ខេត្តបាត់ដំបង ៖ អ្នកបើកត្រាក់ទ័រភ្ជួរដីចម្ការម្នាក់រងរបួសដាច់ជើងម្ខាង ពេលបើកត្រាក់ទ័រភ្ជួរដីចម្ការកិនចំគ្រាប់មីនតោន កាលពីវេលាម៉ោង១២ និង៤០នាទីថ្ងៃត្រង់ថ្ងៃទី១៩ ធ្នូ នៅចំណុចភូមិអន្លង់ស្ដី ឃុំបួរ ស្រុកភ្នំព្រឹក…
ខេត្តបាត់ដំបង ៖ អ្នកបើកត្រាក់ទ័រភ្ជួរដីចម្ការម្នាក់រងរបួសដាច់ជើងម្ខាង ពេលបើកត្រាក់ទ័រភ្ជួរដីចម្ការកិនចំគ្រាប់មីនតោន កាលពីវេលាម៉ោង១២ និង៤០នាទីថ្ងៃត្រង់ថ្ងៃទី១៩ ធ្នូ នៅចំណុចភូមិអន្លង់ស្ដី ឃុំបួរ ស្រុកភ្នំព្រឹក ដែលគេអះអាងថា ជាគ្រាប់កប់ក្នុងដីសេសសល់ពីសម័យសង្គ្រាម ។
អភិបាលស្រុកភ្នំព្រឹក លោកសុង សុភ័ក្រ បានបង្ហោះតាមបណ្ដាញសង្គមរបស់លោកថា ជនរងគ្រោះឈ្មោះ ប៉ុន សំហឿន ភេទប្រុស អាយុ៣៣ឆ្នាំ ជាអ្នកបើត្រាក់ទីរភ្ជួរដីចម្ការនោះ ។ លោកអភិបាលស្រុកបានបញ្ជាក់ថា អ្នកបើកត្រាក់ទ័រនោះ បានបើកភ្ជួរដីចម្ការដែលធ្លាប់អាស្រ័យផលកន្លងមក ។ ប៉ុន្តែអកុសលឆ្នាំនេះ ស្រាប់តែជាន់លើគ្រាប់មីនតោន ដែលជាកាកសំណល់សង្គ្រាមបណ្ដាលឲ្យផ្ទុះលាន់កក្រើក ។
ជនរងគ្រោះរបួសដាច់ជើងស្ដាំត្រឹមភ្លៅ ហើយនិងដាច់ម្រាមដៃស្ដាំអស់គ្មានសល់ទៀត ខណ:ត្រាក់ទ័រខូចខាតគ្មានសល់។ បើតាមអ្នកភូមិបាននិយាយថា ដីចម្ការធ្លាប់ភ្ជួរដាំដុះស្ទើររាល់ឆ្នាំមិនធ្លាប់ប៉ះចំគ្រាប់អ្វីទេ តែពេលចុះភ្ជួរឆ្នាំនេះ ក៏ប៉ះចំគ្រាប់មីនតោនតែម្ដង ដែលជាប្រភេទគ្រាប់ធុនធ្ងន់ប្រឆាំងរថក្រោះ។
មន្ត្រីដែលចាំទៅពិនិត្យរណ្ដៅគ្រាប់មីនបានវាយតំលៃថា បើពិនិត្យលើរណ្ដៅគ្រាប់ដែលផ្ទុះហាក់មានជម្រៅជ្រៅគួរសម។ ប៉ុន្តែពេលចុះភ្ជួររាល់ឆ្នាំធ្វើឲ្យដីកាន់តែស្ដើង ទើបចុះភ្ជួរឆ្នាំនេះកិនចំធ្វើឲ្យផ្ទុះគ្រោះថ្នាក់តែម្ដង។
មន្ត្រីមូលដ្ឋានបានរំលឹកពីប្រវត្តិភូមិសាស្ត្រនោះថា ធ្លាប់ជាទីតាំងសមរភូមិក្ដៅក្នុងទសវត្សរ៍ឆ្នាំ១៩៨០ ហើយក៏ជាចំណុចផ្លូវរថក្រោះដែរ ដូច្នេះហើយទើបមានគ្រាប់មីនប្រឆាំងរថគ្រោះមាននៅសេសសល់ក្នុងដី ។
យ៉ាងណា បងប្អូនប្រជាពលរដ្ឋនៅតំបន់នោះគួរតែមានការប្រុងប្រយ័ត្ន ចំពោះតំបន់ណាដែលសង្ស័យថា អាចនៅមានគ្រាប់យុទ្ធភ័ណ្ឌមិនទាន់ផ្ទុះមានសេសសលកប់ក្នុងដី ៕
ចែករំលែកព័តមាននេះ