ទី​ក្រុង​ប៊ែឡាំង៖ ​បុរស​ជន​ជាតិ​អាល្លឺម៉ង់​ម្នាក់​​​ចាក់​វ៉ាក់​សាំង​ជាង​២០០​ម្ជុល​​ដោយ​គ្មាន​បញ្ហា​។​​ បើ​ដូច្នេះ​មែន​ គាត់​អាច​នឹង​ជាប់​ឈ្មោះ​ជា​អ្នក​ទទួល​វ៉ាក់​សាំង​ច្រើន​បំផុត​នៅ​ក្នុង​ប្រវត្តិ​សាស្ត្រ​ពិភព​លោក​។​ កន្លងមក អ្នក​ខ្លះ​ធ្លាប់​​​ចាក់​វ៉ាក់​សាំង​បង្ការ​ជំងឺ​ជា​ច្រើន​មុខ​​។ ប៉ុន្តែ​គេ​ចាក់​ពេល​ឃ្លាត​គ្នា​ច្រើន​ឆ្នាំ​ទើប​ចាក់​ម្ដង​ ហើយ​ចាក់​យ៉ាង​ខ្លាំង​ត្រឹម​រាប់​សិប​ម្ជុល​​ប៉ុណ្ណោះ​ពេញ​១​ឆាក​ជីវិត​របស់​​​ពួកគេ​។ ប្លែក​អ្វី​តែ​បុរស​អាល្លឺម៉ង់​ម្នាក់​នេះ​​ចាក់​វ៉ាក់​សាំង​កូវីដ​១៩​ចំនួន​២១៧​ម្ជុល​ត្រឹម​តែ​រយៈ​ពេល​ប៉ុន្មាន​ឆ្នាំ​ប៉ុណ្ណោះ​។​

ប្រព័ន្ធ​ភាព​ស៊ំា​​របស់​បុរស​វ័យ​៦២​ឆ្នាំ​ម្នាក់​នេះ​នៅ​តែ​​បំពេញ​​មុខ​ងារ​បាន​យ៉ាង​ល្អ​។ ​បុរស​ម្នាក់​​​នេះ​ជម្នះ​ចិត្ត​ខ្លាំង​មែន​ទែន។ ទោះបី​អ្នក​ដទៃ​ខំ​និយាយ​បញ្ចុះ​បញ្ចូល​ និង​រារាំង​យ៉ាង​ណា​​​​ក៏​មិន​អាច​ហាម​ឃាត់​ចិត្ត​របស់​គាត់​បាន​ឡើយ​។ ​បុរស​នេះ​ផ្ទុះ​ការ​ចាប់​អារម្មណ៍​ពី​សំណាក់​ក្រុម​អ្នក​ស្រាវ​ជ្រាវ​​នៅ​​អាល្លឺម៉ង់​កាល​ពី​​ឆ្នាំ​២០២២​។ កាល​នោះ គាត់​ចាក់​វ៉ាក់​សាំង​បាន​៩០​ម្ជុល​។​

មុន​ដំបូង​គេ​យល់​ច្រឡំ​លើ​គាត់​។ គេ​គិត​ថា​គាត់​ប្រហែល​ជា​សម្រុក​ចាក់​វ៉ាក់​សាំង​ដើម្បី​​ប្រមូល​ប័ណ្ណ​ចាក់​វ៉ាក់​សាំង​ទៅ​លក់​ឱ្យ​អ្នក​ដទៃ​ (អ្នក​ខ្លះ​ខ្ជិល​ចាក់​វ៉ាក់​កូវីដ​១៩។ ពួកគេ​ទិញ​ប័ណ្ណ​ដើម្បី​បន្លំ​ថា​ខ្លួន​បាន​ចាក់​ហើយ​​)។ រដ្ឋ​អាជ្ញា​អាល្លឺម៉ង់​​ក៏​​​បើក​ការ​ស៊ើប​អង្កេត​​ករណី​នេះ​ក្រែង​លោ​មាន​ករណី​ឆ​បោក​។ ប៉ុន្តែ​ស៊ើប​ចុះ​ស៊ើប​ឡើង​ទៅ​​ហាក់​ដូច​ជា​គ្មាន​ធាតុ​ផ្សំ​នៃ​បទ​ល្មើស​​ទាល់​តែ​សោះ​។ រដ្ឋ​អាជ្ញា​ប្រមូល​បាន​ភស្តុតាង​ថា​បុរស​អាល្លឺម៉ង់​ម្នាក់​នេះ​បាន​ចាក់​វ៉ាក់​សាំង​១៣០​​ម្ជុល​នៅ​ក្នុង​រយៈ​ពេល​៩​ខែ​។​

