រាជធានីភ្នំពេញ ៖ ឯកឧត្តម អភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានដាស់តឿនដល់មន្ត្រីក្រោមឱវាទក្រសួងមហាផ្ទៃ ជាពិសេសកងកម្លាំងនគរបាល ដែលប្រើប្រាស់រថយន្តពាក់ផ្លាកលេខ (ន.ប) សូមប្រើប្រាស់ឲ្យចំជំនាញ ពោលគឺបម្រើសមត្ថកិច្ច និងអង្គភាពរបស់ខ្លួនឲ្យចំទិសដៅ ។
ថ្លែងនៅក្នុងសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារបន្ដរបស់ក្រសួងមហាផ្ទៃ នាព្រឹកថ្ងៃទី២៩ ខែកុម្ភៈ ឆ្នាំ២០២៤នេះ ឯកឧត្តមអភិសន្ដិបណ្ឌិត ស សុខា បានថ្លែងថា បើតាមរយៈការរាយការណ៍ពីស្នងការនគរបាលខេត្តព្រះសីហនុ យានយន្តពាក់ស្លាកលេខ (ន.ប) មួយចំនួន គឺបានជិះទៅធ្វើការនៅកាស៊ីណូ (ម៉ូតូ) ខណៈពីមុនមក ក៏ធ្លាប់ឃើញយានយន្តពាក់ស្លាកលេខ (ន.ប) បានឈប់នៅមុខខារ៉ាអូខេ (KTV)។ អ៊ីចឹងរថយន្តមិនអាចឲ្យខ្ចីទៅលើនរណាម្នាក់ទេ បុគ្គលណា គឺបុគ្គលនោះហើយ សូមប្រើប្រាស់ឱ្យចំមុខ និងចំជំនាញ ។
ជាមួយគ្នានេះ លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាដល់លោកនាយឧត្តមសេនីយ៍ ស ថេត អគ្គស្នងការនគរបាលជាតិ ក៏ដូចជាស្នងការនគរបាលរាជធានី-ខេត្តទាំងអស់ មេត្តាយកចិត្តទុកដាក់ចំពោះអ្នកប្រើប្រាស់ផ្លាកលេខ (ន.ប) នេះ បើចាំបាច់ អ្នកណាដែលប្រព្រឹត្តខុសច្បាប់ ត្រូវតែដកស្លាកលេខមកវិញ ហើយឱ្យអ្នកនោះទៅបង់ពន្ធដោយខ្លួនឯង។ ហើយបញ្ហានេះ ហាក់មានការកើនឡើងមួយចំនួននៅតាមបណ្ដាខេត្ត ដែលបានប្រើប្រាស់ខុសមធ្យោបាយ។ ការប្រើប្រាស់ស្លាកលេខ (ន.ប) នេះ មិនគួរឈឺក្បាលទៀតទេ មកដល់ម៉ោងនេះ ។
ពាក់ព័ន្ធករណីប្រើប្រាស់ស្លាកលេខ ដូចគ្នានេះដែរ ក្រសួងការពារជាតិ ក៏បានគូសបញ្ជាក់ថា ស្លាកលេខខេមរភូមិន្ទ (ខ.ម) បានអនុញ្ញាតឲ្យតែនាយទាហាន ដែលមានសិទ្ធពេញលេញ ដោយមិនអនុញ្ញាតឱ្យជនស៊ីវិល ឬជនបរទេសប្រើប្រាស់បានឡើយ ។
យោងតាមសេចក្តីជូនដំណឹង ស្តីពីការប្រើប្រាស់យានយន្តពាក់ស្លាកលេខ ខេមរភូមិន្ទ របស់ក្រសួងការពារជាតិ នៅថ្ងៃទី២៨ ខែកុម្ភៈ ឆ្នាំ២០២៤ បានលើកឡើងថា អាស្រ័យដោយស្ថានភាព នៃការប្រើប្រាស់យានយន្ត ពាក់ស្លាកលេខចរាចរ ខេមរភូមិន្ទ ក្នុងរយៈពេលចុងក្រោយនេះ សង្កេតឃើញកើតមាននូវបាតុភាពមួយចំនួន ដែលធ្វើឱ្យប៉ះពាល់ដល់សង្គម សាធារណៈ ដូចជាបញ្ហាគ្រោះថ្នាក់ចរាចរណ៍ បុគ្គលអ្នកប្រើប្រាស់មួយចំនួនមានភាពក្រអឺតក្រទមមិន សក្តិសមជាមន្ត្រីយោធា ធ្វើឱ្យមានការវាយតម្លៃ និងទទួលការរិះគន់ពីសាធារណជន ជាពិសេសប៉ះពាល់ដល់កិត្តិយសនៃកងយោធពលខេមរភូមិន្ទទាំងមូល ។
