រាជធានីភ្នំពេញ ៖ ដើម្បីលើកកម្ពស់សំពត់បត់ខ្មែរ ដែលមានតាំងពីដូនតាយើងមកនោះ ក្រុមអ្នកជំនាញកែច្នៃរចនាម៉ូដសំពត់បត់តាមលក្ខខណៈប្រពៃណីបុរាណ និងសម័យនឹងធ្វើការដាក់បង្ហាញស្នាដៃខ្លួន នៅក្នុងរាត្រីសមោសរ នៅដើមខែមីនា ឆ្នាំ២០២៤ខាងមុខ នេះបើតាមការឲ្យដឹងពីរដ្ឋលេខាធិការក្រ…
រាជធានីភ្នំពេញ ៖ ដើម្បីលើកកម្ពស់សំពត់បត់ខ្មែរ ដែលមានតាំងពីដូនតាយើងមកនោះ ក្រុមអ្នកជំនាញកែច្នៃរចនាម៉ូដសំពត់បត់តាមលក្ខខណៈប្រពៃណីបុរាណ និងសម័យនឹងធ្វើការដាក់បង្ហាញស្នាដៃខ្លួន នៅក្នុងរាត្រីសមោសរ នៅដើមខែមីនា ឆ្នាំ២០២៤ខាងមុខ នេះបើតាមការឲ្យដឹងពីរដ្ឋលេខាធិការក្រ សួងវប្បធម៌ និងវិចិត្រសិល្បៈ ។
ថ្លែងក្នុងសន្នីសីទសារព័ត៌មាន នារសៀលថ្ងៃទី២៦ ខែកុម្ភៈ ឆ្នាំ២០២៤ នៅទីស្តីការក្រសួងវប្បធម៌លោកជំទាវ ឡង់ ឌីសាន់ណារ៉ា រដ្ឋលេខាធិការ ក្រសួងវប្បធម៌ វិចិត្រសិល្បៈ និងជាប្រធានគណៈកម្មការរៀបចំកម្មវិធី«រាត្រីសមោសរសំពត់បត់ខ្មែរ»បានថ្លែងថាសំពត់បត់ខ្មែរយើងមានតាំងពីដូនតាយើងមកម្ល៉េះ ប៉ុន្តែដោយសារតែរបស់ខ្មែរក្រហម បានបំផ្លិចបំផ្លាញស្ទើរទាំងអស់ស្រុងប្រពៃណីខ្មែរយើងនេះពោលគឺរហូតដល់ប្រទេស កម្ពុជាត្រូវបានរំដោះចេញពីរបបខ្មៅងងឹតនេះ ធ្វើឲ្យមានការស្លៀកបែបប្រពៃណីសំពត់បត់ខ្មែរយើងនេះវិញ ។
លោកជំទាវ បានលើកឡើងចំពោះមុខអ្នកសិល្បៈល្បីៗជាច្រើនរូប ហើយខាងអ្នកខ្នៃម៉ូដ សំពត់បត់បែបបុរាណ និងសម័យ ថា ការដាក់បង្ហាញម៉ូដសំពត់បត់រាត្រីសមោសរនេះនឹងធ្វើឡើងនៅថ្ងៃទី២ ខែមីនា ឆ្នាំ២០២៤ខាងមុខ នៅសាលសន្នីសីទចតុមុខ។ ការដាក់បង្ហាញនេះ ដែរនឹងមានការចូលរួមដាក់បង្ហាញពីអ្នកសិល្បៈល្បីៗជាច្រើនរូប ក្នុងការបង្ហាញសំពត់បត់ បែបសម័យបុរាណ និងសម័យ ដែលអ្នកទស្សនាការចូលមើលដោយសេរី ។
លោកជំទាវ បានបន្ថែមថា សន្នីសីទសារព័ត៌មាននេះ គឺដើម្បីចង់ឲ្យប្អូនៗ ក្មួយៗ ជំនាន់ក្រោយបានយល់ដឹងពីសំពត់បត់ គឺជាកេរ្តិ៍ដំណែលអរូបិយ៍របស់ដូនតាខ្មែរ បានបន្សល់ទុក ដើម្បីអ្នកជំនាន់ក្រោយ ។
