ខេត្តស្វាយរៀង ៖ លោកនាយឧត្តមសេនីយ៍ វង្ស ពិសេន អគ្គមេបញ្ជាការនៃកងយុទ្ធពលខេមរភូមិន្ទ បានសម្រេចដកហូតមុខតំណែងមេបញ្ជាការរងកងរាជអាវុធហត្ថស្រុកស្វាយជ្រំ០៣រូប ដោយប្រព្រឹត្តអំពើពុករលួយទារលុយជនសង្ស័យជួញដូរគ្រឿងញៀនចំនួន១,១០០ដុល្លារ ជាថ្នូរការដោះលែងជនសង្ស័យឱ្យមានសេរីភាព ។
ទី១-លោកអនុសេនីយ៍ឯក ប៊ី រីណា អត្តលេខ១៩៦២៤១ មេបញ្ជាការរងមូលដ្ឋានកងរាជអាវុធហត្ថស្រុកស្វាយជ្រំនៃបញ្ជាការដ្ឋានកងរាជអាវុធហត្ថខេត្តស្វាយរៀងមកជានាយទាហាននៃបញ្ជាការដ្ឋានកងរាជអាវុធហត្ថខេត្តរតនគិរី ។
២-លោកអនុសេនីយ៍ឯក រិត សំអូន អត្តលេខ១៩១៣៩៣ មេបញ្ជាការរងមូលដ្ឋានកងរាជអាវុធហត្ថស្រុកស្វាយជ្រំ ជានាយទាហាននៃមេបញ្ជាការដ្ឋានកងរាជអាវុធហត្ថខេត្តព្រះវិហារ ។
៣-លោកអនុសេនីយ៍ឯកប៊ិក វណ្ណារឿត មេបញ្ជាការរងមូលដ្ឋានកងរាជអាវុធហត្ថស្រុកស្វាយជ្រំ មកជានាយទាហាននៃបញ្ជាការដ្ឋានកងរាជអាវុធហត្ថប៉ៃលិន ។
បើតាមសមត្ថកិច្ចបានបង្ហើបឱ្យដឹងថា ការដកហូតមុខតំណែង និងឋានន្តរស័ក្តិមេបញ្ជាការរងមូលដ្ឋានកងរាជអាវុធហត្ថស្រុកស្វាយជ្រំ០៣រូបនេះ គឺយោងតាមសេចក្ដីសម្រេចកាលពីថ្ងៃទី១៣ ខែមីនា ឆ្នាំ ២០២៤ បានឱ្យដឹងថា នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយុទ្ធពលខេមរភូមិន្ទ បានចេញ សេចក្ដីសម្រេច ស្ដីពីការដកហូតមុខតំណែង និងបន្ថយឋានន្ដរស័ក្ដិ មេបញ្ជាការរងមូលដ្ឋានកងរាជអាវុធហត្ថ ស្រុកស្វាយជ្រំចំនួន៣រូប មកត្រឹមជានាយទាហាន ។
បើតាមសេចក្ដីសម្រេចរបស់នាយឧត្តមសេនីយ៍ វង្ស ពិសេន បានបញ្ជាក់ថា មូលហេតុដកហូតមុខតំណែង និងបន្ថយឋានន្តរស័ក្ត័នោះ គឺមកពីមូលហេតុលោកមេបញ្ជាការរងទាំង០៣រូបទាមទារប្រាក់ចំនួន១.១០០ដុល្លារ ជាថ្នូរនឹងការដោះលែងជនសង្ស័យប្រើប្រាស់គ្រឿងញៀន ។
តាមទស្សនៈនានាថា បើមិនរាងទេ…ថ្ងៃក្រោយសុំកុំរាង!!
ចែករំលែកព័តមាននេះ