ញាក់សាច់នឹងសារនយោបាយចាក់ដោតរបស់លោកពូទីនក្រោយពេលដឹងថាលោកទើបតែឈ្នះឆ្នោតថ្មីៗជាមួយនឹងសំឡេងគាំទ្រភាគច្រើនលើសលប់រហូតដល់ជាង៨៧%។ មិនរង់ចាំយូរទេ លោកនិយាយព្រមានផង និងក្រើនរំលឹកផងជាលក្ខណៈជន្លឆ្វេងវាយស្ដាំនៅលើទីលាននយោបាយ ការទូត និងយោធា។ លោកថាបើណាតូ និងរុស្ស៊ីប៉ះទង្គិចគ្នានៅថ្ងៃណាមួយ ពេលនោះនៅសល់តែមួយជំហានទៀតនឹងផ្ទុះសង្គ្រាមលោកលើកទីបី។ លោកបង្កប់ពាក្យគន្លឹះសំខាន់២នៅក្នុងបញ្ហានេះ ទី១-លោកមិនប្រើពាក្យបើសិនណាតូបញ្ជូនទ័ពទេ ព្រោះទាហានណាតូកំពុងស្ថិតនៅលើទឹកដីអ៊ុយក្រែនជាបណ្ដើរៗហើយ។ គ្រាន់តែថាគេមិនប្រកាសជាផ្លូវការតែប៉ុណ្ណោះ។ ទី២-លោកមិនប្រើពាក្យថាសង្គ្រាមលោកលើកទី៣នឹងផ្ទុះឡើង១០០%ដូចអ្នកនាំពាក្យវិមានក្រឹមឡាំងធ្លាប់ព្រមានទេ។ ប៉ុន្តែលោកប្រើពាក្យថានៅសល់មួយជំហានទៀតនឹងផ្ទុះ។
ទីក្រុងម៉ូស្គូ៖ លោកពូទីនមានសារនយោបាយមុតស្រួចមួយចំនួនផ្ដាំទៅបស្ចិមប្រទេសបន្ទាប់ពីលោកដឹងច្បាស់ថាតំណែងប្រធានាធិបតីនៅអាណត្តិថ្មីនៅតែស្ថិតនៅក្នុងដៃរបស់លោកដដែល។ មានចំណុចមួយ លោកនិយាយពាក់ព័ន្ធនឹងសង្គ្រាមលោកលើកទីបី។ លោកថាបើទៅថ្ងៃមុខ កងទ័ពរុស្ស៊ី និងអង្គការណាតូប៉ះទង្គិចគ្នាដោយផ្ទាល់ ពេលនោះខ្វះតែមួយជំហានទៀតនឹងផ្ទុះសង្គ្រាមលោកលើកទីបីហើយ។ ប៉ុន្តែនៅក្នុងលោកនេះគ្មាននរណាចង់ឃើញសេណារីយោនេះកើតឡើងទេ។
ប្រសាសន៍របស់លោកពូទីនធ្វើឡើងបន្ទាប់ពីស្ថានភាពសង្គ្រាមនៅអ៊ុយក្រែនត្រូវគេសម្លឹងឃើញថាឈានដល់ដំណាក់កាលតានតឹងរវាងរុស្ស៊ី និងលោកខាងលិចខ្លាំងជាងពេលណាៗទាំងអស់ចាប់តាំងពីវិបត្តិមីស៊ីលនៅគុយបា (Cuban Missile Crisis) កាលពីឆ្នាំ១៩៦២។ កាលនោះ លោកកេណ្ណឺឌីប្រុងប្រើទ័ពជាង៦សែននាក់វាយចូលគុយបា ខណៈដែលសូវៀតដាក់កងទ័ពជាង៥ម៉ឺននាក់នៅគុយបា។
កាលនោះ បើទ័ពអាមេរិកវាយចូលគុយបា គេមិនត្រឹមតែវាយគុយបាទេ គឺអាចនឹងមានផែនការវាយចូលទីក្រុងម៉ូស្គូទៀត។ នៅក្នុងទ្រឹស្ដីសង្គ្រាម គេមិនអាចវាយពាក់កណ្ដាលទី ហើយទុកចោលពាក់កណ្ដាលទីឱ្យទីទើរៗទេ។ បើវាយឈ្នះត្រូវតែឈ្នះឱ្យដាច់។ បើឈ្នះមិនដាច់ទេ ប្រយ័ត្នតែគេវាយបកវិញដាច់ផ្ងារដូចករណីអ៊ីទ្លែវាយសហភាពសូវៀតកាលពីសង្គ្រាមលោកលើកទី២។ ដូច្នេះ ភាគីទាំង២អាមេរិក និងសូវៀតនឹងលេងគ្នាមួយអស់ដៃ។ អស់ប៉ុន្មានក៏អស់ទៅដើម្បីការរស់រានមានជីវិតនៃជាតិរបស់ខ្លួន។
