ខេត្តរតនគិរី ៖ ជនអន្តោប្រវេសន៍ខុសច្បាប់វៀតណាមជាច្រើននាក់ លួចចូលមកធ្វើសកម្មភាពជីកកកាយយករ៉ែមាសតាមចិត្តដោយខុសច្បាប់ ត្រូវបានកម្លាំងចម្រុះខេត្តរតនគីរី ធ្វើការបង្ក្រាបនិងឃាត់ខ្លួនរួមទាំងសម្ភារគ្រឿងចក្រជាច្រើនគ្រឿងទៀតផងដែរជាវត្ថុតាង ។ យុទ្ធនាកាបង្ក្រាបជនអន្តោប្រវេសន៍វៀតណាមថ្លើមពាសមេឃជីកយករ៉ែមាសខុសច្បាប់នោះ ដឹកនាំដោយលោកម៉ា វិចិត្រ…
ខេត្តរតនគិរី ៖ ជនអន្តោប្រវេសន៍ខុសច្បាប់វៀតណាមជាច្រើននាក់ លួចចូលមកធ្វើសកម្មភាពជីកកកាយយករ៉ែមាសតាមចិត្តដោយខុសច្បាប់ ត្រូវបានកម្លាំងចម្រុះខេត្តរតនគីរី ធ្វើការបង្ក្រាបនិងឃាត់ខ្លួនរួមទាំងសម្ភារគ្រឿងចក្រជាច្រើនគ្រឿងទៀតផងដែរជាវត្ថុតាង ។
យុទ្ធនាកាបង្ក្រាបជនអន្តោប្រវេសន៍វៀតណាមថ្លើមពាសមេឃជីកយករ៉ែមាសខុសច្បាប់នោះ ដឹកនាំដោយលោកម៉ា វិចិត្រ អភិបាលរងខេត្តរតនគិរី សម្របសម្រួលនិតិវិធីដោយព្រះរាជអាជ្ញារងអមសាលាដំបូងខេត្តបានធ្វើឡើងនៅថ្ងៃទី៧ ខែមីនា ឆ្នាំ២០២៤ កម្លាំងប្រដាប់អាវុធទាំង៣ប្រភេទ រួមនិងមន្ត្រីឧទ្យានជាតិ ឭមន្ត្រីរ៉ែ និងថាមពលខេត្ត មន្ត្រីខណ្ឌរដ្ឋបាលព្រៃឈើខេត្ត អភិបាលស្រុកតាវែងរួមនិងមន្ត្រីពាក់ព័ន្ធមួយចំនួនទៀត ដោយប្រើប្រាស់អស់ពេលចំនួន៤ថ្ងៃទើបធ្វើកិច្ចការនោះបានជោគជ័យ ។
ហើយនៅថ្ងៃទី១០ ខែមីនា ឆ្នាំ២០២៤ នោះ ជនសង្ស័យទាំង២៦នាក់ ត្រូវបានកម្លាំងចម្រុះបានផ្ញើទុកជាបណ្ដោះអាសន្ននៅអធិការដ្ឋាននគរបាលស្រុកអណ្ដូងមាស ដើម្បីសាកសួរនិងកសាងសំណុំរឿងបញ្ជូនខ្លួនរួមភស្ដុតាងទៅសាលាដំបូងខេត្ត ។ ចំណែកឯគ្រឿងចក្រជាច្រើនគ្រឿងដែលបម្រើឲ្យជាមធ្យោបាយប្រព្រឹត្តបទល្មើសជីកយករ៉ែមាសខុសច្បាប់នោះ បានរក្សាទុកនៅនិងកន្លែងដដែលសិន ។
នៅរសៀលថ្ងៃទី១១ ខែមីនា ឆ្នាំ២០២៤ អ្នកយកព័ត៌មានយើងបានព្យាយាមសួរទៅមន្ត្រីពាក់ព័ន្ធមួយចំនួនទៀត ដើម្បីជួយពន្យល់ពីករណីឃាត់ខ្លួនជនអន្តោប្រវេសន៍ខុសច្បាប់ជាតិវៀតណាមទាំង២៦នាក់នោះដែរ តែពុំមានមន្ត្រីណាបានឆ្លើយប្រាប់នោះទេ គឺគ្រាន់តែបានបញ្ជាក់ថា កំពុងធ្វើការស្រាវជ្រាវ។
ដោយឡែក លោកកែវ ភក្តី ព្រះរាជអាជ្ញារង និងជាអ្នកនាំពាក្យឲ្យអយ្យការអមសាលាដំបូងខេត្ត លោកបានប្រាប់ក្រុមអ្នកយកព័ត៌មានប្រចាំខេត្តរតនគិរីថា ពាក់ព័ន្ធនិងកាឃាត់ខ្លួនជនជាតិវៀតណាមចំនួន២៦នាក់នោះគឺមន្ត្រីប៉ូលីសអន្ដោប្រវេសន៍កំពុងបន្ដសាកសួរ ដើម្បីបង្ករសំណុំរឿងចាត់ការតាមនិតិវិធីហើយ។
ពាក់ព័ន្ធក្នុងរឿងជនជាតិវៀតណាមចំនួន២៦នាក់នេះដែរ ប្រជាពលរដ្ឋ រួមនិងមន្ត្រីមួយចំនួនបានទទួចសុំឲ្យក្រសួងពាក់ព័ន្ធ ជាពិសេស ក្រសួងបរិស្ថាន មេត្តាបើកការស៊ើបអង្កេតឲ្យបានស៊ីជម្រៅផង ព្រោះថា ជនអន្តោប្រវេសន៍ទាំងអស់នោះ បើគ្មានការឃុបឃិតគ្នាជាមួយអាជ្ញាធរមូលដ្ឋាន និងមន្ត្រីស្នាក់ការបរិស្ថាននោះទេ ពួកគេក៏មិនអាចហ៊ាននាំគ្រឿងចក្រជាច្រើនគ្រឿងចូលព្រៃឧទ្យានជាតិ និងធ្វើសកម្មភាពកាយយករ៉ែជាច្រើនថ្ងៃខែបានរលូនបែបនេះដែរ៕
ព័ត៌មានបន្ថែមមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