ខេត្តក្រចេះ ៖ កម្លាំងសមត្ថកិច្ចចាប់ឃាត់ខ្លួនជនជាតិចិនចំនួន៦នាក់ និងខ្មែរ២នាក់ធ្វើដំណើរតាមរថយន្ត lexus មួយគ្រឿងបញ្ជូនទៅធ្វើការសាកសួរនៅស្នងការដ្ឋាននគរបាលខេត្តក្រចេះ ។ ការឃាត់ខ្លួននេះសមត្ថកិច្ចបានធ្វើឡើង នៅថ្ងៃទី២៨ ខែមេសា ឆ្នាំ២០២៤នេះ ។
ប្រភពពីសមត្ថកិច្ចបានឱ្យដឹងថា ៖ ក្រុមជនជាតិចិនទាំងនោះត្រូវបានកម្លាំងអធិការដ្ឋានស្រុកសំបូរ ខេត្តក្រចេះ សហការជាមួយកម្លាំងប៉ុស្តិ៍រដ្ឋបាលសណ្ដាន់ធ្វើការចាប់ឃាត់បាន ខណៈកំពុងធ្វើដំណើតាមរថយន្ត lexus 470 ពណ៌ស្ករ ស្លាកលេខភ្នំពេញ2G.4697 មួយគ្រឿង កាលពីវេលាម៉ោង៩:០០នាទី ព្រឹកថ្ងៃទី២៧ ខែមេសា ឆ្នាំ២០២៤ នៅចំណុច ភូមិចាត្នោល ឃុំសណ្ដាន់ ស្រុកសំបូរ ខេត្តក្រចេះ ។
ប្រភពព័ត៌មានពីសមត្ថកិច្ចឲ្យដឹងថា ៖ រថយន្ត lexus 470 ពណ៌ស្ករ ដឹកក្រុមជនជាតិចិននោះត្រូវបានគេសង្ស័យថា គឺឆ្លងដែនខុសច្បាប់ចេញពីទឹកដីប្រទេសឡាវ ហើយបានឆ្លងតាមទូកមកទឹកដីខ្មែរ ដោយមានមេខ្យល់ជាជនជាតិខ្មែរ ចំនួនពីរនាក់ចាំទទួលដឹកពីព្រំប្រទល់ប្រទេសឡាវ ដឹកមកកម្ពុជា ដើម្បីយកទៅខេត្តព្រះសីហនុ ។
ប្រភពដដែលបន្តថា ៖ រថយន្តដឹកក្រុមជនជាតិចិននោះមកដល់ចំណុចទឹកដីអូរគ្រៀង ក៏បានបែកការណ៍ដោយសារតែរថយន្តនេះជាមុខសញ្ញាធ្លាប់ដឹកជនជាតិចិនខុសច្បាប់ កាលពីពេលកន្លងទៅ ក្រោយពីដឹងព័ត៌មានបែបនេះ កម្លាំងសមត្ថកិច្ចក៏បើករថយន្តតាមក្រោយរថយន្ត lexus 470របស់ចិនដែលកំពុងជិះក៏ធ្វើឲ្យអ្នកបើកបររថយន្តដឹកជនជាតិចិននោះភ័យក៏បើករត់គេចចេញពីផ្លូវជាតិលេខ០៧ ចូលមកតាមមាត់ទន្លេវិញ ហើយព្យាយាមបើករត់គេចដោយសភាពការណ៍មិនស្រួលក៏បានចតរថយន្តទុកចោល រីឯជនជាតិចិន និងមេខ្យល់ខ្មែរពីរនាក់នោះក៏បាននាំគ្នារត់គេច តែទោះជាយ៉ាងណាសមត្ថកិច្ចសហការជាមួយនឹងកម្លាំងប៉ុស្តិ៍នគរបាលសណ្ដាន់ និងប្រជាការពារភូមិក៏ចាប់បានជនទាំងអស់នោះមកវិញ។
ក្រោយចាប់ខ្លួនបានក្រុមជនជាតិចិនទាំងនោះ ត្រូវបញ្ជូនទៅកាន់ស្នងការដ្ឋាននគរបាលខេត្តក្រចេះកម្លាំងជំនាញកំពុងតែបន្តធ្វើការសាកសួរដើម្បីបន្តចាត់ការទៅតាមនីតិវិធីច្បាប់។ សមត្ថកិច្ចបានពង្រឹងផងដែរតាមព្រំដែន ដើម្បីការពារការឆ្លងដែនដោយខុសច្បាប់ចំពោះជនអន្តោប្រវេសន៍ ៕
ចែករំលែកព័តមាននេះ