ADផ្ទាំងផ្សព្វផ្សាយពាណិជ្ជកម្ម

Picture

ពលរដ្ឋ​១​គ្រួសារ ឃើញ​គេ​រែង​ត្បូង​ក្នុង​ស្ទឹង​ប​យ៉ា​ខា ក៏​ចុះ​រែង​ផ្សងព្រេង​នឹង​គេ​ដែរ ក្រែងលោ​បាន​រ៉ែ​ត្បូង​យក​ទៅ​លក់

2 ខែ មុន

ខេត្ត​ប៉ៃលិន ៖ រហូត​មក​ដល់​ព្រឹក​ថ្ងៃ​ទី​១៨ ខែមីនា ឆ្នាំ​២០២៤​នេះ គេ​សង្កេត​ឃើញ​ប្រជាពលរដ្ឋ​១​គ្រួសារ បាន​នាំ​ប្តី​ប្រពន្ធ ចុះ​ទៅ​ក្នុង​ស្ទឹង​ប​យ៉ា​ខា ដោយ​នាំ​យក​មក​នូវ​កញ្ច្រែង ដែក​ស្បែង…

ខេត្ត​ប៉ៃលិន ៖ រហូត​មក​ដល់​ព្រឹក​ថ្ងៃ​ទី​១៨ ខែមីនា ឆ្នាំ​២០២៤​នេះ គេ​សង្កេត​ឃើញ​ប្រជាពលរដ្ឋ​១​គ្រួសារ បាន​នាំ​ប្តី​ប្រពន្ធ ចុះ​ទៅ​ក្នុង​ស្ទឹង​ប​យ៉ា​ខា ដោយ​នាំ​យក​មក​នូវ​កញ្ច្រែង ដែក​ស្បែង បាយ​កញ្ចប់ ទៅ​ជីក​គាស់កកាយ ប៉ើង​ដុំ​ថ្ម​ធំ​ៗ​ចេញ រួច​ចូ​កម្ទេច​ថ្ម​ក្នុង​បាត​ស្ទឹង ដើម្បី​រែង​ផ្សងសំណាង រក​រ៉ែ​ត្បូង​ដ៏​មាន​តម្លៃ ខណៈ​ដែល​ពួក​គាត់​បាន​សង្កេត​ឃើញ​មនុស្ស​ក្មេង​ចាស់​មួយ​ចំនួន បាន​នាំ​គ្នា​ចុះ​ទៅ​រែង​រក​កម្ទេច​រ៉ែ​ត្បូង​គួរ​ឱ្យ​ចាប់អារម្មណ៍ ហើយ​មើលទៅ​ទំនង ខណៈ​ដែល​អ្នកខ្លះ ក៏​បាន​ត្បូង​តូច ខ្លះ​បាន​ធំ ។

បើ​តាម​ការ​រៀបរាប់​ពី​បុរស​ម្នាក់​ឈ្មោះ ហេង ងួ​ន អាយុ​៥២​ឆ្នាំ និង​ប្រពន្ធ ឈ្មោះ ហូ​យ វី អាយុ​៤៨​ឆ្នាំ រស់នៅ​ក្នុង​ភូមិប​តាំង​ស៊ូ សង្កាត់​ប​យ៉ា​ខា ក្រុងប៉ៃលិន ខេត្ត​ប៉ៃលិន បានឱ្យ​ភ្នាក់ងារ​យើង​ដឹង​ថា ៖ នេះ​ជា​លើក​ទី​១​ហើយ ដែល​ប្តី​ប្រពន្ធ​គាត់ បាន​នាំ​គ្នា​យក​សម្ភារៈ រែង​ត្បូង​ជា​លក្ខណៈ​គ្រួសារ ដូច​ជា​កញ្ច្រែង ដែក​ស្បែង នាំ​គ្នា​ចុះ​ទៅ​ក្នុង​ស្ទឹង​ប៉ើង​ដុំ​ថ្ម​ធំ​ៗ ដែល​អាច​លើក​រួច ចេញពី​បាត​ស្ទឹង ដើម្បី​យក​កញ្ច្រែង​រែង​រក​រ៉ែ​ត្បូង​ដី​មាន​តម្លៃ ព្រោះ​សង្កេត​ឃើញ​បុរស​ស្ត្រី​វ័យ​ចំណាស់​មួយ​ចំនួន និង​ក្មេង​ៗ បាន​ខិតខំ​ខ្នះខ្នែង​ចុះ​ទៅ​ក្នុង​ស្ទឹង​រែង​រក​រ៉ែ​ត្បូង ដោយ​មើលទៅ​ទំនង​ណាស់ ទើប​គាត់​សាកល្បង​មើល​ក្រែង លោក​ប៉ះ​ចំ​កំទេច​រ៉ែ​ត្បូង មាន​តម្លៃ​អាច​យក​ទៅ​លក់ បាន​ថវិកា​សម្រាប់​ផ្គត់ផ្គង់​ជីវភាព​ប្រចាំ​ថ្ងៃ ។