ប៉ុន្តែ​បុរស​​នេះ​​​ប្រាប់​ថា​តាម​ពិត​គាត់​ចាក់​វ៉ាក់​សាំង​កូវីដ​១៩​​ចំនួន​៨​ប្រភេទ​ខុស​ៗ​គ្នា​សរុប​​​២១៧​ម្ជុល​នៅ​ក្នុង​រយៈ​ពេល​២៩​ខែ​។ អ្នក​ជំនាញ​ខាង​មេរោគ​ម្នាក់​ឈ្មោះ​​គីឡាន សូបឺ (Kilian Schober) ​​​ប្រាប់​ថា​​បុរស​អាល្លឺម៉ង់​​​រូប​​នេះ​នៅ​ពេល​គេ​ព្យាយាម​ទាក់​ទង​គាត់​ គាត់​​​ហាក់​ដូច​ជា​មាន​ចិត្ត​ចង់​ចាក់​វ៉ាក់​សាំង​យ៉ាង​ខ្លាំង​​​​ដើម្បី​ចង់​ដឹង​ពី​ផល​វិបាក​នៃ​ការ​ចាក់​វ៉ាក់​សាំង​កូវីដ​​​ច្រើន​ម្ជុល​។​​

​
បើ​ចាក់​វ៉ាក់​សាំង​ច្រើន​ម្លឹង​ៗ តើ​គាត់​អាច​ត្រូវ​គេ​ចារ​ទុក​នៅ​ក្នុង​ក្រាំង​ប្រវត្តិ​សាស្ត្រ​​ដែរ​ឬ​ទេ​?
ករណី​ចាក់​វ៉ាក់សាំង​ច្រើន​ដល់​កម្រិត​នេះ​ក៏​ល្អ​ម៉្យាង​ដែរ​ ងាយ​ស្រួល​ឱ្យ​អ្នក​វិទ្យាសាស្ត្រ និង​អ្នក​សិក្សា​ស្រាវ​ជ្រាវ​អាច​តាម​ដាន​​​ផល​វិបាក​ផ្សេង​ៗ​។ អ្នក​វិទ្យា​សាស្ត្រ​ខ្លះ​​ធ្លាប់​គិត​ថា​បើ​មនុស្ស​​​ចាក់​វ៉ាក់​សាំង​ច្រើន​ដល់​ថ្នាក់​​​នេះ​​ធ្វើ​ឱ្យ​​​ប្រព័ន្ធ​ភាព​ស៊ំា​​​លែង​​​បំពេញ​មុខ​ងារបាន​ល្អ​​។ មូល​ហេតុ​ដោយ​សារ​កោសិកា​​ភាព​ស៊ំា​លែង​កម្ចាត់​មេរោគ​សកម្ម​ដូច​មុន​​​។​

