ដង រហូតមានមហាជន និងមន្ត្រីខ្លះរិះគន់ចំៗថា «ចង់ឡើងធ្វើធំ តែខ្លួនគ្មានជំនាញ ចឹងហើយទើបនៅពេលមានរឿងព្រហ្មទណ្ឌកើតឡើងម្ដងៗ គេមិនសូវឃើញមុខលោកអធិការរង និងស្នងការរងៗទាំងនោះមានមុខនៅកន្លែងកើតហេតុ» ។
យើងងាកមកនិយាយពីសកម្មភាពក្រុមចោរញីឈ្មោល ដែលធ្វើសកម្មភាពចូលលួចលុយនៅកន្លែងវេលុយ«ទ្រូម៉ានី»ខាងលើនេះវិញ ។ នៅក្នុងកាម៉េរាសុវត្ថិភាព ដែលម្ចាស់ផ្ទះបានបំពាក់ខាងមុខផ្ទះ គេឃើញមានស្ត្រីម្នាក់ស្លៀកពាក់ខោអាវពណ៌ស ពាក់មួកនិងពាក់ម៉ាស់មុខផង បានចូលទិញទំនិញ និង ដើរចេញក្រៅឡើងជិះម៉ូតូ ហើយមានម្ចាស់ផ្ទះឈររាប់លុយនៅក្បែរផង ។ គ្រានោះគេឃើញបុរសម្នាក់បានបន្លំដើរចូលផ្ទះជនរងគ្រោះពីចំហៀង ខណៈដែលស្ត្រីរងគ្រោះកំពុងឈរនិយាយគ្នាជាមួយស្ត្រីបក្ខពួកចោរអង្គុយលើម៉ូតូ ។ ពេលចូលដល់ក្នុងបន្ទប់ទ្រូម៉ានី គេឃើញជនសង្ស័យបានទាញកិតុ ប្រមូលយកលុយច្រកថង់ ដែលជនដៃដល់ដាក់តាមជាស្រេច ។ ជននេះពាក់មួយកន្តិប និងពាក់ម៉ាស់មុខដូចស្ត្រីម្នាក់នោះដែរ ។
ជននេះបានច្បាមប្រមូលយកលុយអស់គ្មានសល់ពីក្នុងថតតុ រួចបានព្យាយាមចាកចេញយ៉ាងលឿនពីក្នងផ្ទះជនរងគ្រោះឆ្ពោះទៅទិសខាងត្បូង ខណៈស្ត្រីម្នាក់ជាបក្ខពួកក៏បានជិះម៉ូតូយ៉ាងលឿនដែរឆ្ពោះទៅខាងជើង ។ តុល្យការនៃការបាត់បង់ បើតាមជនរងគ្រោះ គឺនាង ប៉េង ចាន់នី បានប្រាប់សមត្ថកិច្ចថា លុយដែលត្រូវក្រុមចោរលួចយកទៅនោះ គឺមានប្រាក់ខ្មែរចំនួន៦លានរៀល, ប្រាក់ថៃចំនួន៦ម៉ឺនបាត និងប្រាក់ដុល្លាអាមេរិកចំនួន៣ពាន់ដុល្លា ។
បើគិតជាប្រាក់ដុល្លារសុទ្ធអស់ជាង៦ពាន់ដុល្លារ ។ ពិតមែនតែភិនភាគជនសង្ស័យ និងសកម្មភាពរបស់ក្រុមចោរញីឈ្មោលទាំងពីរនាក់នេះ មានជាប់នៅក្នុងកាម៉េរាសុវត្ថិភាពយ៉ាងច្បាស់ក្រឡែតក្ដី ។ ប៉ុន្តែបើតាម លោក លឹម ពុទ្ធីឡា ស្នងការរងទទួលផែនព្រហ្មទណ្ឌហាក់មិនរំពឹងថា អាចកំណត់បាននូវមុខសញ្ញានេះបានទេនៅពេលនេះ ។ លោកស្នងការរងរូបនេះ គ្រាន់តែប្រាប់ថា ពេលនេះយើងមិនទាន់កំណត់មុខសញ្ញាបានទេ ព្រោះមន្ត្រីជំនាញទើបចុះទៅសួរនាំជនរងគ្រោះ ៕
ចែករំលែកព័តមាននេះ