លោក ហេង ងួ​ន បន្ត​បន្ថែម​ទៀត​ថា កាលពីមុន​យូរហើយ គ្រួសារ​លោក​ធ្លាប់​ជា​ជើង​ចាស់ ក្នុង​ការ​រែង​រក​រ៉ែ​ត្បូង ក្នុង​ស្ទឹង​ប​យ៉ា​ខា​នេះ​ដែរ​។ ប៉ុន្តែ​ក្រោយមក ដោយសារ​តែ​រវល់​ក្នុង​ការ​ធ្វើ​ចំការ ដាំពោត​ក្រហម និង​ដំឡូង​មី ក៏​បោះបង់​ចោល ដោយ​ទុក​កញ្ច្រែង និង​សម្ភារ​ផ្សេង​ៗ នៅ​ក្នុងផ្ទះ​។ ប៉ុន្តែ ក្រោយ​ពេល​ឃើញ​មនុស្ស ក្មេង​ចាស់​ចុះ​ទៅ​ក្នុង​ស្ទឹង​ព្រោងព្រាត គួរ​ឱ្យ​ចង់​រែង​រក​រ៉ែ​ត្បូង​ដែរ ក៏​នាំ​ប្រពន្ធ​វេច​ខ្ចប់​បាយ​ម្ហូប អាហារ​ចុះ​ទៅ​រែង​ត្បូង តាំងពី​ព្រឹក​រហូត​ដល់​ថ្ងៃត្រង់ ទើប​នាំ​គ្នា​ឈប់​សម្រាក​ទទួលទាន​អាហារ​ថ្ងៃត្រង់​រួច ដល់​ពេល​រសៀល​បន្តិច នាំ​គ្នា​ចុះ​រែង​បន្ត​ទៀត ក្រែង​ទទួល​បាន​កម្ទេច​រ៉ែ​ត្បូង​លក់​ឱ្យ​កុងសែ​បាន​ថវិកា​នឹង​គេ ។

លោក​បញ្ជាក់​ទៀត​ថា ក្រោយ​ពី​រែង តាំងពី​ព្រឹក​រហូត​ដល់​រសៀល​នេះ ប៉ះ​ចំ​កំទេច​ត្បូង​ទទឹម និង​ត្បូង​កណ្តៀង​ខ្លះ​ៗ​ដែរ តែ​លោក​មិន​លក់​នោះ​ទេ ពោល​គឺ​ទុក​យក​ទៅ​ឱ្យ​ជាង​កែ​ច្នៃ ធ្វើ​ជា​ត្បូង​ដាក់​ដាំ​លើ​ច​ញ្ចៀ​ន​ពាក់​ទុកជា​អនុស្សាវរីយ៍​។ តែបើ​បាន​ច្រើន​បន្ថែម​ទៀត ហើយ​ត្បូង​មានទឹក​ល្អ គាត់​នឹង​លក់​យក​ថវិកា​សម្រាប់​ទិញ​ម្ហូបអាហារ​ផង​ដែរ ។

ចំណែក​ប្រជាពលរដ្ឋ ដែល​ចុះ​រែង​ត្បូង​នៅ​ក្បែរ​ប្តី​ប្រពន្ធ​១​គូ​នេះ ក៏​បាន​លើក​ឡើង​ដែរ​ថា ការ​រែង​រក​រ៉ែ​ត្បូង ពិតជា​មានការ​តស៊ូ និង​អត់ធ្មត់​បំផុត បើ​យើង​មានសំណាង​អាច​រែង​ត្រឹម​១ ទៅ​២​កញ្ច្រែង ក៏​ប្រទះ​រ៉ែ​ត្បូង​ដ៏​មាន​តម្លៃ​។ តែបើ​មិន​ទាន់​ជួប​សំណាង ក៏​ត្រូវ​នាំ​គ្នា​ចុះ​ទៅ​ក្នុង​ស្ទឹង​រែង​ហើយ​រែង​ទៀត ពី​មួយ​ថ្ងៃ ទៅ​មួយ​ថ្ងៃ ដោយ​ថ្ងៃ​ខ្លះ ក៏​អត់​បាន​សូ​ម្បី​តែ​បន្តិចបន្តួច​ដែរ​។ លើស​ពី​នេះ ការ​ចាប់​យកមុខ​របរ​រែង​ត្បូង ពិតប្រាកដ គឺ​ត្រូវ​តែ​រែង​បណ្តើរ​បន់ស្រន់​បណ្តើរ នឹង​ត្រូវ​សង្ឃឹមថា បើ​មួយ​កញ្ច្រែង​នេះ​អត់​បាន មួយ​កញ្ច្រែង​ក្រោយ​ទៀត​នឹង​បាន ហើយ​មិន​ត្រូវ​អស់សង្ឃឹម​ន​ឡើយ ៕

អត្ថបទសរសេរ ដោយ