ទំនិញជិត១តោនគ្មានច្បាប់និងខូចគុណភាពដែលឈ្មួញនាំចូលតាមច្រកបឹងត្រកួន ត្រូវដុ.តកម្ទេចចោល
- បន្ទាយមានជ័យ
ខេត្តបន្ទាយមានជ័យ ៖ ទំនិញជិត១តោន គ្មានច្បាប់ និងខូចគុណភាព ដែលឈ្មួញនាំចូលតាមច្រក
ខេត្តបន្ទាយមានជ័យ ៖ ទំនិញជិត១តោន គ្មានច្បាប់ និងខូចគុណភាព ដែលឈ្មួញនាំចូលតាមច្រក
ខេត្តបន្ទាយមានជ័យ ៖ ទំនិញជិត១តោន គ្មានច្បាប់ និងខូចគុណភាព ដែលឈ្មួញនាំចូលតាមច្រកតំបន់បឹងត្រកួន ត្រូវបានដុតកម្ទេចចោល កាលពីរសៀលថ្ងៃទី១២ ខែមីនា ឆ្នាំ២០២៤ នៅទីលាន ស្ថិតភូមិខ្លាកូនថ្មី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ។
លោកវរៈសេនីយ៍ទោ ម៉ី បូរ៉ាន់ នាយរងការិយាល័យនគរបាលប្រឆាំងបទល្មើសសេដ្ឋកិច្ចខេត្តបន្ទាយមានជ័យ បានឱ្យដឹងថា កាលពីយប់ថ្ងៃទី១១ ខែមីនា ឆ្នាំ២០២៤ នៅចំណុចផ្លូវជាតិលេខ៥៦ ស្ថិតភូមិឯកភាព ឃុំគំរូ ស្រុកថ្មពួក កម្លាំងជំនាញការិយាល័យនគរបាលប្រឆាំងបទល្មើសសេដ្ឋកិច្ចខេត្តសហការជាមួយមន្ត្រី ក.ប.ប សាខាខេត្ត និងមន្ត្រីការិយាល័យផលិតកម្ម និងបសុព្យាបាលខេត្តបានឃាត់រថយន្ត១គ្រឿងម៉ាក់កាម៉ារី ស៊េរីចាស់ ពាក់ផ្លាកលេខ ក្រុងប៉ៃលិន 2A-0213 និងអ្នកបើកបរឈ្មោះ ម៉ៅ ម៉េត ភេទប្រុស អាយុ៥៣ឆ្នាំ ឆែកឆេររកឃើញទំនិញខូចគុណភាពទម្ងន់៧៨៣គីឡូក្រាមរួមមាន ១-ប្រហិតចម្រុះទម្ងន់៦២៦គីឡូក្រាម ២-សាច់មាន់និងចុងស្លាបមាន់ទម្ងន់១២៨គីឡូក្រាម និង៣-សាច់ជ្រូកចង្កាក់ទម្ងន់២៩គីឡូក្រាម។
លោកវរៈសេនីយ៍ឯក រស់ អៀម នាយការិយាល័យនគរបាលប្រឆាំងបទល្មើសសេដ្ឋកិច្ចខេត្តបានបញ្ជាក់ថា ក្រោយកម្លាំងចម្រុះឃាត់រថយន្ត១គ្រឿងដឹកទំនិញគ្មានច្បាប់ និងខូចគុណភាពជិត១តោន ត្រូវបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីពិនិត្យនិងអ្នកបើកបរសារភាពថាទំនិញនេះនាំចូលតាមច្រកតំបន់ព្រំដែនបឹងត្រកួន ស្រុកថ្មពួក បម្រុងនាំចេញទៅខេត្តសៀមរាប ក្រោយសាកសួររួចហើយ ទំនិញខូចគុណភាពត្រូវបានដុតកម្ទេចចោល ចំណែកអ្នកបើកបរត្រូវនាំយកទៅអនុវត្តបន្តតាមច្បាប់ ។
លោក លន់ ស៊ីថា មន្ត្រី ក.ប.ប សាខាខេត្តបន្ទាយមានជ័យបានឱ្យដឹងថា ទំនិញដែលដុតចោលជិត១តោននេះជាទំនិញគ្មានច្បាប់ដឹកខុសលក្ខណៈបច្ចេកទេស បណ្ដាលឱ្យខូចគុណភាពដូចជាប្រហិតចម្រុះ សាច់មាន់និងចុងស្លាបមាន់ និងសាច់ជ្រូកចង្កាក់ បើយកទៅលក់អាចអ្នកទិញទៅបរិភោគប្រឈមប៉ះពាល់សុខភាពបើរកស៊ីត្រូវដឹកមានច្បាប់និងមានលក្ខណៈបច្ចេកទេសឱ្យបានត្រឹមត្រូវមិនប៉ះពាល់សុខភាពប្រជាពលរដ្ឋ ៕
ចែករំលែកព័តមាននេះ