ប៉ុន្តែ​សម្រាប់​ករណី​បុរស​ជន​ជាតិ​អាល្លឺម៉ង់​ម្នាក់​នេះ​ផ្សេង​ពី​គេ​។​ បន្ទាប់​ពី​ចាក់​វ៉ាក់​សាំង​កាន់​តែច្រើន កោសិកា​ភាព​ស៊ំា​របស់​គាត់​​កើន​ចំនួន​កាន់​តែ​ច្រើន​​​។ ​​​​អង្គ​បដិ​ប្រាណ​​ក៏​ខ្លាំង​ជាង​អ្នក​ចាក់​​វ៉ាក់​សាំង​កូវីដ​១៩​ត្រឹម​​៣​ដូស​​ទៅ​ទៀត​។​ មិន​តែ​ប៉ុណ្ណោះ  កម្លាំង​កំហែង​របស់​គាត់​គ្មាន​ថយ​ចុះ​​​​ទេ។ គាត់​​​នៅ​តែ​​មាន​កម្លាំង​មាំ​មួន​​ដូច​ក្របី​ឡើង​ក​។

​​​អ្នក​វិទ្យាសាស្ត្រ​សូម​ផ្ដាំ​​​ទៅ​អ្នក​ដទៃ​ទៀត​ កុំ​ឃើញ​គាត់​ចាក់​វ៉ាក់​សាំង​ជាង​២០០​ម្ជុល​ ឯង​យក​តម្រាប់​តាម​ដើម្បី​​ដេញ​ជើង​គាត់​ ឬ​ចង់​បំបែក​កំណត់​ត្រា​ពិភព​លោក​ ​ប្រយ័ត្ន​ស្លាប់​គ្មាន​អំបិល​ប្រឡាក់​ ព្រោះ​មនុស្ស​យើង​មាន​សរីរៈ​រាង​កាយ​ខុស​ៗ​គ្នា​។ ​នៅ​ក្នុង​លោក​នេះ​មាន​មនុស្ស​ដែល​មាន​លក្ខណៈ​ពិសេស​យូរ​ៗ​ទើប​ជួប​ម្ដង​។ អ្នក​ខ្លះ​មាន​ប្រព័ន្ធ​ការ​ពា​រខ្លួន​ពិសេស​​​អាច​ទប់​ស្កាត់​មិន​ឱ្យ​ឆ្លង​ជំងឺ​អ្វី​មួយ​។ ឧទាហរណ៍ អ្នក​ខ្លះ​អត់​ឆ្លង​ជំងឺ​អេដស៍​។ សត្វ​ក៏​ដូច​គ្នា​ដែរ​។ មូល​ហេតុ​ដែល​សត្វ​ស្ការ​ហ៊ាន​ប្រយុទ្ធ​មួយ​ស្មើ​ជា​មួយ​ពស់​វែក​ ព្រោះ​វា​មាន​ប្រព័ន្ធ​ភាព​ស៊ំា​នឹង​ពិស​ពស់។​ ពស់​ចឹក​មិន​ស្លាប់​​។

នៅ​ក្នុង​ករណី​បុរស​ជន​ជាតិ​អាល្លឺម៉ង់​ដែល​គេ​មិន​បញ្ចេញ​អត្ត​សញ្ញាណ​ម្នាក់​នេះ គេ​មិន​ទាន់​រក​ឃើញ​ថា​អ្នក​ដទៃ​ទៀត​ណា​ម្នាក់​បាន​ទទួល​វ៉ាក់​សាំង​ច្រើន​ជាង​គាត់​ទេ​។ អ្នក​ជំនាញ​ខាង​មេរោគ​នៅ​សាកល​វិទ្យាល័យ​តូក្យូ​ប្រាប់​ថា​គាត់​ពិត​ជា​អ្នក​ចាក់​វ៉ាក់​សាំង​ច្រើន​ជាង​គេ​​បំផុត​សម្រាប់​ពេល​​​បច្ចុប្បន្ន​។ ប៉ុន្តែ​មិន​ទាន់​មាន​ស្ថាប័ន​ណា​ផ្ដល់​វិញ្ញាបន​ប័ត្រ​ទទួល​ស្គាល់​ជា​ផ្លូវ​ការ​នៅ​ឡើយ​ទេ​៕

ប្រភព៖ Vietnam Express
https://e.vnexpress.net/news/news/man-reports-no-side-effects-after-receiving-217-covid-vaccine-shots-4719532.html