អគ្គនាយកដ្ឋានសម្ភារៈបច្ចេកទេស ក្រសួងការពារជាតិ សូមជូនដំណឹង និងបញ្ជាក់បន្ថែមអំពី ការប្រើប្រាស់យានយន្តពាក់ ស្លាកលេខចរាចរខេមរភូមិន្ទទាំងអស់ ដោយអនុវត្តតាមអនុក្រឹត្យ លេខ៧៧ អនក្រ.បក ចុះថ្ងៃទី២៨ ខែវិច្ឆិកា ឆ្នាំ២០០៨ អ្នកប្រើប្រាស់ត្រូវតែជានាយទាហាន ដែលមានសិទ្ធពេញលេញ ដោយមិនអនុញ្ញាតឱ្យជនស៊ីវិល ឬជនបរទេស ប្រើប្រាស់បានឡើយ ។
ក្រសួងការពារបានបញ្ជាក់ថា ៖ «ការប្រើប្រាស់យានយន្តពាក់ផ្លាក លេខចរាចរខេមរ ភូមិន្ទត្រូវស្របតាមការកំណត់របស់ក្រសួងការពារជាតិ ចំពោះក្រុមហ៊ុនសហការវិនិយោគ វិស័យការពារជាតិនានាក៏ត្រូវបានអនុវត្តដូចគ្នា ។ ក្នុងករណីដែលអនុវត្តការ ប្រើប្រាស់ផ្ទុយ ខុសពីខ្លឹមសារ ខាងលើ អគ្គនាយកដ្ឋានសម្ភារៈបច្ចេកទេស ក្រសួងការពារជាតិ នឹងចាត់វិធានការច្បាប់ជាធរមាន »។
ជាមួយគ្នានោះដែរ ក្រសួងបានស្នើឲ្យបណ្តាស្ថាប័ន កងឯកភាពចំណុះក្រសួងការពារជាតិ អគ្គបញ្ជាការដ្ឋាន និងគ្រប់បណ្ដាប្រភេទទ័ពជំនាញទាំងអស់ មេត្តាជ្រាប និងអនុវត្តឱ្យបានម៉ឺងម៉ាត់បំផុត ៕
![](https://kohsantepheapdaily.com.kh/wp-content/uploads/2024/02/befe3adcee64d40551ba5cebe65f458d-1.jpg)
![](https://kohsantepheapdaily.com.kh/wp-content/uploads/2024/02/0567062f2d728e3ac70499d8881d36eb-1.jpg)
![](https://kohsantepheapdaily.com.kh/wp-content/uploads/2024/02/02cda64d13981cb1ca5bef954b531655-1.jpg)
![](https://kohsantepheapdaily.com.kh/wp-content/uploads/2024/02/0cb55b9745a8da8d1e6eadc33ef75af5.jpg)
![](https://kohsantepheapdaily.com.kh/wp-content/uploads/2024/02/cd0473a7743ced09cd0ad0825330c8ce-1.jpg)
![](https://kohsantepheapdaily.com.kh/wp-content/uploads/2024/02/372bcb54d9902879d875cef5995f8296-1.jpg)
![](https://kohsantepheapdaily.com.kh/wp-content/uploads/2024/02/473bfb00770661b4af9eb06fbdd8e5b6-1.jpg)
ចែករំលែកព័តមាននេះ