រាជធានីភ្នំពេញ ៖ កូនរបស់អ្នកមិនមែនជាក្មេងតូចទៀតទេ ពួកគេជាក្មេងជំទង់ ឬយុវវ័យ ហើយវាដល់ពេលដែលអ្នកត្រូវកែប្រែជំនាញចិញ្ចឹមកូនរបស់អ្នកផងដែរ ដើម្បីបន្តដំណើរជាមួយនឹងពួកគេទៀត ។ ពួកគេប្រហែលជាមានអារម្មណ៍ល្អជាងកាលនៅក្មេង ហើយឪពុកម្តាយក៏មានរឿងថ្មីៗដែលត្រូវគិតបន្ថែមទៀតដែរដូចជា ការដើរលេងយប់ជ្រៅ ការណាត់ជួប ការបើកបរ និងការររាប់អានមិត្តភក្តិថ្មី ។ គ្មានការសង្ស័យទេ ពេលខ្លះ ក្មេងជំទង់របស់អ្នកអាចនឹងសាកល្បងដែនកំណត់ និងការអត់ធ្មត់របស់អ្នក ប៉ុន្តែពួកគេនៅតែជាកូនរបស់អ្នក ។
ខាងក្រោមនេះ គឺជាកំហុសឆ្គងញឹកញាប់មួយចំនួន ដែលឪពុកម្តាយធ្វើជាមួយក្មេងជំទង់ និងរបៀបជៀសវាងបញ្ហាទាំងនេះ ៖
១. គិតពីរឿងអាក្រក់បំផុតពេក ៖ ក្មេងជំទង់ជាច្រើនទទួលបានពាក្យប្រៀនប្រដៅមិនល្អ ។ ហើយឪពុកម្តាយជាច្រើនក៏ផ្តើមគិតថា ការចិញ្ចឹមក្មេងជំទង់ជាទុក្ខលំបាក ដោយសារចាប់ផ្តើមឃើញកូនធំរបស់ពួកគេប្រែប្លែកជាងមុនដោយមិនដូចការរំពឹងទុកសោះ ។ អ្វីដែលយើងចង់ឱ្យឪពុកម្តាយយល់នោះគឺថា ពួកគេនៅតែជាក្មេងល្អ ប្រសិនបើពួកគេមិនធ្វើ អាក្រក់ ដូចជាការលេងគ្រឿងញៀន ការដើរលេងជាមួយហ្វូងមនុស្សខុស ឬរួមភេទមុនអាយុជាដើម ។ ឪពុកម្តាយត្រូវចាំថា ពាក្យសម្តីមិនល្អ ឬការរំពឹងទុកអវិជ្ជមានរបស់អ្នកពិតជាកាន់អាចធ្វើឱ្យកូនរបស់អ្នកក្លាយជាបែបនោះ ដូច្នេះចូរគិតវិជ្ជមាន ហើយផ្តោតលើចំណាប់អារម្មណ៍ និងចំណូលចិត្តរបស់កូនអ្នក ទោះបីជាអ្នកមិនយល់ពីពួកគេក៏ដោយ ។
២. អានសៀវភៅអំពីរបៀបចិញ្ចឹមកូនច្រើនពេក ៖ ជាជាងជឿជាក់លើសភាវគតិរបស់ខ្លួនឯង ឪពុកម្តាយជាច្រើនបែរទៅរកអ្នកជំនាញខាងក្រៅ ដើម្បីទទួលបានដំបូន្មានអំពីរបៀបចិញ្ចឹមក្មេងជំទង់ ។ ជាសំណាងមិនល្អ ឪពុកម្តាយមួយចំនួនបែរជាអាចចងខ្លួនឯងជាចំណង ព្រោះខំប្រឹងព្យាយាមធ្វើតាមដំបូន្មានដែលពួកគេអាននៅក្នុងសៀវភៅទៅវិញ ។ ប៉ុន្តែ វាមិនមែនមានន័យថា សៀវភៅអប់រំនោះអាក្រក់នោះទេ ។ យ៉ាងណាមិញ សៀវភៅអាចក្លាយជាបញ្ហានៅពេលដែលឪពុកម្តាយប្រើវាដើម្បីជំនួសជំនាញពីកំណើតរបស់ខ្លួនឯង ។ ប្រសិនបើការណែនាំ និងរចនាប័ទ្មផ្ទាល់ខ្លួនរបស់ពួកគេមិនសមទេ ឪពុកម្តាយកាន់តែព្រួយបារម្ភ និងមិនសូវជឿជាក់ជាមួយកូនៗរបស់ពួកគេ ។ សូមប្រើសៀវភៅដើម្បីទទួលបានយោបល់ល្អៗមួយចំនួន បន្ទាប់មកដាក់សៀវភៅចុះ ហើយជឿជាក់ថា អ្នកបានរៀនអ្វីដែលអ្នកត្រូវរៀន ហើយយល់ច្បាស់អំពីអ្វីដែលសំខាន់បំផុតសម្រាប់អ្នក និងគ្រួសាររបស់អ្នក ។
៣. ប្រឹងបែកញើសលើរឿងតូចតាចពេក ៖ ប្រហែលជាអ្នកមិនចូលចិត្តម៉ូដសក់ ឬការជ្រើសរើសសម្លៀកបំពាក់របស់កូនស្រី ឬប្រហែលជាពួកគេមិនបានលេងអ្វី ដែលអ្នកគិតថាពួកគេសមនឹងទទួលបាន ប៉ុន្តែមុននឹងអ្នកឈានជើងលូកដៃក្នុងរឿងនេះ ចូរមើលរូបភាពធំ ។ បើវាមិនធ្វើឱ្យកូនរបស់អ្នកប្រឈមមុខនឹងហានិភ័យ ឬគ្រោះថ្នាក់ទេ ចូរឱ្យពួកគេសម្រេចចិត្តសមស្របតាមអាយុ និងរៀនពីផលវិបាកនៃជម្រើសរបស់ពួកគេ ។ ពិតណាស់ ឪពុកម្តាយជាច្រើនមិនឃើញកូនឈឺចាប់ ការខកចិត្ត ឬបរាជ័យណាមួយឡើយ ប៉ុន្តែការការពារកូនរបស់អ្នកពីការពិតនៃជីវិតអាចនឹងធ្វើឱ្យកូនអ្នកបាត់បង់ឱកាសសិក្សាដ៏មានតម្លៃ មុនពេលពួកគេចេញទៅពិភពក្រៅដោយខ្លួនឯង ។ ជាការពិតណាស់ អ្នកនឹងនៅតែនៅទីនោះសម្រាប់ការណែនាំ និងការលួងលោម ប៉ុន្តែសូមឱ្យខ្លួនឯងដើរថយក្រោយបន្តិច ហើយគ្រាន់តែឱ្យកូនដឹងថា អ្នកនៅទីនោះសម្រាប់ពួកគេជានិច្ច ។
៤. មិនអើពើនឹងរឿងធំដុំ ៖ ប្រសិនបើអ្នកសង្ស័យថា កូនរបស់អ្នកកំពុងប្រើប្រាស់ថ្នាំជក់ (ក្នុងទម្រង់ណាមួយ) គ្រឿងស្រវឹង ឬថ្នាំដទៃទៀត សូមកុំមើលរំលងដាច់ខាត អ្នកត្រូវតែចាត់វិធានការឥឡូវនេះ មុនពេលវាក្លាយជាបញ្ហាធំជាងនេះ ។
៥. វិន័យច្រើនពេក ឬតិចពេក ៖ ឪពុកម្តាយខ្លះបាត់បង់ការគ្រប់គ្រងលើកូន ឪពុកម្តាយខ្លះ
