រាជធានីភ្នំពេញ ៖ អតីតតារាសម្តែងជើងចាស់អ្នកស្រី សក្តិ សាកេតមយូរ៉ា បង្ហាញការសោកស្តាយដោយសារអ្នកស្រីមិនមានកូនប្រុស-ស្រីណាម្នាក់ អាចបន្តវេនសិល្បៈពីអ្នកស្រី និងស្វាមី ខណៈពេលអ្នកស្រីនៅតែស្រឡាញ់ និងនឹកដល់វិស័យសិល្បៈនៅឡើយ…
រាជធានីភ្នំពេញ ៖ អតីតតារាសម្តែងជើងចាស់អ្នកស្រី សក្តិ សាកេតមយូរ៉ា បង្ហាញការសោកស្តាយដោយសារអ្នកស្រីមិនមានកូនប្រុស-ស្រីណាម្នាក់ អាចបន្តវេនសិល្បៈពីអ្នកស្រី និងស្វាមី ខណៈពេលអ្នកស្រីនៅតែស្រឡាញ់ និងនឹកដល់វិស័យសិល្បៈនៅឡើយ រហូតមកទល់នាពេលនេះ ។
ជាអ្នកសិល្បៈទាំងប្តី និងប្រពន្ធ អ្នកស្រីសក្តិ សាកេតមយ៉ូរ៉ា និងលោកសូម ដូរិន បានប្រឡូកក្នុងវិស័យសិល្បៈអស់ជាច្រើនទសវត្សរ៍ ហើយអ្នកស្រីនិងស្វាមី ក៏មានស្នាដៃនៅក្នុងការដឹកនាំរឿងផងដែរ ។
យ៉ាងណា បច្ចុប្បន្នអ្នកស្រី និងស្វាមី មិនមានកូនជាអ្នកបន្តវេននោះឡើយ ទើបអ្នកស្រីបង្ហាញការសោកស្តាយ ដ្បិតសិល្បៈគឺអ្នកស្រី និងស្វាមីនៅតែស្រឡាញ់រហូតដង្ហើមចុងក្រោយ ។ ជាមួយនឹងការបង្ហាញរូបភាពចាស់ៗពីសកម្មភាពសម្តែងកូនប្រុស-ស្រីរបស់អ្នកស្រីកាលពីអតីតកាល នោះ អ្នកស្រី សក្តិ សាកេតមយូរ៉ា បានភ្ជាប់ជាមួយនឹងសំណេរថា បងប្អូននៅចាំទេឆ្នាំ1997តួឯកស្រីនិងតួឯកប្រុសក្នុងរឿងទុក្ខស្រីប្តីព្រាត់ ផលិតដោយទូរទស្សន៍អប្សរាស្នាដៃនិពន្ធដោយសម្តេចតេជោ ហ៊ុនសែន ដឹកនាំរឿងដោយលោកសោម ដូរីន ។
អ្នកស្រីបញ្ជាក់ថា តួទាំង២ជាកូនរបស់ខ្ញុំទាំង២នាក់ ឥឡូវគាត់ឈប់សំដែងហើយ ខ្ញុំដាច់ពូជអ្នកបន្តរវេនហើយ ម្យ៉ាងខ្ញុំទាំង២កាន់តែតែជរា ហើយតែនៅស្រឡាញ់វិស័យភាពយន្តដដែល ។ អ្នកស្រីថា ប្តីខ្ញុំសំដែងតាំងពីឆ្នាំ1958 អ្នកជំនាន់គាត់បានទៅចោលគាត់អស់ហើយ ។
ជាការកត់សម្គាល់ កន្លងមកអ្នកស្រី សក្តិ សាកេតមយូរ៉ា ធ្លាប់បានលើកឡើងប្រាប់កោះសន្តិភាពថា ទោះពេលបច្ចុបបន្នអ្នកស្រី និងស្វាមីមានវ័យកាន់តែចាស់ជរាក៏ពិតមែន ប៉ុន្តែអ្នកទាំងពីរនៅតែប្រកាន់ជំហរ និងសន្សំចិត្តចង់វិលមកការផលិតភាពយន្តថ្មីៗទៀត នៅក្នុងអំឡុងពេលណាមួយ ខណៈពេលដែលកូនរបស់អ្នកទាំងពីរមិនមានអ្នកស្នងសិល្បៈពីពួកលោកឡើយ ។
អ្នកស្រីបញ្ជាក់ថា ប្រឡូកក្នុងសិល្បៈនេះប្រមាណ៥ទសវត្សរ៍មកហើយ ហេតុនេះចិត្តនៅតែស្រឡាញ់ ចំណែកកូនចៅមិនមានអ្នកស្នងឡើយ គឺពួកគេធ្វើការជាមន្ត្រីរាជការទាំងអស់ ។ អ្នកស្រីថា ចិត្តស្រឡាញ់ គឺនៅតែស្រឡាញ់ ព្រោះស្វាមីគាត់បានចូលថតកុនតាំងពីឆ្នាំ១៩៥៨ ទោះជាគាត់ចាស់ក៏គាត់នៅតែស្រឡាញ់ ហើយបើគាត់មានកម្លាំងគាត់នឹងផលិតទៀត តែឡូវគាត់មិនទាន់មានកម្លាំងនៅឡើយទេ ប៉ុន្តែចិត្តនៅទន្ទិញពាក្យថា ស្រឡាញ់សិល្បៈនេះដដែល ។
អ្អ្នកស្រី សក្តិ សាកេតមយូរ៉ា បានលើកឡើងបន្ថែមថា ចាប់តាំងពីឆ្នាំ១៩៨៧ អ្នកស្រី និងស្វាមី បានចាប់ផ្តើមបើកផលិតកម្ម សោមដូរិន ដែលវណ្ណកម្មទី១ ដែលបានផលិតនោះ គឺរឿង «ឆ្អែតចិត្ត» បន្ទាប់មកមានរឿង «កញ្ញាម្ទេសទុំ» «ទឹករាំផ្ការាំ» «ប្រម៉ាត់ប្រម៉ង់» និងរឿងជាច្រើនទៀត ដែលអ្នកស្រីនិងស្វាមីបានផលិតឡើង ។
អ្នកស្រីបន្តថា ចំពោះរឿងដែលអ្នកស្រី និងស្វាមី ថតទាំងអស់នោះ ភាគច្រើនគឺជារឿងដែលអ្នកស្រីបានសរសេរស្នាដៃខ្លួនឯង ពោលគឺមិនមានទិញសិទ្ធិរឿងគេមកផលិតឡើយ ខណៈពេលដែលនៅមានរឿងមួយចំនួនទៀតដែលអ្នកស្រីបានសរសេរហើយនៅមិនទាន់បានថតនៅឡើយ។
យ៉ាងណា បើតាមអ្នកស្រី សក្តិ សាកេតមយូរ៉ា ប្រសិនបើអ្នកស្រីបានចេញថតភាពយន្តជាថ្មីវិញនោះ រឿងដំបូងដែលអ្នកស្រីនឹងថត គឺរឿង «ជីវិតរបស់អ្នកស្រីនិងស្វាមីផ្ទាល់» ដែលនិយាយអំពីការតស៊ូរបស់អ្នកស្រី និងស្វាមី ដែលបានចាប់ដៃគ្នាជាប្តីប្រពន្ធប៉ុន្មានជំនាន់មកនេះ ដើម្បីឲ្យទស្សនិកជនបានជ្រាប ៕
ចែករំលែកព័តមាននេះ