ខេត្តកំពង់ស្ពឺ ៖ ក្មេងទំនើងចំនួន៤នាក់ត្រូវបានកម្លាំងនគរបាលស្រុកបសេដ្ឋ បានឃាត់ខ្លួន ខណៈដែលណាត់ជួបដៃគូរជំលោះ លុះឃើញកម្លាំងល្បាតរបស់នគរបាលស្រុកចុះល្បាត ស្រាប់តែក្រុមក្មេងទំនើងច្រឡំប្រុងកាប់ តែត្រូវកម្លាំងសមត្ថកិច្ចក្របួចជាប់៤នាក់ រីឯបក្ខពួក២នាក់ទៀតរត់គេចខ្លួនបាត់។
ការឃាត់ខ្លួនក្រុមក្មេងទំនើងប្រុងកាប់កម្លាំងសមត្ថកិច្ចច្រឡំស្មានតែគូរទំនាស់ ធ្វើឡើងកាលពីយប់ថ្ងៃទី២២ ខែធ្នូ ឆ្នាំ២០២៥ នៅលើខ្នងព្រែកស្ថិតនៅក្នុងភូមិមីលាវ ឃុំទួលអំពិល ស្រុកបសេដ្ឋ ខេត្តកំពង់ស្ពឺ។
នគរបាលស្រុកបសេដ្ឋបាននិយាយឱ្យដឹងថា នៅមុនពេលឃាត់ខ្លួនក្រុមក្មេងទំនើងខាងលើ គឺដោយបានការដឹកនាំបញ្ជាដ៏ខ្ពង់ខ្ពស់ ពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ កំលាំងនគរបាលនៃអធិការដ្ឋាននគរបាលស្រុកបសេដ្ឋ នឹងបានការណែនាំដាក់ទិសដៅពីលោកវរសេនីយ៍ឯកចន សុភីត អធិការនគរបាលស្រុកបសេដ្ឋ បានចុះល្បាតតាមមូលដ្ឋាននិងក្នុងភូមិសាស្ដ្រស្រុក ដើម្បីរក្សាសន្ដិសុខសុវត្ថិភាពជូនប្រជាពលរដ្ឋ នៅវេលាម៉ោង១០និង៣០នាទីយប់ថ្ងៃទី២២ ខែធ្នូ ឆ្នាំ២០២៥ កម្លាំងនគរបាលបានធ្វើការល្បាតដល់ចំណុចលើខ្នងព្រែក ស្ថិតក្នុងភូមិមីលាវ ឃុំទួលអំពិល ស្រុកបសេដ្ឋ ខេត្តកំពង់ស្ពឺ ស្រាប់តែមានក្រុមក្មេង១ក្រុមមានបក្ខពួកប្រមាណ៦នាក់ ម៉ូតូ៤គ្រឿងអង្គុយផឹកសុីនៅវាលស្រែស្ទុះចេញមកដោយដៃកាន់ដាវដែកកែច្នៃ១ដើមគោលបំណងកាប់សមត្ថកិច្ចដោយមិនដឹងមូលហេតុ។ ភ្លាមៗនោះកម្លាំងសមត្ថកិច្ចក៏ធ្វើការឃាត់ខ្លួនក្រុមក្មេងទំនើងបានចំនួន៤នាក់ រីឯបក្ខពួកចំនួន២នាក់ទៀតបានរត់គេចខ្លួនបាត់ស្រមោល។
នគរបាលស្រុកបសេដ្ឋបានបន្តថា ក្រុមក្មេងទំនើងចំនួន៤នាក់ដែលឃាត់ខ្លួនបាន៖ ទី១~ ឈ្មោះ ណៃ ភក្ត្រា ភេទប្រុស អាយុ១៨ឆ្នាំ ទីលំនៅភូមិមីលាវ ឃុំទួលអំពិល ស្រុកបសេដ្ឋ ទី២~ ឈ្មោះ ស៊ិន សៀវចាន់ ភេទប្រុស អាយុ២៤ឆ្នាំ រស់នៅភូមិតាមុឺន ឃុំទួលអំពិល ស្រុកបសេដ្ឋ ឃាត់ជាក់ស្ដែង ទី៣~ ឈ្មោះ នឹម ផាន់នី ភេទប្រុស អាយុ១៤ឆ្នាំ និងទី៤~ ឈ្មោះ សុន ពិសី ភេទប្រុស អាយុ២២ឆ្នាំ ( ជាម្ចាស់ដាវទេព ) រស់នៅភូមិមីលាវ ឃុំទួលអំពិល ស្រុកបសេដ្ឋ ខេត្តកំពង់ស្ពឺ។
នគរបាលស្រុកបសេដ្ឋបានបន្តទៀតថា បើតាមចម្លេីយសារភាពរបស់ក្មេងទំនើងថាពួកគេច្រឡំសមត្ថកិច្ចស្មានតែក្រុមក្មេងដែលមានជម្លោះជាមួយគ្នានិងណាត់គ្នាមកទីតាំងនេះ។
តាមការបញ្ជាក់ពី ជំនាញព្រហ្មទណ្ឌក្រុមក្មេងទាំងនេះជាមុខសញ្ញាដែលសមត្ថកិច្ចគ្រប់គ្រងក្នុងបញ្ជីក្មេងទំនេីងដែលតែងតែបង្កហេតុនៅតាមទីផ្លូវសាធារណៈពេលកូនសិស្សចេញពីសាលារៀននិងពេលយប់តាមកន្លែងផឹកសុី។
បច្ចុប្បន្នកំលាំងព្រហទណ្ឌបន្តនីតិវិធីកសាងសំណុំរឿងបញ្ជូនទៅការិយាល័យជំនាញខេត្ដ ដើម្បីចាត់ការបន្តតាមនីតិវិធី រីឯបក្ខពួកសេសសល់កំពុងតែបន្ដស្រាវជ្រាវ៕
ចែករំលែកព័តមាននេះ