ADផ្ទាំងផ្សព្វផ្សាយពាណិជ្ជកម្ម

ប្រតិបត្តិការក្តៅ ចាប់ខ្លួនមេខ្លោងកា.ប់រានយកដីព្រៃចំនួន១០នាក់

2 អាទិត្យ មុន

ស្ទឹងត្រែង
២៩ ខែ មេសា ឆ្នាំ ២០២៤ ម៉ោង ១៤:៤០

ខេត្តស្ទឹងត្រែង ៖ មេខ្លោងកាប់រានដីព្រៃ និងបោកបញ្ឆោតគៀងគរប្រជាពលរដ្ឋធ្លាក់ចូលក្នុងបទល្មើសចំនួន១០នាក់ត្រូវបានចាប់ខ្លួនបន្តបន្ទាប់ ដើម្បីកសាងសំណុំរឿងបញ្ជូនទៅតុលាការ និងបន្តឃុំខ្លួនក្នុងពន្ធនាគារ និងមួយចំនួនទៀតដែលពាក់ព័ន្ធកំពុងតាមចាប់ខ្លួនបន្ថែមក្នុងប្រតិបត្តិការដ៏ក្តៅគគុកពាក់ព័ន្ធករណីកាប់រៀនព្រៃទន្ទ្រានយកដីរដ្ឋ។ ប្រភពព័ត៌មានឲ្យដឹងថា ក្រោយមានសកម្មភាពកាប់រានព្រៃទន្ទ្រានយកដីក្នុងតំបន់ការពារនិងអភិរក្សរាប់ពាន់ហិចតា ។…

ប្រភពព័ត៌មានឲ្យដឹងថា ក្រោយមានសកម្មភាពកាប់រានព្រៃទន្ទ្រានយកដីក្នុងតំបន់ការពារនិងអភិរក្សរាប់ពាន់ហិចតា ។ ក្រុមការងារថ្នាក់ជាតិដឹកនាំដោយឯកឧត្តមបណ្ឌិត ប៉ាន់ ខែម ប៊ុនថន នាយករងខុទ្ទកាល័យ និងជាប្រធានទី២ នៃក្រុមអន្តរាគមន៍ពិសេស របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា សហការជាមួយអាជ្ញាធរខេត្តនិងមន្ទីរពាក់ព័ន្ធចុះពិនិត្យនិងបង្ក្រាបទប់ស្កាត់ការកាប់រៀនដីព្រៃនិងដកហូតមកវិញបានដោយជោគជ័យនិងសេសសល់មួយចំនួនតូចទៀតកំពុងបន្តអនុវត្តតាមគោលការណ៍។

ទាក់ទិនករណីខាងលើ ក្រុមការងារបានកំណត់មុខសញ្ញានិងចាប់ខ្លួនមេខ្លោងកាប់រៀនដីព្រៃបានចំនួន១០នាក់ កសាងសំណុំរឿងបញ្ជូនទៅពន្ធនាគារ ដោយគ្មានការលើកលែង។ មេខ្លោងដែលពាក់ព័ន្ធក្នុងករណីកាប់ទន្ទ្រានដីព្រៃរបស់រដ្ឋហើយបោកបញ្ឆោតគៀងគរប្រជាពលរដ្ឋ រាប់១០០គ្រួសារដែលមិនយល់ពីផ្លូវច្បាប់ លក់ក្នុងតម្លៃថោកដោយពួកគេអះអាងប្រាប់ទៅប្រជាពលរដ្ឋថា ដីទាំងនោះ មានឯកសារមិនពាក់ព័ន្ធល្មើសច្បាប់នោះទេ។ទីតាំងចំណុចដែលក្តៅគគុកស្ថិតក្នុងតំបន់ការពារនិងអភិរក្សមានដូចជាអូរវល្លិ ប្រាំដំឡឹង ស្ថិតក្នុងស្រុកបុរីអូស្វាយសែនជ័យនិងក្រឡាពស់ស្ថិតក្នុងស្រុកសេសាន។

ក្រោយការចាប់មេខ្លោងជាបន្ត បន្ទាប់និងកសាងបញ្ជូនសំណុំរឿងទៅតុលាការនិងបញ្ជូនទៅឃុំខ្លួនក្នុងពន្ធនាគាររួចមកក្រុមការងាររួមទាំងថ្នាក់ខេត្តនិងមន្ទីរពាក់ព័ន្ធបានសម្រប សម្រួលនិងពន្យល់ណែនាំដល់ប្រជាពលរដ្ឋដែលចាញ់បោកមេខ្យល់ទាំងនោះឲ្យយល់ពីផ្លូវច្បាប់ ប្រជាពលរដ្ឋក៏បានសម្រេចចិត្តរុះរើនិងវិលត្រឡប់ទៅស្រុកកំណើតវិញដោយពុំមានបាតុភាពអ្វីកើតឡើងនោះឡើយ។

ចំណែកផ្ទៃដីដែលបានដកហូតមកវិញនោះ គឺប្រគល់ទៅឲ្យមន្ទីរជំនាញពាក់ព័ន្ធជាអ្នកគ្រប់គ្រងវិញ។ហើយករណីបង្ក្រាបនេះផងដែរក្រុមការងារថ្នាក់ជាតិរួមទាំងថ្នាក់ខេត្តមូលដ្ឋាននិងមន្ទីរអង្គភាពពាក់ព័ន្ធនៅតែបន្តបង្ក្រាបដោយគ្មានការលើកលែងនិងឃាត់ខ្លួនអ្នកពាក់ព័ន្ធបើសិនជាមានការកាប់ទន្ទ្រានដីព្រៃខុសច្បាប់បន្តទៀត។

ឯកឧត្តមបណ្ឌិត ប៉ាន់ ខែម ប៊ុនថន នាយករងខុទ្ទកាល័យ និងជាប្រធានទី២ក្រុមការងារពិសេសលើកិច្ចការអន្តរាគមន៍ទី២របស់សម្តេចមហាបវរធិបតី បានអំពាវនាវទៅដល់ប្រជាពលរដ្ឋសូមមេត្តាឈប់ជឿលើការឃោសនារបស់មេខ្លោងឬមេខ្យល់ដែលបំផុសបំផុលនាំឱ្យមានបទល្មើសដោយមិនដឹងខ្លួន៕