ឥឡូវនេះ ករណីប៉ះគ្នារវាងណាតូ និងរុស្ស៊ីនៅលើទឹកដីអ៊ុយក្រែនឬយ៉ាងណានៅមិនដឹងនៅឡើយទេ។ ប៉ុន្តែនៅពេលលោកម៉ាក្រុង ប្រធានាធិបតីបារាំង បញ្ជាក់ជំហររបស់លោកម្ដងជាពីរដងថាលោកមិនបោះបង់ចោលជាដាច់ខាតគម្រោងបញ្ជូនទ័ពទៅអ៊ុយក្រែន លទ្ធភាពនៃការប៉ះទង្គិចគ្នារវាងសមាជិកណាតូ និងរុស្ស៊ីកាន់តែមានភាគរយខ្ពស់មែនទែន។
ឧបមាថានៅក្នុងសេណារីយោនេះ បើទុកជាអាមេរិក ឬណាតូដាក់ទ័ពនៅអ៊ុយក្រែនក៏អត់មានទាស់ខុសអីដែរ ព្រោះសូវៀតក៏ធ្លាប់ដំឡើងជើងទម្របាញ់នុយក្លេអ៊ែរនៅគុយបា និងដាក់ទ័ពរាប់ម៉ឺននាក់នៅទីនោះដែរកាលពីអតីតកាល។ ម៉្យាងទៀត គេគិតថាទោះបីរុស្ស៊ីអាចនឹងកំពុងតែមានប្រៀបនៅក្នុងសង្គ្រាមអ៊ុយក្រែន ប៉ុន្តែលោកខាងលិចមិនអាចបណ្ដោយឱ្យរុស្ស៊ីឈ្នះសង្គ្រាមជាដាច់ខាត។ លោកពូទីនក៏ដឹងត្រង់ចំណុចនេះដែរ។ អីចឹងហើយបានជាលោកបោះដៃទៅរកការចរចាគ្នា។
អ្នកសារព័ត៌មានបានសាកសួរលោកពូទីនដោយផ្ទាល់ដើម្បីចង់ដឹងប្រតិកម្មរបស់លោកចំពោះការលើកឡើងរបស់លោកម៉ាក្រុងដែលចង់បញ្ជូនទ័ព និងលទ្ធភាពនៃការផ្ទុះសង្គ្រាមរុស្ស៊ី និងណាតូ។ លោកពូទីនឆ្លើយតបថាអ្វីៗសុទ្ធតែអាចកើតមាននៅក្នុងពិភពលោកសម័យទំនើបនេះ។ គ្រប់គ្នាដឹងច្បាស់ណាស់ថាបើដូច្នេះមែន (រុស្ស៊ី និងណាតូប៉ះគ្នា) នៅសល់តែមួយជំហានទៀតនឹងផ្ទុះសង្គ្រាមលោកលើកទីបី។ ខ្ញុំគិតថាប្រហែលជាគ្មាននរណាម្នាក់ចង់ឃើញព្រឹត្តិការណ៍នេះកើតឡើងទេ។
លោកពូទីនបញ្ជាក់ថាអ្នកខាងក្រៅអាចនឹងមិនដឹងអាថ៌កំបាំងនេះទេ។ ប៉ុន្តែលោកប្រាប់ឱ្យដឹងទៅចុះ។ ទាហានណាតូកំពុងមានវត្តមានរួចជាស្រេចនៅលើទឹកដីអ៊ុយក្រែន។ រុស្ស៊ីចាប់បានសំឡេងទាហានទាំងនោះនិយាយគ្នាជាភាសាអង់គ្លេស និងភាសាបារាំងនៅលើសមរភូមិ។ លោកថាពួកគេទៅទីនោះគ្មានអនាគតល្អទេ។ ទុកជាក្នុងបុព្វហេតុអ្វីក៏ដោយ ពួកគេបានត្រឹមតែស្លាប់គរជើងគ្នាទាំងអសារឥតការតែប៉ុណ្ណោះ៕
ប្រភព៖ Reuters និងប្រភពដទៃទៀត
https://www.reuters.com/world/europe/putin-warns-west-russia-nato-conflict-is-just-one-step-ww3-2024-03-17/
ចែករំលែកព័តមាននេះ