លោកជំទាវ បានបញ្ជាក់ថា ៖ «អ៊ីចឹង ក្នុងនាមយើងជាទំពាំងស្នងឬស្សី ក្នុងនាមជាយុវជនខ្មែរ គឺមានភារកិច្ច ដឹងថា នេះជាសម្លៀកបំពាក់ដល់ល្អឯក ដែលដូនតាយើងបន្សល់ទុក ហើយយើងត្រូវចេះក្រឡេកមើលថ្នាក់ដឹកនាំស្ថាប័ននានា ដែលស្លៀកសំពត់បត់នេះស្ទើរតែ៩០ភាគរយ ក៏ប៉ុន្តែថ្នាក់ដឹកនាំធ្វើគំរូហើយ តែបើក្រឡេកមើលប្អូនៗយុវជនមួយចំនួនតូច មិនទាន់យល់ថា តម្លៃសំពត់បត់មានតម្លៃល្អបែបណាទេ រហូតដល់ទៅវត្តស្លៀកបំពត់ខ្លីៗ ទៀតផង» ។
លោកជំទាវ រដ្ឋលេខាធិការ បានបន្ថែមកម្មវិធីរាត្រីសមោសរ នឹងទទួលបានស្វាគមន៍ ចំពោះបណ្តាញសារព័ត៌មានទាំងអស់ ក្នុងការផ្សាយដោយទូលាយ ដើម្បីធ្វើការផ្សព្វផ្សាយ ឲ្យប្រជាពលរដ្ឋបានដឹង ពិសេសយុវជនជំនាន់ក្រោយនៅទូទាំងប្រទេសដឹង ។
បើតាមលោកជំទាវរដ្ឋលេខាធិការ បានឲ្យដឹងថា កម្មវិធីរាត្រីសមោសរ បង្ហាញសំពត់បត់ខ្មែរនេះ ត្រូវបានអនុញ្ញាតពីថ្នាក់ដឹកនាំក្រសួងវប្បធម៌ឲ្យធ្វើឡើងជារៀងរាល់ឆ្នាំតែម្តង ក៏ប៉ុន្តែទាល់តែមានការគាំទ្រពីថ្នាក់ដឹកនាំ យុវជន ក៏ដូចប្រជាពលរដ្ឋគ្រប់ស្រទាប់វណ្ណៈ ។
ក្នុងឱកាសនោះដែរ លោកជំទាវ បានអះអាងថា សំពត់បត់ខ្មែរ បើតាមមើលភាពសភាពជាក់ស្តែង គឺជាអត្តសញ្ញាណជាតិមួយរបស់ខ្មែរ ទោះបីនៅប្រទេសជិតខាងយើង មានសំពត់ បត់ ផ្ទាល់ខ្លួនក្តី ។ ព្រោះថា បើយើងដាក់សំពត់បត់ខ្មែរ នៅជិតសំពត់បត់របស់ប្រទេសជិតខាងនោះ យើងនឹងអាចបែងចែកដាច់ពីគ្នា ។
លោកជំទាវ គូសបញ្ជាក់ថា ៖ «នៅពេលយើងយកសំពត់បត់ គេមកដាក់ជិតគ្នា យើងឃើញថា សំពត់បត់ខ្មែរ គឺមានការលេចធ្លោ ហើយលក្ខខណៈ សម្បត្តិរបស់សំពត់បត់ខ្មែរ គឺមានចង្កេះ ត្រគៀក ហើយនឹងជួយបិតបាំងនារីខ្មែរ ទោះបីគាត់ធាត់ ឬស្គម គឺស្លៀកទៅធ្វើឲ្យនារីខ្មែរយើង ស្អាត» ។
ក្រុមអ្នកសិល្បៈ ជាច្រើនរូប ដែលអញ្ជើញជាធិបតី ក្នុងសន្នីសីទសារព័ត៌មាន ហើយជាអ្នករចនាម៉ូដសំពត់បត់របស់ខ្មែរ ក៏បាននាំគ្នាលើកឡើងថា ពួកគេនឹងនាំយកសំពត់បត់បែបខ្មែរសម័យបុរាណ និងសំពត់បត់បែបសម័យដែលពួកគេខិតខំរចនាឡើងទៅដាក់បង្ហាញនៅក្នុង កម្មវិធី រាត្រីសមោសរនោះ ដើម្បីឲ្យទស្សនជនបានឃើញពីគុណតម្លៃរបស់សំពត់ បត់ខ្មែរយើង ផងដែរ ៕
ចែករំលែកព័តមាននេះ