ផ្សេងជៀសវាងការជជែក ឬជម្លោះទាំងអស់ ព្រោះខ្លាចក្មេងជំទង់របស់ពួកគេខឹង និងរុញពួកគេចេញ ។ ប្រសិនបើអ្នកសង្កត់ធ្ងន់ខ្លាំងពេកលើអាកប្បកិរិយាកូន អ្នកអាចនឹងធ្វើឱ្យកូនចាកចេញពីគន្លងរបស់អ្នក ។ ការចិញ្ចឹមកូនក្នុងបរិយាកាសតឹងតែងពេកអាចធ្វើឱ្យកូនបាត់បង់ឱកាសក្នុងការអភិវឌ្ឍជំនាញដោះស្រាយបញ្ហា ឬភាពជាអ្នកដឹកនាំ ដោយសារអ្នកកំពុងធ្វើការសម្រេចចិត្តសម្រាប់ពួកគេ ។ ប៉ុន្តែ វិន័យតិចតួចពេកក៏មិនអាចជួយកូនអ្នកបានដែរ ។ ក្មេងៗត្រូវការរចនាសម្ព័ន្ធ វិន័យ និងច្បាប់ច្បាស់លាស់ដើម្បីរស់នៅ ។ សូមចាំថា ឥទ្ធិពលរបស់អ្នក គឺជ្រៅជាងអ្វីដែលអ្នកគិត ។ ក្មេងជំទង់ភាគច្រើននិយាយថា ពួកគេចង់ចំណាយពេលច្រើនជាមួយឪពុកម្តាយរបស់ពួកគេ ដូច្នេះ ចូរចាប់អារម្មណ៍នឹងកូនរបស់អ្នកឱ្យបានច្រើន ជាជាងចាប់អារម្មណ៍លើអ្វីដែលអ្នកចង់ ៕ ប្រភព ៖ webmd
អត្ថបទនេះផលិតឡើងក្រោមកិច្ចសហប្រតិបត្តិការជាមួយសាលារៀនវ៉េស្ទឡាញន៍ និងសាលារៀនណត្សឡាញន៍ ។ សាលារៀនផ្តល់ជូនកម្មវិធីមត្តេយ្យភាសាខ្មែរ និងអង់គ្លេស កម្មវិធីភាសាអង់គ្លេសសម្រាប់កុមារ កម្មវិធីភាសាអង់គ្លេសសិស្សធំ កម្មវិធីចំណេះទូទៅខ្មែរ ពីថ្នាក់ទី ១ ដល់ទី ១២ និងកម្មវិធីភាសាចិន ។ វគ្គសិក្សាថ្មីចូលរៀនថ្ងៃទី ២៩ ខែមករា ឆ្នាំ ២០២៤ ខាងមុខនេះ ។ សាលារៀនផ្តល់ជូនអាហារូបករណ៍រហូតដល់ ៤០% និងធានារ៉ាប់រងគ្រោះថ្នាក់ បុត្រធីតា និងការការពារសិក្សារហូតដល់ ៥ ឆ្នាំ ។
លើពីនេះ សាលារៀនក៏បន្ថែមនូវវេទិកា និងមធ្យោបាយសិក្សាយ៉ាងសម្បូរបែបជាមួយនឹងប្រព័ន្ធគ្រប់គ្រងសាលារៀន ប្រព័ន្ធគ្រប់គ្រង់ការសិក្សា និងអេបសាលារៀនជូនដល់មាតាបិតាសិស្ស និងសិស្សានុសិស្សក្នុងការគ្រប់គ្រងការសិក្សា និងតាមដានព័ត៌មានសិក្សារបស់បុត្រធីតាផងដែរ ។ សម្រាប់ព័ត៌មានបន្ថែម សូមទំនាក់ទំនងទូរស័ព្ទលេខ ៖ ០៩២ ៨៨៨ ៤៩៩ / ០១៥ ៨០៥ ១២៣ ៕
ចែករំលែកព័តមាននេះ